ਅੱਜ ਜਲੰਧਰ ਰੇਡੀਓ (873 kHz) ਤੋਂ ਕਵਿਤਾ ਦਾ ਵੱਖਰੀ ਤਰ੍ਹਾਂ ਦਾ ਪ੍ਰੋਗਰਾਮ ਪੇਸ਼ ਕੀਤਾ ਜਾਣਾ ਹੈ। ਇਸ ਵਿਚ ਸਾਰੀਆਂ ਭਾਰਤੀ ਭਾਸ਼ਾਵਾਂ ਦੀਆਂ ਚੋਣਵੀਆਂ ਕਵਿਤਾਵਾਂ ਦਾ ਪੰਜਾਬੀ ਅਨੁਵਾਦ ਪੇਸ਼ ਹੋਵੇਗਾ। ਪਰ ਇਸ ਨੂੰ ਪੇਸ਼ ਕਰਨਗੇ ਪੰਜਾਬੀ ਦੇ ਕਵੀ। ਇਸ ਤਰ੍ਹਾਂ ਤੁਸੀਂ ਸੁਰਜੀਤ ਪਾਤਰ, ਸੁਖਵਿੰਦਰ ਅੰਮ੍ਰਿਤ, ਸਵਰਨਜੀਤ ਸਵੀ, ਗੁਰਭਜਨ ਗਿੱਲ, ਰਵਿੰਦਰ ਭੱਠਲ ਆਦਿ ਦੀ ਆਵਾਜ਼ ਵਿਚ ਵਰਤਮਾਨ ਭਾਰਤੀ ਕਵਿਤਾ ਨੂੰ ਮਾਣ ਸਕੋਗੇ। ਇਸ ਵਿਚ ਸਿੰਧੀ ਕਵੀ ਰਸ਼ਿਮ ਰਮਾਨੀ ਦੀ ਕਵਿਤਾ 'ਔਰਤ' ਵੀ ਪੜ੍ਹੀ ਜਾਵੇਗੀ ਜੋ ਮੈਨੂੰ ਬਹੁਤ ਪਸੰਦ ਹੈ।
ਔਰਤ
------
ਔਰਤ ਨਹੀਂ ਜਾਣਦੀ
ਆਪਣੇ ਔਰਤ ਹੋਣ ਦਾ ਅਰਥ
ਆਪਣੇ ਔਰਤ ਹੋਣ ਦਾ ਮਹੱਤਵ।
ਸਹਿਜ ਹੁੰਦੀ ਹੈ ਔਰਤ ਆਕਾਸ਼ ਵਾਂਗ
ਪਰ ਅਣਜਾਣ ਨਹੀਂ ਹੁੰਦੀ
ਆਪਣੇ ਅੰਦਰਲੀਆਂ ਭੁੱਲ ਭੁਲੱਈਆਂ ਤੋਂ।
ਔਰਤ ਨੂੰ ਨਹੀਂ ਅਹਿਸਾਸ
ਆਪਣੇ ਔਰਤ ਹੋਣ ਦੇ ਜਾਦੂ ਦਾ
ਕਿ ਕੋਮਲ ਦੇਹੀ ਮਾਲਿਕ
ਹੋ ਸਕਦੀ ਚਟਾਨ ਵਾਂਗ ਮਜ਼ਬੂਤ
ਦਰਦ ਦੀਆਂ ਦੀਵਾਰਾਂ ਤੋੜ ਕੇ
ਪੁੰਗਰਦੇ ਨਵੀਂ ਨਸਲ ਦੇ ਅੰਕੁਰ
ਜੰਮਦਾ ਹੈ ਨਵਾਂ ਨਕੋਰ ਜੀਵਨ।
ਔਰਤ ਨਹੀਂ ਜਾਣਦੀ ਆਪਣੀ ਸਮਰੱਥਾ
ਪੁਰਸ਼ ਦੀ ਉਦਾਸੀ, ਥਕੇਵਾਂ, ਖਾਲੀਪਨ
ਸਭ ਕੁਝ ਚੂਸ ਲੈਂਦੀ ਅੱਖ ਪਲਕਾਰੇ ਵਿਚ।
ਔਰਤ ਨੂੰ ਆਪਣੇ ਸੁਹੱਪਨ ਦੀ ਤਾਕਤ
ਦੀ ਵੀ ਖਬਰ ਨਹੀਂ
ਰੰਗੋਲੀ ਦੇ ਰੰਗਾਂ ਨਾਲ ਉਹ ਘਰ ਹੀ ਨਹੀਂ ਸਜਾਉਂਦੀ
ਸਜਾ ਦਿੰਦੀ ਹੈ ਜੀਵਨ ਦਾ ਹਰ ਕੋਨਾ।
ਔਰਤ ਨੂੰ ਨਹੀਂ ਪਤਾ
ਕਿ ਉਸ ਦੀ ਚੁੱਪ ਕਿੰਨਾ ਕੁਝ ਬੋਲ ਦਿੰਦੀ
ਆਖਿਰ ਦੁਨੀਆਂ ਦੀ ਸਭ ਤੋਂ ਸੋਹਣੀ ਕਵਿਤਾ ਹੈ
ਔਰਤ
(ਸਿੰਧੀ, ਹਿੰਦੀ ਤੋਂ ਅਨੁਵਾਦ: ਜਸਵੰਤ ਜ਼ਫ਼ਰ)
|
