ਐ ਆਦਮ ਅਦਬ ਕਰ ਮਾਲਕਾ ਦੀ
ਜਿਨਾ ਆਸਰੇ ਚਲਣ ਤੇਰੇ ਸਾਹ ਮਿਯਾਂ
ਜਿਸਦਾ ਚਲਣਾਂ ਤੇ ਰੁਕਣਾ ਏ ਹੱਥ ਓਹਦੇ
ਓਹਨਾ ਦਮਾ ਦਾ ਕੀ ਵਸਾਹ ਮਿਯਾਂ
ਆਤਿਸ਼ ਕੌਮੀਅਤ ਦੀ ਖਾਹਿਸ਼ ਗੱਦੀਆਂ ਦੀ
ਕਿਹੜੀ ਚੱਲੇਆਂ ਤੂੰ ਜੰਨਤ ਦੇ ਰਾਹ ਮਿਯਾਂ
ਕਈ ਅਸ਼ੋਕ ਸਿਕੰਦਰ ਜਹੇ ਵਿਸ਼ਵ ਜੇਤੂ
ਮਿਲ ਗਏ ਮਿੱਟੀ ਵਿੱਚ ਬਣ ਸਵਾਹ ਮਿਯਾਂ
ਨਾਂ ਓਹ ਲੜਿਆ ਨਾ ਜਿਤੇਆ ਓਹ ਜ਼ੰਗ ਕੋਈ
ਜਿਹੜਾ ਸੱਚਾ ਸਾਡਾ ਸ਼ਹਿਨਸ਼ਾਹ ਮਿਯਾਂ
ਜੇ ਤੂੰ ਓਹਨੂੰ ਜਿਤਣਾ ਚਾਹਵਨਾ ਏ
ਓਹਦੀ ਯਾਦ ਚ ਮੰਜੀ ਡਾਹ ਮਿਯਾਂ
ਕਈ ਭੁਲੇ ਪਾਏ ਸਿਧੇ ਰਾਹ ਓਹਨੇ
ਬਹਾਦਰ ਜਹੇ ਨੇ ਲੱਖ ਗਵਾਹ ਮਿਯਾਂ
ਨਾਹੀ ਮੰਦਿਰ ਨਾ ਮਸਜਿਦ ਚ ਘਰ ਉਸਦਾ
ਓਹਤਾ ਮਿਲਦਾ ਦਿਲਾ ਦੇ ਰਾਹ ਮਿਯਾਂ