ਤੇਰੀ ਏਨੀ ਚੁੱਪ ਵੇ ਅੜਿਆ
ਅੰਦਰ ਏਨੀ ਧੁੱਪ ਵੇ ਅੜਿਆ
ਕੁਝ ਕੁ ਛਿੱਟੜੇ ਬਾਰਿਸ਼ ਕਰਦੇ
ਰੂਹ ਮੇਰੀ ਸ਼ਾਹ ਵਾਰਿਸ ਕਰਦੇ
ਇਸ਼ਕ 'ਚ ਸੋਨਾ-ਸੋਨਾ ਹੋ ਜਾਹ
ਨਜ਼ਰ ਮੇਰੀ ਨੂੰ ਪਾਰਸ ਕਰਦੇ

ਬਿਰਖ-ਬਰੋਟੇ ਖਿੜਨ ਬਹਾਰਾਂ
ਕਮਲੀਆਂ ਹੋਈਆਂ ਫਿਰਨ ਬਹਾਰਾਂ
ਰੂਹ ਵਿੱਚ ਕਿੰਨਾ ਸੇਕ ਵੇ ਅੜਿਆ
ਪੌਣਾਂ ਦੇ ਨਾ ਮੇਚ ਵੇ ਅੜਿਆ
ਹਿਜ਼ਰ 'ਚ ਭਖਦੀ ਜਿੰਦੜੀ ਮੇਰੀ
ਰੋਹੀਆਂ ਨੂੰ ਇਹ ਭੇਤ ਵੇ ਅੜਿਆ

ਮਿੱਠੜਾ- ਮਿੱਠੜਾ ਜਾਪ ਚੜ੍ਹੇ ਜੀ
ਮਠੜਾ-ਮਠੜਾ ਤਾਪ ਚੜ੍ਹੇ ਜੀ
ਜ਼ਹਿਰਾਂ ਵਾਲੀ , ਕਹਿਰਾਂ ਵਾਲੀ
ਕੰਬਦੀ ਕੋਈ ਰਾਤ ਚੜ੍ਹੇ ਜੀ
ਤਲੀ ਤੇ ਰੱਖ ਕੇ ਸੂਰਜ ਟੇਕਾਂ
ਤਾਂ ਕਿਧਰੇ ਪ੍ਰਭਾਤ ਚੜ੍ਹੇ ਜੀ

ਛਮ-ਛਮ ਵਰ੍ਹ ਜਾਹ, ਜਲ-ਥਲ ਕਰ ਜਾਹ
ਪੂਰਾ ਡੁੱਲ ਜਾਹ, ਪੂਰਾ ਭਰ ਜਾਹ
ਜੇ ਤੇਰੀ ਨਹੀਂ, ਫਿਰ ਮੇਰੀ ਨਹੀਂ
ਪਹਿਚਾਣ ਮੇਰੀ ਲਾਵਾਰਿਸ ਕਰਦੇ
ਇਸ਼ਕ 'ਚ ਸੋਨਾ-ਸੋਨਾ ਹੋ ਜਾਹ
ਨਜ਼ਰ ਮੇਰੀ ਨੂੰ ਪਾਰਸ ਕਰਦੇ ~

ਵਾਹ ,.............a brilliantly written punjabi poetry,.............great saab g