ਫਰਕ ਜੇ ਮਾਪੇ ਕਰਨ ਨਾ ਧੀ ਨੌਂਹ ਦੇ ਵਿਚਕਾਰ 
ਉਹ ਘਰ ਮਹਿਕੇ ਇਸ ਤਰ੍ਹਾਂ, ਜਿਉਂ ਮਹਿਕੇ ਗੁਲਜ਼ਾਰ ।

ਸੱਸ ਤੇ ਸਹੁਰਾ ਜਿਸ ਬਹੂ ਸਮਝੇ ਮਾਂ ਤੇ ਬਾਪ
ਸੁਖੀ ਰੱਖੇ ਪਰਿਵਾਰ ਨੂੰ, ਰਹੇ ਸੁਖੀ ਉਹ ਆਪ ।

ਜਿਸ ਘਰ ਦੇ ਵਿੱਚ ਹੈ ਨਹੀਂ, ਨਰ ਨਾਰੀ ਦਾ ਜੋੜ 
ਉਥੇ ਹੋਰ ਕੀ ਰਹਿ ਗਈ, ਦੱਸੋ ਨਰਕ ਦੀ ਲੋੜ ।

ਬੇ-ਇਤਬਾਰੀ ਮਾਰਦੀ, ਬਰਕਤ ਵਿੱਚ ਇਤਫ਼ਾਕ 
ਕਿਉਂ ਸਿਰ ਨੀਵਾਂ ਹੋਏਗਾ, ਜੇ ਉੱਚਾ ਇਖਲਾਕ ।

ਭੀੜ ਪਈ ਨਾ ਬਹੁੜਦੇ, ਜੋ ਸਕਿਆਂ ਦੇ ਤੱਕ 
ਫਿਰ ਕੀ ਮਗਰੋਂ ਲਾਹਵਣੇ, ਦੱਸ ਸਕਿਆਂ ਦੇ ਤੱਕ ।

ਹਰ ਸਰਮਾਏਦਾਰ ਦਾ, ਰਿਹਾ ਹਮੇਸ਼ਾ ਕੰਮ 
ਉਜਰਤ ਦੇਣੀ ਬਹੁਤ ਘੱਟ, ਲਾਹੁਣਾ ਬਹੁਤਾ ਚੰਮ ।

ਜੋ ਤੈਨੂੰ ਦਏ ਇਕ ਵਾਰ, ਜਤਲਾਏ ਦਸ ਵਾਰ 
ਤੇਰੀ ਵਧੇ, ਹੀਣਤਾ, ਉਸ ਦਾ ਵਧੇ ਹੰਕਾਰ ।

ਜੋੜ ਸਦਾ ਨਿਰਦੋਸ਼ ਤੂੰ, ਉਸ ਦੇ ਅੱਗੇ ਹੱਥ 
ਚਾਰ ਪਦਾਰਥ ਦੇਣ ਦੇ ਜੋ ਪ੍ਰਭੁ ਹੈ ਸਮਰੱਥ .... ਗਿਆਨੀ ਕੇਵਲ ਸਿੰਘ