ਹੈ ਹਰ ਸਵੇਰ ਦੇ ਅੱਗੇ
ਹੈ ਹਰ ਸ਼ਾਮ ਦੇ ਪਿੱਛੇ
ੲਿਹ ਹਰ ਰਾਤ ਦੀ ਰੂਹ
ੲਿਹ ਬੁਝੀ ਲੋ ਦਾ ਘੇਰਾ
ਹੈ ਚਹੁੰ ਪਾਸੇ ੲਿਹ ਹਨ੍ਹੇਰਾ

ਅੰਬਰ ਦੇ ਅੰਬਰਾਂ ਤੋਂ ਪਾਰ
ਲੱਭਿਆ ਬਣ ਸੋਚ ਸਵਾਰ
ਪਰ ਨਾ ਮਿਲਿਆ ਸਵੇਰਾ
ਨਾ ਕੋੲੀ ਹੱਦ ਨਾ ਘੇਰਾ
ਹਰ ਥਾਂ ਬੱਸ ਅਨੰਤ ਹਨ੍ਹੇਰਾ

ਨੈਣਾਂ ਦਾ ਅੰਬਰ ਹੀ ਨੀਲਾ
ਅੰਬਰਾਂ ਦਾ ਅੰਬਰ ਹੈ ਕਾਲਾ
ਲੋ ਦੇ ਕਿਤੇ ਕਿਤੇ ਛਿੱਟੇ
ਬਾਕੀ ਜੋ ਹੈ ਸਭ ਚੁਫੇਰਾ
ੳੁੱਥੇ ਵਸੇਂਦਾ ਅਮਰ ਹਨ੍ਹੇਰਾ

ਲੋ ਦੀ ਉਮਰ ਹੈ ਮਾਸਾਂ
ਨਾ ਲਾਓ ਉਸ ਤੋਂ ਆਸਾਂ
ਹੈ ਅਮਰ ਅਨੰਤ ਹਨ੍ਹੇਰਾ
ਲੱਗਦਾ ਰੱਬ ਵੀ ਹੋ ਓਹਲੇ
ਬਣ ਬੈਠਾ ਹੈ ਕਿਤੇ ਹਨ੍ਹੇਰਾ

ਲੋ ਨੂੰ ਲੋਕ ਨੇ ਪੂਜਦੇ
ਤੇ ਵਿੱਚੋਂ ਰੱਬ ਨੂੰ ਢੂੰਡਦੇ
ਜੋ ਖੁਦ ਹੀ ਹੱਦਾਂ 'ਚ ਬੱਝਾ
ਕਿਵੇਂ ਹੋਣਾ ਰੱਬ ਜੇਡ ਲਮੇਰਾ
ਮੈਨੂੰ ਲਗਦੈ ਰੱਬ ਵੀ ਹੈ
ਬੈਠਾ ਬਣ ਕਿਤੇ ਹਨ੍ਹੇਰਾ ॥

:-ਸੰਦੀਪ ਸੋਝੀ

 

ਹਾਂ ਸੰਦੀਪ ਬਾਈ ਜੀ, ਸੱਚ ਮੁੱਚ ਹੀ ਜਿੰਦਗੀ ਵਿਚ ਹਨੇਰੇ ਦਾ ਇਕ ਅਲਗ ਅਤੇ ਵਿਲੱਖਣ ਸਥਾਨ ਹੈ - ਮਾਤ ਦੇ ਗਰਭ ਵਿਚ ਹਨੇਰਾ, ਰੋਸ਼ਨੀ ਦੀ ਚਕਾ ਚੌੰਧ ਨੂੰ ਉਘਾੜਨ ਪਿੱਛੇ ਹਨੇਰਾ, ਅਤੇ ਆਪਦੀ ਇਸ ਰਚਨਾ ਅਨੁਸਾਰ, ਸਵੇਰ ਦੇ ਅੱਗੇ ਅਤੇ ਸ਼ਾਮ ਦੇ ਪਿੱਛੇ ਹਨੇਰਾ - ਆਪਣੀ ਜਗਿਆਸਾ ਵੱਸ ਤੁਹਾਡੀ ਰੂਹ ਨੇ ਹਨੇਰੇ ਨੂੰ ਰੱਬ ਦੇ ਰੂਪ ਵਿਚ ਉਘਾੜਿਆ ਹੈ |

ਬਹੁਤ ਹੀ ਅਲਗ ਅਤੇ ਸੁੰਦਰ ਕਿਰਤ ਹੈ, ਬਾਈ ਜੀ |

ਸ਼ੇਅਰ ਕਰਨ ਲਈ ਸ਼ੁਕਰੀਆ |

 

ਜਿਉਂਦੇ ਵੱਸਦੇ ਰਹੋ |

 

 

ਹਨ੍ਹੇਰੇ ਦੇ ਕਾਲੇ ਸਚ ਨੂੰ ਉਘਾੜ ਕੇ ਸਾਹਮਣੇ ਲਿਆਉਂਦੀ ਇਹ ਰੋਸ਼ਨ ਕਵਿਤਾ ਕਿਸੇ ਰੋਸ਼ਨ ਦਿਮਾਗ ਸ਼ਖਸੀਅਤ ਦੀ ਹੀ ਉਪਜ ਹੋ ਸਕਦੀ ਸੀ ਇੰਨੇ ਸੁਚਜੇ ਢੰਗ ਨਾਲ ਇਸ hard core truth ਨੂੰ ਸਾਹਮਣੇ ਲਿਆਉਣ ਦਾ ਬਹੁਤ ਧੰਨਵਾਦ ਸੰਦੀਪ ਜੀ

 

ਹਮੇਸ਼ਾ ਦੀ ਤਰਾਂ ਆਪਣਾ ਕੀਮਤੀ ਵਕਤ 'ਚੋਂ ਕੁਝ ਪਲ ੲਿਸ ਨਿਮਾਣੀ ਜਿਹੀ ਕਿਰਤ ਦੇ ਨਾਮ ਕਰਨ ਲਈ ਤੇ ਤੁਹਾਡੇ ਕੀਮਤੀ ਕਮੈਂਟ੍‍ਸ ਤੇ ਹੌਸਲਾ ਅਫਜਾੲੀ ਲਈ ਤੁਹਾਡਾ ਬਹੁਤ ਬਹੁਤ ਸ਼ੁਕਰੀਆ ਜਗਜੀਤ ਸਰ ।