ਲਉ ਜੀ ਆਪਾਂ ਵੀ ਇੱਕ ਨਿਮਾਣੀ ਜਿਹੀ ਕੋਸ਼ਿਸ਼ ਕੀਤੀ ਏ ਲਿਖਣ ਦੀ...
ਗੱਲ ਕੁਸ਼ ਇਸ ਤਰਾਂ ਹੈ ਕਿ ਇੱਕ ਦਿਨ ਪੰਜਾਬੀ ਗੀਤਾਂ ਦੀ ਲੜੀ 'ਚ ਸ਼ਬਦ ਆਇਆ ਸੀ "ਬੇਹਿਸਾਬ" ਜਿਸ ਤੇ ਮੈਨੂੰ ਗੀਤ ਨਹੀਂ ਸੀ ਮਿਲ ਰਿਹਾ ਤੇ ਮੈਂ ਕੋਸ਼ਿਸ਼ ਕਰਕੇ ਚਾਰ ਕੁ ਲਾਈਨਾਂ ਲਿਖੀਆਂ ਤੇ ਲੜੀ ਤੋਰ ਦਿੱਤੀ...
ਤੇ ਲਖਵਿੰਦਰ ਵੀਰ ਨੇ ਲਿਖਿਆ ਸੀ ਕਿ ਆਪਾਂ ਭਾਜੀ ਹੌਲੀ ਹੌਲੀ ਤੁਹਾਡੇ ਹੱਥ 'ਚ ਕਲਮ ਫੜਾ ਦੇਣੀ ਏ....ਮੈ ਸੋਚਿਆ ਚਲੋ ਉਹਨਾ ਲਾਈਨਾਂ ਨੂੰ ਪੂਰੀਆਂ ਕਰਨ ਦੀ ਕੋਸ਼ਿਸ਼ ਕਰਦੇ ਹਾਂ...
ਹੁਣ ਸਿੱਟਾ ਤੁਹਾਡੇ ਸਾਹਮਣੇ ਹੈ....
ਬਹੁਤ ਕਮੀਆਂ ਪੇਸ਼ੀਆਂ ਹੋਣਗੀਆਂ ਕੋਈ ਸ਼ੱਕ ਨਹੀਂ ਹੈ, ਕ੍ਰਿਪਾ ਕਰਕੇ ਆਪਣੀ ਰਾਏ ਤੇ ਸੁਝਾਅ ਜ਼ਰੂਰ ਦੇਣਾ..ਖਿੜੇ ਮੱਥੇ ਪ੍ਰਵਾਨ ਹੋਣਗੇ ਜੀ ਮੈਨੂੰ...
ਅੱਜ ਭੁੱਲ ਗਈ ਏਂ ਸਾਰੇ , ਕੀਤੇ ਕੌਲ ਤੇ ਕਰਾਰ |
ਬੇਹਿਸਾਬਾ ਕਰਦੀ ਸੈਂ, ਕਦੇ ਮੇਰੇ ਨਾਲ ਪਿਆਰ |
ਨਿੱਤ ਨਵੇਂ ਸੱਜਣਾਂ ਦੀ, ਚੰਨੋਂ ਭੀੜ ਤੇਰੇ ਵੱਲੇ |
ਅਸੀਂ ਕੱਟਦੇ ਆਂ ਦਿਨ, ਰਹਿ ਕੇ ਕੱਲ-ਮ-ਕੱਲੇ |
ਪੱਤਝੜ ਮੇਰੇ ਵਿਹੜੇ, ਤੇਰੇ ਰਹਿੰਦੀ ਏ ਬਹਾਰ |
ਬੇਹਿਸਾਬਾ ਕਰਦੀ ਸੈਂ, ਕਦੇ ਮੇਰੇ ਨਾਲ ਪਿਆਰ ...
ਨੀ ਮੈਂ ਦੇਖ ਦੇਖ ਝੂਰਾਂ, ਰੁੱਖ ਝਾੜੀਆਂ ਉਹ ਸਾਰੇ |
ਜਿੱਥੇ ਮਿਲਦੇ ਹੁੰਦੇ ਸੀ, ਆਪਾਂ ਨਹਿਰ ਦੇ ਕਿਨਾਰੇ |
ਹੁੰਦੇ ਫੁੱਲ ਖਿੜੇ ਸੀ, ਅੱਜ ਰਹਿ ਗਏ ਬੱਸ ਖਾਰ |
ਬੇਹਿਸਾਬਾ ਕਰਦੀ ਸੈਂ, ਕਦੇ ਮੇਰੇ ਨਾਲ ਪਿਆਰ ..
ਕਾਹਦਾ ਗਿਲਾ ਤੇਰੇ ਉੱਤੇ, ਹੁੰਦਾ ਮੁੱਢ ਤੋਂ ਹੀ ਆਇਆ |
ਬੂਟਾ ਲਾਇਆ ਕਿਸੇ ਹੁੰਦਾ, ਮਾਣੇ ਹੋਰ ਕੋਈ ਛਾਇਆ |
ਝੂਠੀ ਦੁਨੀਆਂ 'ਚ ਕਿੱਥੋਂ, ਸੱਚਾ ਮਿਲਦਾ ਏ ਪਿਆਰ |
ਬੇਹਿਸਾਬਾ ਕਰਦੀ ਸੈਂ, ਕਦੇ ਮੇਰੇ ਨਾਲ ਪਿਆਰ ...
"ਬਲਿਹਾਰ" ਅੱਜ ਫੇਰ , ਉਹੀ ਮੰਗਦਾ ਦੁਆਵਾਂ |
ਦੂਰ ਤੇਰੇ ਕੋਲੋਂ ਰਹਿਣ, ਹਾਏ ਨੀ ਸਾਰੀਆਂ ਬਲਾਵਾਂ |
ਨੀ ਤੂੰ ਚਾਨਣੀਆਂ ਮਾਣ, ਅਸੀਂ ਲੈ ਲਏ ਅੰਧਕਾਰ |
ਬੇਹਿਸਾਬਾ ਕਰਦੀ ਸੈਂ, ਕਦੇ ਮੇਰੇ ਨਾਲ ਪਿਆਰ ...
- ਬਲਿਹਾਰ ਸੰਧੂ 27/05/2010