ਬਣਾਉਟੀ ਫ਼ੁੱਲ
ਕਾਕਾ ਗਿੱਲ
ਸਾਨੂੰ ਲੋੜ ਨਹੀਂ ਤਲਵਾਰਾਂ ਦੀ।
ਮਿਹਰਬਾਨੀ ਚਾਹੀਦੀ ਯਾਰਾਂ ਦੀ।
ਬਣਾਉਟੀ ਫ਼ੁੱਲ ਦਿਲ ਪਰਚਾ ਦੇਣਗੇ
ਸਾਨੂੰ ਲੋੜ ਨਹੀਂ ਬਹਾਰਾਂ ਦੀ।
ਖਿੜੇ ਰਹਿਣਗੇ ਸਮੇਂ ਦੇ ਅੰਤ ਤੱਕ
ਉਸਤਤ ਕਰਕੇ ਬੁੱਲ ਜਾਣਗੇ ਥੱਕ
ਧੂਫ਼ ਖੁਸ਼ਬੋ ਦੇਵੇ ਲੱਖਾਂ ਹਜਾਰਾਂ ਦੀ।
ਕਾਠ ਦੇ ਪੁਤਲੇ ਨੂੰ ਮਿੱਤਰ ਬਣਾਵਾਂ
ਹਰ ਵਕਤ ਗੱਲਾਂ ਕਰਕੇ ਚਿੱਤ ਪਰਚਾਵਾਂ
ਤਿਆਗੀ ਸੰਗੀਤ ਤੂੰਬੇ ਦੀਆਂ ਤਾਰਾਂ ਦੀ।
ਕਾਲ਼ੇ ਹੋ ਜਾਣਗੇ ਸੋਨੇ ਦੇ ਗਹਿਣੇ
ਹੁਸਨ ਜੁਆਨੀ ਸਦਾ ਨਾ ਰਹਿਣੇ
ਅਸੀਂ ਮੰਨਤ ਪਾਈ ਮਜ਼ਾਰਾਂ ਦੀ।
ਚਾਹੇ ਪਿਆਰ ਕਰੀਏ ਜਿਉਂਦਿਆਂ ਨਾਲ
ਇਸ਼ਕ ਵਿੱਚ ਮਰੀਏ ਮੁਰਦਿਆਂ ਨਾਲ
ਸਾਨੂੰ ਲੋੜ ਨਹੀਂ ਹਥਿਆਰਾਂ ਦੀ।