ਮਿਸਾਲ ਮਿਲੇ ਕੋਈ ਐਸੀ  -  ਮਰਦ ਅਗੰਮੜਾ

 

ਕੋਈ ਬਾਲ ਹੋਵੇ ਨਿੱਕਾ,

ਨੌਂ ਕੁ ਵਰ੍ਹਿਆਂ ਦਾ,

ਹੋ ਦਰਦਮੰਦ ਨਿੱਤਰੇ,

ਉਹ ‘ਜਿਉਂਦੇ ਮਰਿਆਂ’ ਦਾ,

ਬੇਧੜਕ ਧਰਮ ਦੀ ਲਾਜ ਹਿੱਤ,

ਦਏ ਸੀਸ ਪਿਤਾ ਦਾ ਵਾਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

ਉਸ ਤੀਬਰ ਕੀਤੀ ਧਾਰ,

ਹਿੰਮਤ ਦੀਆਂ ਨਦੀਆਂ ਦੀ,

ਫਿਰ ਕੌਮ ਜਗਾਈ ਜੁਗਤ ਨਾਲ,

ਸੁੱਤੀ ਹੋਈ ਸਦੀਆਂ ਦੀ,

ਪੀ ਕੇ ਅੰਮ੍ਰਿਤ, ਬਾਜਾਂ ਨੂੰ

ਪੈ ਗਈ ਚਿੜੀਆਂ ਦੀ ਡਾਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

ਉਸ ਸੂਰਤ ਸਿਰਜੀ,

ਦੇਖ ਹੋਇ ਨਿਰਭੈ ਦੁਖਿਆਰਾ,

ਲੱਖਾਂ ਦੀ ਹੋਇ ਭੀੜ,

ਸਿੰਘ ਦਿੱਸੇ ਨਿਆਰਾ,

ਪੰਜ ਕਕਾਰਾਂ ਸੰਗ ਬਖਸ਼ੀ,

ਇਹ ਸੋਹਣੀ ਦਸਤਾਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

ਉਸ ਵਾਰੇ ਚਾਰੇ ਲਾਲ,

ਸੰਗ ਮਾਤ ਪਿਆਰੀ,

ਮੁਸ਼ਕਲ ਹਰ ਮਜ਼ਲੂਮ ਦੀ,

ਆਪਣੇ ਸਿਰ ਧਾਰੀ,

ਇਕ ਸੰਤ, ਸਿਪਾਹੀ ਹੋ ਗਿਆ,

ਚੁੱਕ ਜ਼ੁਲਮ ਵਿਰੁਧ ਹਥਿਆਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

ਸਵਾ ਲੱਖ ਦੀ ਹੇੜ ਨੂੰ,

ਇੱਕ-ਇੱਕ ਨਾਲ ਹਾੜੇ,

ਜੇਰਾ ਸਾਗਰ ਜੇਡ, 

ਲਿਖੇ ਬੇਦਾਵੇ ਪਾੜੇ,

ਸਭ ਖੋ ਕੇ ਵੀ

ਯਾਰੜੇ ਦੇ ਸੱਥਰ ਨਾਲ ਪਿਆਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

ਵਹ ਪ੍ਰਗਟਿਓ ਮਰਦ ਅਗੰਮੜਾ,

ਵਰੀਆਮ ਇਕੇਲਾ,

ਵਾਹ ਵਾਹ ਗੋਬਿੰਦ ਸਿੰਘ,

ਆਪੇ ਗੁਰੁ ਚੇਲਾ,

ਦੀਨ ਦੀ ਖਾਤਿਰ ਜੂਝਿਆ,

ਜਿਦ੍ਹਾ ਪੀੜ੍ਹੀ ਦਰ ਪਰਵਾਰ |

ਮਿਸਾਲ ਮਿਲੇ ਕੋਈ ਐਸੀ,

ਮੈਨੂੰ ਵੀ ਦੱਸਿਓ ਯਾਰ |

 

             ਜਗਜੀਤ ਸਿੰਘ ਜੱਗੀ

 

'ਜਿਉਂਦੇ ਮਰਿਆਂ' =  ਉਹ ਕਸ਼ਮੀਰੀ ਪੰਡਤ ਜੋ ਔਰੰਗਜ਼ੇਬ ਦੇ ਕੱਟਰਪੰਥੀ ਜ਼ੁਲਮਾਂ ਕਰਕੇ ਮਰ ਮਰ ਕੇ ਜੀਅ ਰਹੇ ਸਨ |

'ਜੁਗਤ' = ਖਾਲਸੇ ਦੀ ਰਚਨਾ ਦੇ ਸਮੇਂ ਦਾ ਕੌਤਕ |

ਹਰ = ਭਾਵ 'ਹਰ ਕੇ', 'ਲੈ ਕੇ'

ਹਾੜੇ = ਤੋਲੇ;

ਹੇੜ = ਭੀੜ; 

ਖੋ ਕੇ = ਸਾਰਾ ਪਰਵਾਰ ਆਦਿ ਗੁਆ ਕੇ

ਇਹ ਰਚਨਾ ਬਾਦਸ਼ਾਹ ਦਰਵੇਸ਼ ਗੁਰੂ ਗੋਬਿੰਦ ਸਿੰਘ ਜੀ ਦੇ ਪ੍ਰਕਾਸ਼ ਉਤਸਵ ਤੇ ਅਪਲੋਡ ਕਰਨ ਦੀ ਮਨਸ਼ਾ ਸੀ, ਜੋ ਸਾਡੇ ਬਾਹਰ (ਮੁੰਬਈ) ਹੋਣ ਕਰਕੇ ਨਹੀਂ ਹੋ ਸਕਿਆ |

SORRY FOR POSTING LATE AS I WAS OUT TO BOMBAY.

IT WAS INTENDED TO BE POSTED ON THE EVE OF PRAKASH UTSAV OF

BADSHAH DARVESH GURU GOBIND SINGH JI 

 

ਕੋਈ ਨਹੀਂ ਦੇ ਸਕਦਾ ਜਨਾਬ ਐਸੀ ਮਿਸਾਲ

 

 

ਸ਼ਾਨਦਾਰ  ਪੇਸ਼ਕਸ਼

 

ਆਪ ਜੀ ਨੇ ਕਿਰਤ ਲਈ ਸਮਾਂ ਕਢਿਆ, ਬਹੁਤ ਬਹੁਤ ਧੰਨਵਾਦ ਬਿੱਟੂ ਬਾਈ ਜੀ !

ਮੈਂ ਸਹਿਮਤ ਹਾਂ ਤੁਹਾਡੇ ਨਾਲ, ਐਸੀ ਲਾਸਾਨੀ ਸ਼ਖਸੀਅਤ ਵਰਗੀ ਮਿਸਾਲ ਕਿੱਥੇ ਮਿਲ ਸਕਦੀ ਹੈ - ਕਿਉਂਕਿ ਉਹ ਆਪਣੇ ਜਿਹਾ ਆਪ, ਇਕ ਹੀ ਸੀ |

 

ਇਕ ਲਾਸਾਨੀ ਹੀਰੋ, ਇਕ ਸ਼ਰਧਾਂਜਲੀ ਭਰੀ ਕਵਿਤਾ ਅਤੇ ਸਵਾ ਲੱਖ ਕਮੇਂਟ - ਗਣਿਤ ਬਿਲਕੁਲ ਸਹੀ ਐ ਬਾਈ ਜੀ |

 

 

ਇਹੋ ਜਿਹੀ ਲਾਸਾਨੀ ਸ਼ਖਸੀਅਤ ਨਾ ਹੋਈ ਹੈ ਨਾ ਹੋਣੀ ਹੈ | ਇਸ ਲਈ ਐਸੀ ਮਿਸਾਲ ਮਿਲ ਹੀ ਨਹੀਂ ਸਕਦੀ ਜੀ, ਬਿਲਕੁਲ ਸਹੀ ਲਿਖਿਆ ਹੈ ਸਰ ਤੁਸੀਂ |

 

ਬਹੁਤ ਹੀ ਸੋਹਣੀ ਲਿਖਤ |

 

no word sir ji slaaam hai thodi klm te soch nu ji....god bless u ji

ਵਹਿ ਪ੍ਰਗਟਿਓ ਮਰਦ ਅਗੰਮੜਾ,
ਵਰਿਆਮ ਇਕੇਲਾ,
ਵਾਹੁ ਵਾਹੁ ਗੋਬਿੰਦ ਸਿੰਘ,
ਆਪੇ ਗੁਰ ਚੇਲਾ,
ਦੀਨ ਦੀ ਖਾਤਿਰ ਜੂਝਿਆ,
ਜਿਦ੍ਹਾ ਪੀੜ੍ਹੀ ਦਰ ਪਰਵਾਰ |
ਮਿਸਾਲ ਮਿਲੇ ਕੋਈ ਐਸੀ,
ਮੈਨੂੰ ਵੀ ਦੱਸਿਓ ਯਾਰ |

ਜਗਜੀਤ ਸਰ, ਤੁਹਾਡੀ ਇਹ ਰਚਨਾ ਲਫਜ਼ਾਂ ਤੋਂ ਪਰੇ ਹੈ, ਸ਼ੇਅਰ ਕਰਨ ਲਈ ਸ਼ੁਕਰੀਆ ਜੀ ।

ਸੰਦੀਪ ਜੀ, ਆਪਨੇ ਹਮੇਸ਼ਾ ਦੀ ਤਰਾਂ ਵਕਤ ਕੱਢਕੇ ਸੰਤ ਸਿਪਾਹੀ ਸਤਿਗੁਰੂ ਗੋਬਿੰਦ ਸਿੰਘ ਸਾਹਿਬ ਨੂੰ ਸਮਰਪਿਤ ਰਚਨਾ ਨੂੰ ਵਿਜ਼ਿਟ ਕੀਤਾ ਅਤੇ ਸਰਾਹਿਆ |  ਹੌਸਲਾ ਅਫਜ਼ਾਈ ਲਈ, ਆਪ ਜੀ ਦਾ ਬਹੁਤ ਬਹੁਤ ਧੰਨਵਾਦ ਬਾਈ ਜੀ |

 

ਜਿਉਂਦੇ ਵੱਸਦੇ ਰਹੋ ਜੀ |

ਆਓ !

ਬਾਦਸ਼ਾਹ ਦਰਵੇਸ਼ ਗੁਰ ਗੋਬਿੰਦ ਸਿੰਘ ਜੀ ਦੀਆਂ ਧਰਮ ਅਤੇ ਦੇਸ਼ ਕੌਮ ਲਈ ਕੀਤੀਆਂ ਕੁਰਬਾਨੀਆਂ ਅਤੇ ਅਹਿਸਾਨਾਂ ਲਈ ਉਨ੍ਹਾਂ ਦਾ ਧੰਨਵਾਦ ਕਰੀਏ...ਨਮਸਕਾਰ ਕਰੀਏ...

...ਅਤੇ ਆਪਣੇ ਗਿਰੇਬਾਨ ਵਿਚ ਝਾਕੀਏ ਕਿ ਜਿਨ੍ਹਾਂ ਨੇ ਸਾਡੇ ਲਈ ਇੰਨਾ ਕੁਝ ਕੀਤਾ ਹੈ ਅਸੀ ਉਨ੍ਹਾਂ ਲਈ ਕੀਹ ਕੀਤਾ ਹੈ ਜਾਂ ਕਰ ਰਹੇ ਹਾਂ ?

ਗੁਰੂ ਗੋਬਿੰਦ ਸਿੰਘ ਵਰਗੀ ਮਿਸਾਲ ਪੂਰੀ ਦੁਨੀਆਂ ਵਿੱਚ ਨਹੀਂ ਮਿਲਦੀ ਤੇ ਨਾ ਹੀ ਕਦੇ ਮਿਲਣੀ ਹੈ | ਬਹੁਤ ਬਹੁਤ ਧੰਨਵਾਦ ਸਰ....ਇੱਸ ਰਚਨਾ ਨੂੰ ਸ਼ੇਅਰ ਕਰਨ ਵਾਸਤੇ |

ਬੜੇ ਕਮਾਲ ਦੀ ਰਚਨਾ ਸਾਂਝੀ ਕੀਤੀ ਹੈ ਸਰ ਆਪ ਜੀ ਨੇ | ਬਹੁਤ ਹੀ ਸੋਹਣਾ ਲਿਖਿਆ ਸਤਿਗੁਰਾਂ ਬਾਰੇ ਜੀ |

 

ਭੁੱਲ-ਚੁੱਕ ਲਈ ਮਾਫੀ ਜੀ!!!!

ਨਿੱਕੀ ਉਮਰੇ ਵਾਰਿਆ ਪਿਤਾ ਤੂੰ,
ਸਿੱਖ ਧਰਮ ਲਈ ਵੇਖਿਆ ਖੁਮਾਰ ਤੇਰਾ।
ਕੋਤਕ ਰਚਾਇਆ ਖਾਲਸੇ ਦਾ ਜਦੋ,
ਅਨੰਦਪੁਰ ਲੱਗਾ ਸੀਸਾਂ ਦਾ ਬਜਾਰ ਤੇਰਾ।
ਕੀ ਲਿਖਾ ਹਾਲ ਹੁੱਣ ਅਨੰਦਪੁਰ ਛੱਡਣ ਦਾ,
ਪੱਤੇ-ਪੱਤੇ ਨਾਲ ਪੁਤਰਾਂ ਵਰਗਾ ਪਿਆਰ ਤੇਰਾ।
ਕੀ ਲਿਖਾ ਹੁੱਣ ਗੜ੍ਹੀ ਚਮਕੌਰ ਬਾਰੇ,
ਜਿੱਥੇ ਪਿਆ ਸੁੱਤਾ ਅਜੀਤ-ਜੂਝਾਰ ਤੇਰਾ।
ਹੱਥੋ ਕਲਮਾਂ ਡਿੱਗ ਪੈਦੀਆ ਬਾਜਾਂ ਵਾਲਿਆ,
ਨੀਹਾਂ ਵਿੱਚ ਚਿਣਿਆ ਦੇਖ ਪਰਿਵਾਰ ਤੇਰਾ।
ਆਪਣਾ ਸਰਬੰਸ ਵਾਰ ਸਾਡੇ ਸਿਰ ਤਾਜ ਬੱਖਸ਼ਿਆ,
"ਗੈਰੀ" ਯੁਗਾਂ ਯੁਗਾਂ ਲਈ ਸ਼ੁਕਰ ਗੁਜ਼ਾਰ ਤੇਰਾ।

ਲੇਖਕ ਗਗਨ ਦੀਪ ਸਿੰਘ ਵਿਰਦੀ (ਗੈਰੀ)