|
ਅਰਸਾ ਹੋ ਗਿਆ, ਕਲ਼ਮ ਚਲਾਈ ਨੂੰ। |
ਸਤਿ ਸ੍ਰੀ ਅਕਾਲ ਦੋਸਤੋ। ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਕਾਫੀਏ ਜੋੜ-ਜੋੜ ਕੇ ਕੋਈ ਦਿਲ ਹਰਦੀ ਗਜ਼ਲ ਬਣਾਈ ਨੂੰ । ਕਲ਼ਮ ਫੜਨ ਤੋਂ ਹੱਥ ਵੀ ਡਰਦੈ, ਕਿ ਐਵੇਂ ਸੱਚ ਨਾ ਲਿਖ ਬੈਠਾਂ। ਕਦੇ ਸਖ਼ਤ ਜਿਹਾ ਖੁਣਦਾ ਸਹਿਮਾਂ, ਕੋਈ ਕੱਚ ਨਾ ਲਿਖ ਬੈਠਾਂ। ਜੇ ਆਵਾਜ ਨਾ ਬਣਕੇ ਗੂੰਜੀ, ਕਾਹਦੀ ਸਮਸ਼ੀਰ ਬਣਾਈ ਤੂੰ। ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਨਾ ਕਦੇ ਕੋਈ ਅਹਿਸਾਸ ਉੱਕਰਦੈਂ, ਨਾ ਜਜਬਾਤਾਂ ਦੀ ਪੰਡ ਖੋਲੇਂ। ਸ਼ਬਦ ਨਾ ਤੇਰੇ ਸੋਚ ਦੇ ਕੱਦ ਦੇ, ਨਾ ਹੀ ਜ਼ਹਿਨ ਦੇ ਖੰਡ ਫਰੋਲੇਂ। ਬਸ ਇੰਤਜਾਰ 'ਚ ਸਿੱਧੀਆਂ ਲੀਕਾਂ, ਦਿੱਸਣ ਅੱਖ ਟਿਕਾਈ ਨੂੰ। ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਹੁਣ ਤੇ ਕਦੇ ਤੂੰ ਇਸ਼ਕ ਮਜਾਜੀ, ਲਿਖਤਾਂ ਵੱਲ ਨੂੰ ਜਾਂਦਾ ਨਹੀਂ। ਮੇਲ, ਵਿਛੋੜੇ, ਮੋਹ ਦੀਆਂ ਬਾਤਾਂ, ਗ਼ਮ ਦੇ ਗੀਤ ਵੀ ਗਾਂਦਾ ਨਹੀਂ। ਲਿਖ ਲੈ ਕੋਈ ਹੂਕ ਹਿਜਰ ਦੀ, ਜਾਂ ਲਿਖਦੇ ਕੋਈ ਚਤੁਰਾਈ ਤੂੰ । ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਤੈਨੂੰ ਢਿੱਡ ਦਾ ਡਰ ਕਾਹਦੈ, ਤੂੰ ਤੇ ਅਨਾਜ ਕੋਈ ਖਾਂਦਾ ਨਹੀਂ। ਵਹੀ ਸੇਠ ਦੀ ਲਾਇਆ ਗੂਠਾ, ਦਾਣਾ ਘਰ ਨੂੰ ਜਾਂਦਾ ਨਹੀਂ। ਆਜਾ, ਕਿਸਾਨਾਂ ਦਾ ਹੱਥ ਬਣਕੇ, ਦਈਏ ਸਜਾ ਕਸਾਈ ਨੂੰ। ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਕੋਈ 'ਜੱਸ' ਖੱਟਿਆ ਲਿਖੀਏ, ਛੱਡ ਪਿੰਡ ਤੇ ਹੋਏ ਪ੍ਰਦੇਸੀ ਦਾ। ਤੁਰਲੇ - ਪੱਗਾਂ, ਕੁੜਤੇ - ਚਾਦਰ, ਓ ਨਿੱਘ ਲੋਈ ਤੇ ਖੇਸੀ ਦਾ। ਬੁਲੇਟ ਉਡੀਕੇ, ਕਿੱਦਾਂ ਭੁੱਲ ਗਿਐਂ, ਸ਼ਹਿਰ ਦੀ ਗੇੜੀ ਲਾਈ ਨੂੰ। ਅਰਸਾ ਹੋ ਗਿਆ ਕਾਗਦ ਤੇਰੀ ਹਿੱਕ 'ਤੇ ਕਲ਼ਮ ਚਲਾਈ ਨੂੰ। ਤਰਲੋਚਨ (ਜੱਸ ਪਨੈਚਾਂ )
|
|
05 Mar 2021
|