ਅਸੀ ਸੰਗ ਸੰਗ ਹੋਵਾਂਗੇ

ਨੀਂ ਸੁਣ ਚੰਬੇ ਦੀਏ ਡਾਲੀਏ,

ਉਮਰਾਂ ਦੀਆਂ ਸਾਂਝਾਂ ਵਾਲੀਏ,

ਜਿੰਦ ਜਦ ਤਕ ਹੱਸਦੀ ਰਹੇਗੀ,

ਸਾਡੀ ਦੁਨੀਆਂ ਵੱਸਦੀ ਰਹੇਗੀ,

ਜਦ ਵੀ ਹੱਸਾਂਗੇ ਰੋਵਾਂਗੇ

ਅਸੀ ਸੰਗ ਸੰਗ ਹੋਵਾਂਗੇ |

ਅਸੀ ਸੰਗ ਸੰਗ ਹੋਵਾਂਗੇ |

ਕਦੇ ਰੁੱਸ ਰੁਸਾ ਜਾਈਏ,

ਆਪਸ ਵਿਚ ਦਿਲ ਦੁਖਾਈਏ,

ਅਸੀ ਮਾਫ਼ੀ ਮੰਗ ਲਾਂਗੇ,

ਫਿਰ ਪਹਿਲਾਂ ਵਾਂਗੂੰ ਹੀ

ਅਸੀ ਮੰਨ ਕੇ ਟੁਰ ਪਾਂ ਗੇ,

ਹਰ ਭਾਰ ਵੰਡ ਕੇ ਢੋਵਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਜਿਉਂ ਬੋਟ ਆਲ੍ਹਣਿਉਂ

ਖੰਭ ਪਾ ਕੇ ਉੱਡ ਜਾਂਦੇ ਨੇ,

ਇਉਂ ਬੱਚੇ ਘਰ ਛੱਡ 

ਦੁਨੀਆਂ ਨਵੀਂ ਵਸਾਉਂਦੇ ਨੇ,

ਬਾਹਰ ਅਸੀਸਾਂ ਹੱਸ ਹੱਸ ਦੇ

ਜਦ ਅੰਦਰ ਵੜ ਰੋਵਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਜਦ ਉਮਰ ਦੁਪਹਿਰਾ ਢਲੇਗਾ,

ਇਕਲਾਪਾ ਮਨ ਨੂੰ ਖਲੇਗਾ,

ਇਸ ਨੂੰ ਹੱਸ ਉਡਾਉਣ ਲਈ,

ਆਪਸ ਵਿਚ

ਲਾਡ ਲਡਾਉਣ ਲਈ,

ਕੋਈ ਗੱਲ ਪੁਰਾਣੀ ਛੋਵ੍ਹਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਜਦ ਇਹ ਨੈਣਾਂ ਦੀ ਲੋਅ

ਧੁੰਦਲੀ ਜਾਵੇਗੀ ਹੋ,

ਐਨਕ ਲਾ, ਖੂੰਡੀ ਲਾਂਗੇ,

ਹੱਥ ਫੜਕੇ ਸੈਰ ਕਰਾਂਗੇ,

ਯਾਦਾਸਤ ਦੇ ਖੇਰੂੰ ਮੋਤੀ

ਕਰ ਜਤਨ ਪਰੋਵਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਮੱਠੀ ਹੁੰਦਿਆਂ ਹੁੰਦਿਆਂ

ਜਦ ਚਾਲ ਰੁਕੇਗੀ,

ਦਰਦ ਨਾਲ ਬੇਹਾਲ

ਕਮਰ ਵੀ ਨਹੀਂ ਝੁਕੇਗੀ,

ਇਕ ਦੂਜੇ ਦੇ ਨਹੁੰ ਕੱਟਣ

ਲਈ ਨੀਵੀਂ ਥਾਂ ਖਲੋਵਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਹੈਲਥ ਰਿਪੋਰਟ ਵਿਖਾ ਕੇ,

ਬੋਲਾਂਗੇ ਐਨਕ ਲਾ ਕੇ, 

ਇਹ ਮਿੱਟੀ ਬੜੀ ਢੀਠ ਐ,

ਜੀ ਸਾਰਾ ਕੁਝ ਤਾਂ ਠੀਕ ਐ -

ਇਕ ਦੂਜੇ ਦਾ ਦਿਲ ਰੱਖਣ ਨੂੰ

ਜਦੋਂ ਸੱਚ ਲੁਕੋਵਾਂਗੇ,

ਅਸੀ ਸੰਗ ਸੰਗ ਹੋਵਾਂਗੇ |

ਜਦ ਇਕ ਦਾ ਭੌਰ ਉੱਡੇਗਾ,

ਬਸ ਉਸ ਦਿਨ ਸਾਥ ਪੁੱਗੇਗਾ,

ਲੱਕੜਾਂ ਰੱਖ ਮਾਫ਼ੀ ਮੰਗ ਕੇ,

ਉਮੜਦੇ ਖਾਰੇ ਹੰਝੂਆਂ ਸੰਗ

ਜਦ ਨੈਣ ਭਿਗੋਵਾਂਗੇ,

ਉਸ ਘੜੀ ਆਖਰੀ ਵਾਰ

ਅਸੀ ਸੰਗ ਸੰਗ ਹੋਵਾਂਗੇ |

                      

                           ਜਗਜੀਤ ਸਿੰਘ ਜੱਗੀ

Notes:

ਭੌਰ - Soul; ਯਾਦਾਸਤ ਦੇ ਖੇਰੂੰ ਮੋਤੀ, ਕਰ ਜਤਨ ਪਰੋਵਾਂਗੇ - ਕਮਜ਼ੋਰ ਹੋਕੇ ਬਿਖਰਦੀ ਯਾਦਾਸਤ ਨੂੰ ਸਾਂਭਣ ਦਾ ਜਤਨ ਕਰਾਂਗੇ; ਸਾਥ ਪੁੱਗੇਗਾ = Mundane association ਪੂਰੀ ਹੋ ਜਾਏਗੀ, ਦੁਨਿਆਵੀ ਸਾਥ ਪੂਰਾ ਨਿਭ ਜਾਏਗਾ; ਖੂੰਡੀ - Walking Stick.  

 

ਸਰ ਬਹੁਤ ਹੀ.ਸੋਹਣਾ ਲਿਖਿਆ ਹੈ। ਕਮਾਲ ਦਾ ਅਹਿਸਾਸ ਹੈ। ਸਰ ਸ਼ਬਦ ਤਾਂ ਕਮਾਲ ਹੈ ਹੀ ਤੇ ਤੁਹਾਡੀ ਤਸਵੀਰ ਦੀ ਚੋਣ ਰਚਨਾ ਨੂੰ ਹੋਰ ਸ਼ਿੰਗਾਰ ਦਿੰਦੀ ਹੈ

 

ਜਗਜੀਤ ਸਰ ਕਮਾਲ ਕਰ ਦਿਤੀ ਤੁਸੀਂ .......

 

Speechless........

 

ਬਹੁਤ ਪਿਆਰ ਤੇ ਸਤਕਾਰ ਨਾਲ ਇਕ ਸਾਥੀ ਵਲੋਂ ਦੂਜੇ ਜੀਵਨ ਸਾਥੀ ਲੀ ਲਿਖੀ ਬਹੁਤ ਮਿਠੀ ਜਿਹੀ ਕਵਿਤਾ 

 

"ਜਦ ਇਕ ਦਾ ਭੌਰ ਉੱਡੇਗਾ,

ਬਸ ਉਸ ਦਿਨ ਸਾਥ ਪੁੱਗੇਗਾ,

ਲੱਕੜਾਂ ਰੱਖ ਮਾਫ਼ੀ ਮੰਗ ਕੇ,

ਉਮੜਦੇ ਖਾਰੇ ਹੰਝੂਆਂ ਸੰਗ

ਜਦ ਨੈਣ ਭਿਗੋਵਾਂਗੇ,

ਉਸ ਘੜੀ ਆਖਰੀ ਵਾਰ

ਅਸੀ ਸੰਗ ਸੰਗ ਹੋਵਾਂਗੇ ||"

 

ਇਹਨਾ ਸਤਰਾਂ ਨੇ ਤੇ ਰੁਲਾ ਹੀ ਦਿਤਾ .......

 

hats off  to you sir ........

 

blessed to have you as a mentor on the Punjabizm Forum......

 

It really made me cry......

 

Stay blessed, Sir 

 

ਮੱਠੀ ਹੁੰਦਿਆਂ ਹੁੰਦਿਆਂ
ਜਦ ਚਾਲ ਰੁਕੇਗੀ,
ਦਰਦ ਨਾਲ ਬੇਹਾਲ
ਕਮਰ ਵੀ ਨਹੀਂ ਝੁਕੇਗੀ,
ਇਕ ਦੂਜੇ ਦੇ ਨਹੁੰ ਕੱਟਣ
ਲਈ ਨੀਵੀਂ ਥਾਂ ਖਲੋਵਾਂਗੇ,
ਅਸੀ ਸੰਗ ਸੰਗ ਹੋਵਾਂਗੇ |
Ikk navi umang te umeed wali poetry padan nu mili hai
Aapsi payar da sohna chiter ukeriya hai

Ajoke samaaj ch pyaar dee hond mazboot karan wali poetry aa
Jeo

 

ਨਵੀ ਮੈਡਮ ਜੀ, ਸੰਜੀਵ ਅਤੇ ਗੁਰਪ੍ਰੀਤ ਬਾਈ ਜੀ | ਸਭ ਤੋਂ ਪਹਿਲਾਂ ਆਪ ਸਾਰਿਆਂ ਦਾ ਬਹੁਤ ਬਹੁਤ ਤਹਿ ਏ ਦਿਲ ਤੋਂ ਧੰਨਵਾਦ, ਕਿਰਤ ਨੂੰ ਇੰਨਾ ਪਿਆਰ ਅਤੇ ਮਾਣ ਬਖਸ਼ਣ ਲਈ |

ਅਸਲ ਵਿਚ ਇਹ ਜੀਵਨ ਐਸਾ ਕਠਿਨ ਇਮਤਿਹਾਨ ਭਰਿਆ ਸਮਾਂ ਹੈ ਜਿਸ ਨੂੰ ਜੀਣ ਲਈ ਸਿਆਣਿਆਂ ਨੇ ਸਦੀਆਂ ਪਹਿਲਾਂ Institution of Marriage ਦੀ ਨੀਂਹ ਰੱਖੀ ਸੀ |And it has the blessings of Exalted Souls like Guru Nanak Dev Ji too | ਪਰ ਇਸਦਾ ਆਮ ਨਿਰਾਦਰ ਹੁੰਦਿਆਂ ਵੇਖ ਰਿਹਾ ਹਾਂ | ਇਹ ਮਜ਼ਾਕਾਂ ਦਾ ਇਕ ਵੱਡਾ ਵਿਸ਼ਾ ਬਣ ਕੇ ਰਹਿ ਗਿਆ ਹੈ - ਜੋ ਹਮੇਸ਼ਾ ਦਿਲ ਦੁਖਾਂਦਾ ਰਿਹਾ ਹੈ |

 

ਮੈਂ ਭਲੀ ਭਾਂਤ ਸਮਝਦਾ ਹਾਂ, ਇਸਦਾ ਕੀਹ ਮਹੱਤਵ ਹੈ, ਅਤੇ ਇਸ ਦਾ ਕੀਹ ਹਸ਼ਰ ਹੋ ਰਿਹਾ ਹੈ |ਇਸੇ ਲਈ ਇਸਦੀ ਮਿਠਾਸ ਯਾਦ ਕਰਵਾਉਣ ਦਾ ਇਕ ਨਿਮਾਣਾ ਜਿਹਾ ਜਤਨ ਕਰਨ ਦਾ ਜੇਰਾ ਕੀਤਾ ਹੈ |

 

ਸਭ ਦੇ ਹੁੰਗਾਰੇ ਲਈ ਇਕ ਵਾਰ ਫਿਰ ਬਹੁਤ ਧੰਨਵਾਦ |

 

ਰੱਬ ਰਾਖਾ ਜੀ |

 

ਖੁਸ਼ ਰਹੋ ਜੀ |

 

ਇਕ ਦੂਜੇ ਦੇ ਨਹੁੰ ਕੱਟਣ
ਲਈ ਨੀਵੀਂ ਥਾਂ ਖਲੋਵਾਂਗੇ

ਕਮਾਲ............,

ਧੰਨ ਭਾਗ ਸਾਡੇ ਜੀ, ਬਹੁਤ ਬਹੁਤ ਸ਼ੁਕਰੀਆ ਬਿੱਟੂ ਬਾਈ ਜੀ ਆਪ ਨੇ ਆਪਣੇ ਰੁਝੇਵਿਆਂ ਚੋਂ ਵਕਤ ਕੱਢਕੇ ਇਧਰ ਗੇੜਾ ਮਾਰਿਆ ਅਤੇ ਕਿਰਤ ਦਾ ਆਦਰ ਕੀਤਾ |

ਜਿਉਂਦੇ ਵੱਸਦੇ ਰਹੋ ! 

ਰੱਬ ਰਾਖਾ ਜੀ ! 

     

 

Wah ! Simply awesome. ..

Bahut hi sweet rachna hai....dil karda e baar baar padhi jawa...

The richness and greatness of this creation is beyond any words to describe. ..

Jionde wassde raho. ..

This poem is very touching, sweet and puts forth an eternal love for life partner. Although it's loaded with hard realities too, but still it succeeds in penetrating deep into hearts of readers.

A signature Picasso piece of work from Picasso of this forum ! TFS

 

ਹਰਪਿੰਦਰ ਬਾਈ ਜੀ, ਆਪਣੇ ਬਿਜ਼ੀ ਸ਼ਡੂਲ ਵਿਚੋਂ ਸਮਾਂ ਕੱਢਣ ਅਤੇ ਨਿਮਾਣੀ ਜਿਹੀ ਕਿਰਤ ਨੂੰ ਇੰਨਾ ਪਿਆਰ ਅਤੇ ਸਨਮਾਨ ਦੇਣ ਲਈ ਆਪਦਾ ਧੰਨਵਾਦ ਕਰਨ ਲਈ ਮੇਰੇ ਕੋਲ ਯੋਗ ਸ਼ਬਦ ਨਹੀਂ ਹਨ - ਬਸ ਮੈਂ ਤੇ ਇੰਨਾ ਈ ਕਹਾਂਗਾ ਕਿ ਵੀਰਾਂ ਦੀ ਹਿੰਮਤ and encouragement ਦੇ ਖੰਭ ਲਾਕੇ ਉਡਾਰੀਆਂ ਲਾ ਰਹੇ ਹਾਂ ਅਤੇ ਆਪਦਾ ਪਿਆਰ ਹੰਡਾਅ ਰਹੇ ਹਾਂ ਜੀ |

 

I feel really very intensely about the strength and relevance of the institution of marriage even today, hence this verse.   

ਬਹੁਤ ਬਹੁਤ ਸ਼ੁਕਰੀਆ ਵੀਰ ਜੀਓ |

ਰੱਬ ਰਾਖਾ ਜੀ |