ਰਾਜ-ਸੱਤਾ ਤਾਂ ਅੰਨ੍ਹੀ ਹੁੰਦੀ ਏ
ਪਰ…
ਤੁਸਾਂ ਕਿਉਂ
ਗੰਧਾਰੀ ਵਾਂਗ
ਅੱਖਾਂ ’ਤੇ ਪੱਟੀ ਬੰਨ੍ਹ ਲਈ ਹੈ?
ਇਸ ਅਰਜਨ ਕੋਲ ਤਾਂ
ਨਾ ਰੱਥ ਹੈ
ਨਾ ਰੱਥਵਾਨ ਹੈ
ਨਾ ਤੀਰ ਹੈ
ਨਾ ਕਮਾਨ ਹੈ
ਨਾ ਗੀਤਾ ਦਾ ਗਿਆਨ ਹੈ।
ਇਹ ਤਾਂ ਇੱਕ ਆਮ ਜਿਹਾ ਇਨਸਾਨ ਹੈ
ਜਿਸ ਦਾ ਨਾ ਕੋਈ ਭਵਿੱਖ ਹੈ
ਨਾ ਹੀ ਵਰਤਮਾਨ ਹੈ।
ਇਸ ਦੇ ਕੋਲ ਤਾਂ ਆਪਣਾ
ਇੱਕ ਅਣਲਿਖਿਆ ਇਤਿਹਾਸ ਹੈ-
ਜੋ ਖਰ੍ਹਵੇ ਪੋਟਿਆਂ ਦੀ ਭੂਮਿਕਾ ਤੋਂ ਸ਼ੁਰੂ ਹੋ ਕੇ
ਲੂੰਹਦੇ ਢਿੱਡ ਦੀ ਅੰਤਿਕਾ ’ਤੇ ਖ਼ਤਮ ਹੁੰਦਾ ਹੈ।
-ਕੋਈ ਹਸਤਨਾਪੁਰ
ਨਾ ਇਹਦੀ ਲੋੜ ਹੈ
ਨਾ ਆਸ ਹੈ।
ਰਿਆਸਤਾਂ ਦੇ ਰਕਬਿਆਂ ਦੀ ਗੱਲ
ਇਹਦੀ ਸਮਝ ਤੋਂ ਬਾਹਰ ਹੈ
ਸਿਆਸਤ ਦੀਆਂ ਘੁੰਡੀਆਂ ਦੀ
ਇਹਨੂੰ ਕੀ ਖ਼ਬਰ ਸਾਰ ਹੈ
ਵਿਸ਼ਵ ਦੀ ਮੰਡੀ ਤੋਂ ਇਹਨੇ ਕੀ ਲੈਣਾ?
ਨੱਥੂ ਦੀ ਦੁਕਾਨ ਹੀ
ਇਹਦਾ ਸਾਰਾ ਬਾਜ਼ਾਰ ਹੈ।
ਇਹਨੂੰ ਤਾਂ ਬੱਸ
ਕਿਸੇ ਭਗਵਾਨ ਦੇ ਚਮਤਕਾਰ ਦਾ ਇੰਤਜ਼ਾਰ ਹੈ।
ਅਰਜਨ ਕੋਈ ਖ਼ਾਸ ਨਹੀਂ,
ਇੱਕ ਆਮ ਨਾਂਵ ਹੈ।
ਇਹਨੂੰ ਅਰਜੂ ਕਹੋ ਜਾਂ ਫਰਜੂ
ਕੋਈ ਫ਼ਰਕ ਨਹੀਂ ਪੈਂਦਾ।
ਪਰ…
ਪਰ ਸੱਤਾ ਦੇ ਅਹੁਦੇਦਾਰਾਂ ਨੇ
ਕੁਝ ਝੰਡੀ ਵਾਲੀਆਂ ਕਾਰਾਂ ਨੇ
ਚਰ ਚਰ ਕਰਦੀਆਂ ਅਖ਼ਬਾਰਾਂ ਨੇ
ਕੁਝ ਧਰਮ ਦਿਆਂ ਪਰਚਾਰਾਂ ਨੇ
ਕੰਧਾਂ ’ਤੇ ਲਾਏ ਇਸ਼ਤਿਹਾਰਾਂ ਨੇ
ਬੜੀ ਹੁਸ਼ਿਆਰੀ ਨਾਲ
ਬੰਨ੍ਹ ਕੇ ਫ਼ਿਰਕਿਆਂ ਦੇ ਖੋਪੇ
ਲਟਕਾ ਕੇ ਗਲ ਵਿੱਚ ਟੱਲੀਆਂ-
ਮਜਬੂਰੀ ਦੀਆਂ
ਲਾਚਾਰੀ ਦੀਆਂ
ਕੁਝ ਧਰਮ ਦੀ ਪਹਿਰੇਦਾਰੀ ਦੀਆਂ
ਆਪਸੀ ਬੇ-ਇਤਬਾਰੀ ਦੀਆਂ
ਵੋਟਾਂ ਦੀ ਸਰਦਾਰੀ ਦੀਆਂ
ਕੁਝ ਫੋਕੀ ਦੁਨੀਆਂਦਾਰੀ ਦੀਆਂ
ਅਣਮੁੱਕ ਬੇ-ਰੁਜ਼ਗਾਰੀ ਦੀਆਂ-
ਸਿਆਸਤ ਦੀ ਪੰਜਾਲੀ
ਇਹਦੇ ਗਲ ਪਾ ਰੱਖੀ ਹੈ।
ਅਤੇ…
ਇਹ ਲਾਖਾ ਵਹਿੜਕਾ
ਚੁੱਪ ਚਾਪ ਡਾਹ ਦਿੰਦਾ ਹੈ
ਆਪਣਾ ਸਿਰ
ਬਿਨਾਂ ਇਹ ਜਾਣੇ
ਕਿ ਇਹਨੂੰ ਕਿੱਥੇ ਜੋਇਆ ਜਾ ਰਿਹੈ।
ਪਰ…
ਤੁਸੀਂ ਜੋ ਬੜੇ ਸੋਚਵਾਨ ਹੋ
ਤੁਸੀਂ ਜੋ ਬੜੇ ਬੁੱਧੀਮਾਨ ਹੋ
ਤੁਸੀਂ ਜੋ ਬੜੇ ਪਰਖਵਾਨ ਹੋ
ਤੇ ਤੁਸੀਂ ਜੋ ਬੜੇ ਵੱਡੇ ਇਨਸਾਨ ਹੋ
ਤੁਸਾਂ ਕਿਉਂ ਗੰਧਾਰੀ ਵਾਂਗ
ਬੰਨ੍ਹ ਲਈ ਹੈ ਅੱਖਾਂ ’ਤੇ ਪੱਟੀ?
ਚਲੋ…ਬੰਨ੍ਹ ਹੀ ਲਈ ਹੈ
ਇਹ ਪੱਟੀ
ਤਾਂ ਹੁਣ ਜਦੋਂ ਇਹ ਪੱਟੀ ਖੋਲ੍ਹੋ
ਤਾਂ ਦੁਰਯੋਧਨ ਲਈ ਨਹੀਂ
ਇਸ ਅਰਜਨ ਲਈ ਖੋਲ੍ਹਣਾ।
ਕਿਉਂਕਿ
ਇਸ ਅਰਜਨ ਕੋਲ ਤਾਂ
ਨਾ ਰੱਥ ਹੈ
ਨਾ ਰੱਥਵਾਨ ਹੈ
ਨਾ ਤੀਰ ਹੈ
ਨਾ ਕਮਾਨ ਹੈ
ਨਾ ਗੀਤਾ ਦਾ ਗਿਆਨ ਹੈ।
ਇਹ ਤਾਂ ਇੱਕ ਆਮ ਜਿਹਾ ਇਨਸਾਨ ਹੈ
ਜਿਸ ਦਾ ਨਾ ਕੋਈ ਭਵਿੱਖ ਹੈ
ਨਾ ਹੀ ਵਰਤਮਾਨ ਹੈ।
-ਤੇਜਵਿੰਦਰ
ਮੋਬਾਈਲ: 95010-22547