ਸਾਡੀਆਂ ਨੀਂਦਾਂ ਸਾਡੇ ਸੁਪਨੇ
ਤੇ ਕਾਬਜ਼ ਕੋਈ ਹੋਰ, ਨੀਂ ਨੰਨ੍ਹੀਂ ਛਾਂ ਵਾਲੀਏ
ਤੇਰੀ ਦੁਨੀਆ ਹੋਰ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਕੇਹੜਾ ਤੇਰੀ ਪੂਛ ਨੂੰ ਫੜ ਲਊ, ਕੋਣ ਪਾਊ ਗਲ਼ ਡਾਹੇ ਨੀ,
ਆਥਣ ਵੇਲੇ ਦਿੱਲੀ ਹੁੰਦੀ, ਤੜਕੇ ਗਿੱਦੜਬਾਹੇ ਨੀ,
ਸਮਝ ਨ੍ਹੀਂ ਆਉਂਦੀ ਸਾਨੂੰ ਤੇਰੀ
ਅੰਨ੍ਹਿਆਂ ਵਾਲੀ ਦੋੜ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਚੇਤੇ ਕਰ ਤੂੰ ਵੋਟਾਂ ਵੇਲੇ ਚੁੰਨੀਆਂ ਜਦੋਂ ਵਟਾਈਆਂ ਸੀ,
ਸਾਡੀਆਂ ਚਾਚੀਆਂ ਤਾਈਆਂ ਸੀ ਤੇ ਕੁੱਝ ਭੈਣਾਂ ਭਰਜਾਈਆਂ ਸੀ,
ਜਾਹ ਨੀ ਝੂਠੀਏ, ਝੂਠੀ ਨਿਕਲੀ
ਖੜ੍ਹੀ ਬਦਲਗੀ ਤੋਰ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਖਾਕੀ ਵਰਦੀਆਂ ਵਾਲੇ ਨੇ ਕੁੱਝ 'ਤੋਤੀ' ਵਰਗੇ ਪੱਠੇ ਨੀ,
ਲੈ 'ਮਲੂਕੇ' ਕੋਲੋਂ ਥਾਪੜਾ, ਕੁੜੀਆਂ ਕੁੱਟਣ ਰੱਖੇ ਨੀਂ,
ਬਣਦਾ ਏ ਹੱਕ, ਲੈ ਕੇ ਰਹਿਣਾ
ਲਾਲੈ ਲੱਗਦਾ ਜ਼ੋਰ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਰੱਬ ਨੂੰ ਥੱਲੇ ਲਾਹ ਲੈਂਦੇ ਆਂ, ਆਥਣ ਨੂੰ ਪੈੱਗ ਲਾਕੇ ਨੀਂ,
ਇੱਕ ਵਾਰੀ ਤਾਂ ਵੇਖ ਸਾਹਮਣੇ, ਬਿਨਾਂ ਸਿਕੋਰਟੀ ਆ ਕੇ ਨੀਂ,
ਛੱਪੜ ਬਣੀਆਂ ਗਲ਼ੀਆਂ ਵੇਖੀਂ,
ਕਿਵੇਂ ਲਵਾਉਂਦੇ ਦੌੜ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਅਮਲਾਂ ਵਿੱਚ ਨਾ ਓਦਾਂ ਦੀ ਤੂੰ ਜਿੱਦਾਂ ਜਾਏ ਪਰਚਾਰੀ ਨੀਂ,
ਪੀ ਟੀ ਸੀ ਤੇ ਟਾਈਮ ਟੀਵੀ ਤੇ ਪੂਰੀ ਤੇਰੀ ਸਰਦਾਰੀ ਨੀਂ
ਵੱਡੀਆਂ ਪੱਗਾਂ ਛੋਟੇ ਸਿਰ ਤੈਨੂੰ
ਫਿਰਨ ਝੁਲਾਉਂਦੇ ਚੌਰ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......।
ਨਾ ਤੇਰੇ ਨਾਲ ਦੁਸ਼ਮਣੀ ਸਾਡੀ, ਨਾ ਕੋਈ ਮਿੱਤਰਚਾਰਾ ਨੀਂ,
ਏਨੀ ਗੱਲ ਹੀ ਪੁੱਛਣੀ, ਲਾਕੇ ਕਰੀਦਾ ਕਿਵੇਂ ਕਿਨਾਰਾ ਨੀਂ,
ਹੋਰ ਕਿਹੜਾ ਅਸੀਂ ਤੇਰੇ ਕੋਲੋਂ
ਘਰੇ ਵਟਾਉਣਾ ਵਾਣ ਨੀਂ ਨੰਨ੍ਹੀਂ ਛਾਂ ਵਾਲੀਏ
ਤੂੰ ਕੇਹੜਾ ਅਣਜਾਣ....।
ਗੱਗ-ਬਾਣੀ ਵਿੱਚ ਲਿਖਿਆ ਜੇ ਮੈਂ ਕੱਚਾ ਚਿੱਠਾ ਪੜ੍ਹ ਦਿੱਤਾ
ਫੇਰ ਕਹੇਂਗੀ ਚੰਦਰਿਆ ਮੇਰਾ ਸਭ ਕੁੱਝ ਨੰਗਾ ਕਰ ਦਿੱਤਾ,
ਮੈਨੂੰ ਮੇਰੀ ਸ਼ਰਮ ਮਾਰਦੀ
ਤੇਰੀ ਗੱਲ ਕੋਈ ਹੋਰ ਨੀਂ ਨੰਨ੍ਹੀ ਛਾਂ ਵਾਲੀਏ,
ਤੇਰੀ ਦੁਨੀਆਂ ਹੋਰ......ਸੁਰਜੀਤ ਗੱਗ