ਵੱਡੀ ਭੈਣ ਦੇ ਨਾਮ

ਬਹੁਤਾ ਮਾਂ ਨੂੰ ਮੈਂ ਨਾ ਜਾਣਾ
ਕੀ ਕਹਿੰਦੀ ਕੀ ਕਰਦੀ ਸੀ ਮਾਂ
ਵੱਡੀਏ ਭੈਣੇਂ ਨੀ ਮਾਂ ਜਾਈਏ
ਦੱਸ ਓਹ ਤੇਰੇ ਵਰਗੀ ਸੀ ਨਾਂ

ਨੂਰ ਇਲਾਹੀ ਅਕਸ ਖੁਦਾਈ
ਨਕਸ਼ ਨੁਹਾਰ ਤੇਰੇ ਵਰਗੀ ਹੋਊ
ਤੈਨੂੰ ਦੇਖਾਂ ਤਾਂ ਮੈ ਸੋਚਾਂ
ਓਹ ਵੀ ਤਾਂ ਇੰਝ ਹੀ ਕਰਦੀ ਹੋਊ
ਮੇਰੀ ਆਕੜ ਮੇਰੀ ਜ਼ਿਦ ਦੇ
ਸਾਹਵੇਂ ਓਹ ਵੀ ਹਰਦੀ ਸੀ ਨਾਂ
ਵੱਡੀਏ ਭੈਣੇ ਨੀ ਮਾਂ ਜਾਈਏ
ਦੱਸ ਓਹ ਤੇਰੇ ਵਰਗੀ ਸੀ ਨਾਂ

ਪੌਣਾਂ ਬਣ ਕੇ ਜਦ ਉਹ ਭੈਣੇ
ਅਕਸਰ ਮੈਨੂੰ ਛੂਹ ਜਾਂਦੀ ਏ
ਸੱਚ ਕਹਿਨਾ ਹਾਂ ਹਵਾ ਚੋਂ ਮੈਨੂੰ
ਤੇਰੇ ਜਹੀ ਖੁਸ਼ਬੂ ਆਉਂਦੀ ਏ
ਬਾਪੂ ਜੇਠ ਦੀ ਧੁੱਪ ਜਿਹਾ ਸੀ
ਓਹ ਸਾਵਨ ਬਣ ਵਰਦੀ ਸੀ ਨਾਂ
ਵੱਡੀਏ ਭੈਣੇ ਨੀ ਮਾਂ ਜਾਈਏ
ਦੱਸ ਓਹ ਤੇਰੇ ਵਰਗੀ ਸੀ ਨਾਂ

ਓਹਦੇ ਪੈਰਾਂ ਵਾਲੀ ਜੰਨਤ
ਤੇਰੇ ਕਦਮਾਂ ਵਿੱਚ ਦੂਣੀ ਹੁੰਦੀ
ਤੈਨੂੰ ਦੇਖਾਂ ਓਹਨੂੰ ਸੋਚਾਂ
ਅਕਸਰ ਅੱਖ ਸਲੂਣੀ ਹੁੰਦੀ
ਮੈਂ ਕਮਲ਼ਾ ਕੁੱਝ ਕਰ ਨਾ ਸਕਿਆ
ਓਹ ਤੇਰਾ ਦਮ ਭਰਦੀ ਸੀ ਨਾਂ
ਵੱਡੀਏ ਭੈਣੇ ਨੀ ਮਾਂ ਜਾਈਏ
ਦੱਸ ਓਹ ਤੇਰੇ ਵਰਗੀ ਸੀ ਨਾਂ

ਵੈਰੀ ਵੈੱਲ ,.............ਬਹੁਤ ਖੂਬ ,................Eh bahut hi kabile tareef kavita likhi gayi hai,................Bahut wadhiya,.............Brilliant,............A must read poetry for all of us,.............i Salute to the writer,............jio 

Bahut shukariya ji