|
ਅੱਜ ਕੱਲ |
ਸਬਜ਼ੀ ਦੇ ਨਾਲ ਬੁਰਕੀ ਬੱਸ ਛੁਹਾਇਆ ਕਰਦੇ ਆਂ ਅੱਜ-ਕੱਲ੍ਹ ਯਾਰੋ ਏਦਾਂ ਵਖਤ ਟਪਾਇਆ ਕਰਦੇ ਆਂ।
ਸਾਡੇ ਵੱਸ ਦੀ ਗੱਲ ਨਹੀਂ, ਲੈਕਸਾਂ ਰੈਕਸੋਨੇ ਕਾਲੇ ਸਾਬਣ ਦੇ ਨਾਲ ਹੁਣ ਵੀ ਨਹਾਇਆ ਕਰਦੇ ਆਂ। ... ਬੂਟ ਦੇ ਵਿੱਚੋਂ 'ਗੂਠਾ ਝਾਤੀਆਂ ਮਾਰ ਰਿਹੈ, ਤਲ਼ੀਆਂ ਉੱਤੇ ਸ਼ਾਮੀ ਤੇਲ ਝਸਾਇਆ ਕਰਦੇ ਆਂ।
ਹਰ ਤੀਜੇ ਦਿਨ "ਪੂਜਾ" ਪੈਂਸਲ ਮੰਗ ਲੈਂਦੀ, ਲਿਖਦੀ ਏ ਜਾਂ ਖਾਂਦੀ ਆਖ਼ ਸੁਣਾਇਆ ਕਰਦੇ ਆਂ।
ਘਰਵਾਲੀ ਕਹੇ ਦੁੱਧ ਦੇ ਪੈਸੇ ਦੋ ਮਹੀਨੇ ਹੋ ਗਏ ਨੇ? ਦੇ ਦਿੰਨੇ ਆਂ ਕਿਹੜਾ ਕਿਤੇ ਭੱਜ ਜਾਇਆ ਕਰਦੇ ਆਂ।
ਬੁਨੈਣ ਫਟੀ ਨੂੰ ਸਵਾ ਮਹੀਨਾ ਹੋ ਗਿਆ ਏ, ਪੈਂਦਾ ਨਹੀਂ ਪਰ ਏਦਾਂ ਈ ਝੱਗਾ ਪਾਇਆ ਕਰਦੇ ਆਂ।
ਸੈਲਫ ਸਟਾਰਟ ਦੀ ਟੀਂ ਟੀਂ ਕਰਨਾ ਭੁੱਲ ਗਏ ਆਂ, ਟੱਲੀਆਂ ਵਜਾਉਂਦੇ ਸਾਇਕਲ ਖੂਬ ਭਜਾਇਆ ਕਰਦੇ ਆਂ।
ਮਕਾਨ ਬਣਾਉਣਾ ਕਿਹੜਾ ਅੱਜ-ਕੱਲ੍ਹ ਸੋਖਾ ਏ, ਕਵਿਤਾ ਦੀ ਥਾਂ ਕੀਰਨੇ ਪਾਇਆ ਕਰਦੇ ਆਂ।
ਸਰਮਾਏਦਾਰੀ ਦੀ ਭੇਟ ਚੜ੍ਹੇ ਸੁਪਨੇ ਸਾਡੇ, ਘਰਵਾਲੀ ਤੇ ਗੁੱਸਾ ਲਾਹਿਆ ਕਰਦੇ ਆਂ।
ਨਿੱਤ ਦੀ ਪੀਣੀ ਅਪਣੇ ਆਪ ਹੀ ਛੁੱਟ ਗਈ ਏ, ਟੈਨਸ਼ਨਾਂ ਸੰਗ ਸਕੀਰੀ ਪਾਇਆ ਕਰਦੇ ਆਂ।
ਇੱਕੋ ਕਮਰਾ ਅਤੇ ਰਸੋਈ ਚੰਗੀ ਸੀ, ਐਵੇਂ ਪੰਗਾ ਲੈ ਪਛਤਾਇਆ ਕਰਦੇ ਆਂ।
ਕੀ ਹੋਇਆ ਜੇ ਪੜ੍ਹਨ ਲਿਖਣ ਵਿੱਚ ਦਿੱਕਤ ਸੀ, ਕਰਜ਼ਾ ਸੀ ਕਿਸ਼ਤਾਂ ਵਿੱਚ ਲਾਹਿਆ ਕਰਦੇ ਆਂ।
ਘਰ ਵਿੱਚ ਬੇਸ਼ੱਕ ਭੰਗ ਭੁੱਜਦੀ ਏ ਕੀ ਹੋਇਆ, ਮਹਿਫਿਲ ਵਿੱਚ ਢੋਲੇ ਦੀਆਂ ਲਾਇਆ ਕਰਦੇ ਆਂ।
ਮਿਹਨਤ ਕਰਦਾ ਕਰਦਾ ਬੰਦਾ ਮਰ ਜਾਂਦਾ, ਵੱਜ ਗਏ ਵਾਜੇ, ਖਾਲੀ ਹੱਥ ਵਜਾਇਆ ਕਰਦੇ ਆਂ।
ਦਿਨ ਮਾੜੇ ਜਦ ਚੱਲਦੇ ਹੁੰਦੇ ਬੰਦੇ ਦੇ, ਅਸਮਾਨੋਂ ਡਿੱਗ ਖਜੂਰ ਤੇ ਅਟਕ ਜਾਇਆ ਕਰਦੇ ਆਂ।
ਪਾਧਾ ਨਹੀਂ ਸੀ ਪੁੱਛਦੇ ਜਦ ਦਿਨ ਚੰਗੇ ਸੀ, ਕੱਛੇ ਨੂੰ ਵੀ ਟਾਕੀਆਂ ਲਾ ਹੰਢਾਇਆ ਕਰਦੇ ਆਂ।
ਏਸ ਮੁਲਕ ਵਿੱਚ ਮਿਹਨਤ ਦਾ ਫਲ ਕੋੜਾ ਏ, ਫਿਰ ਵੀ ਮਿਹਨਤ ਵਾਲਾ ਢੋਲ ਵਜਾਇਆ ਕਰਦੇ ਆਂ।
ਲੁੱਟ ਸਕਦੇ ਸੀ ਦੁਨੀਆਂ ਰੰਗੀਂ ਵੱਸਣਾ ਸੀ, ਪਰ ਭਗਤ ਸਿੰਘ ਦੇ ਵਾਰਿਸ ਹਾਂ ਅੜ ਜਾਇਆ ਕਰਦੇ ਆਂ।
ਕਾਣੀ ਵੰਡ ਨੇ ਸਾਨੂੰ ਥੱਲੇ ਲਾਇਆ ਏ, ਐਵੇਂ ਨਹੀਂ ਹੱਕਾਂ ਲਈ ਡਹਿ ਜਾਇਆ ਕਰਦੇ ਆਂ।
ਸੁਰਜੀਤ ਗਰਗ
|
|
25 Jul 2012
|