• ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ
  ਤੁਰ ਜਾਣਾ ਅਸਾਂ ਭਰੇ ਭਰਾਏ
  ਹਿਜਰ ਤੇਰੇ ਦੀ ਕਰ ਪਰਕਰਮਾ
  ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ !
  
  ਜੋਬਨ ਰੁੱਤੇ ਜੋ ਵੀ ਮਰਦਾ
  ਫੁੱਲ ਬਣੇ ਜਾਂ ਤਾਰਾ
  ਜੋਬਨ ਰੁੱਤੇ ਆਸ਼ਕ ਮਰਦੇ
  ਜਾਂ ਕੋਈ ਕਰਮਾਂ ਵਾਲਾ
  ਜਾਂ ਉਹ ਮਰਨ,
  ਕਿ ਜਿਨ੍ਹਾਂ ਲਿਖਾਏ
  ਹਿਜਰ ਧੁਰੋਂ ਵਿਚ ਕਰਮਾਂ
  ਹਿਜਰ ਤੁਸਾਡਾ ਅਸਾਂ ਮੁਬਾਰਿਕ
  ਨਾਲ ਬਹਿਸ਼ਤੀ ਖੜਨਾ
  ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ !
  
  ਸੱਜਣ ਜੀ,
  ਭਲਾ ਕਿਸ ਲਈ ਜੀਣਾ
  ਸਾਡੇ ਜਿਹਾਂ ਨਿਕਰਮਾਂ
  ਸੂਤਕ ਰੁੱਤ ਤੋਂ
  ਜੋਬਨ ਰੁੱਤ ਤਕ
  ਜਿਨ੍ਹਾਂ ਹੰਢਾਈਆਂ ਸ਼ਰਮਾਂ
  ਨਿੱਤ ਲੱਜਿਆਂ ਦੀਆਂ ਜੰਮਣ-ਪੀੜਾਂ
  ਅਣਚਾਹਿਆਂ ਵੀ ਜਰਨਾ
  ਨਿੱਤ ਕਿਸੇ ਦੇਹ ਵਿਚ
  ਫੁੱਲ ਬਣ ਖਿੜਨਾ
  ਨਿੱਤ ਤਾਰਾ ਬਣ ਚੜ੍ਹਨਾ
  ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ !
  
  ਸੱਜਣ ਜੀ,
  ਪਏ ਸਭ ਜਗ ਤਾਈਂ
  ਗਰਭ ਜੂਨ ਵਿਚ ਮਰਨਾ
  ਜੰਮਣੋ ਪਹਿਲਾਂ ਔਧ ਹੰਢਾਈਏ
  ਫੇਰ ਹੰਢਾਈਏ ਸ਼ਰਮਾਂ
  ਮਰ ਕੇ ਕਰੀਏ,
  ਇਕ ਦੂਜੇ ਦੀ
  ਮਿੱਟੀ ਦੀ ਪਰਕਰਮਾ
  ਪਰ ਜੇ ਮਿੱਟੀ ਵੀ ਮਰ ਜਾਏ
  ਤਾਂ ਜੀਉ ਕੇ ਕੀ ਕਰਨਾ?
  
  ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ
  ਤੁਰ ਜਾਣਾ ਅਸਾਂ ਭਰੇ ਭਰਾਏ
  ਹਿਜਰ ਤੇਰੇ ਦੀ ਕਰ ਪਰਕਰਮਾ
  ਅਸਾਂ ਤਾਂ ਜੋਬਨ ਰੁੱਤੇ ਮਰਨਾ !
• ( ਸ਼ਿਵ ਕੁਮਾਰ ਬਟਾਲਵੀ ਜੀ ਦੀ ਅਮਰ ਰਚਨਾ )

ਬਹੁਤ ਹੀ ਵਧੀਆ ਰਚਨਾ ਸ਼ਿਵ ਸਾਹਿਬ ਦੀ..ਰੂ-ਬ-ਰੂ ਕਰਨ ਲਈ ਸ਼ੁਕਰੀਆ ਨੈਬ ਵੀਰ ਜੀ...

ਆਪ ਜੀ ਜੇਕਰ ਹੋਰ ਰਚਨਾਵਾਂ ਸ਼ਿਵ ਸਾਹਿਬ ਦੀਆਂ ਸਾਂਝੀਆਂ ਕਰਨੀਆਂ ਚਾਹੁੰਦੇ ਹੋਂ ਤਾ ਕਿਰਪਾ ਕਰਕੇ ਹੇਠ ਪਾਏ ਲਿੰਕ ਦੇ ਅੰਦਰ ਸਾਂਝੀਆਂ ਕਰ ਸਕਦੇ ਹੋ,

http://punjabizm.com/forums-birha-tu-sultan-shiv-kumar-batalvi-2595-1-1.html

ਕਿਉਕਿ ਇਕੋ ਲਿੰਕ ਦੇ ਹੇਠ ਸਾਂਝੀ ਕਰਨ ਨਾਲ ਕਿਸੇ ਵੀ ਸ਼ਿਵ ਸਾਹਿਬ ਦੇ ਚਹੇਤੇ ਨੂੰ ਰਚਨਾਵਾਂ ਆਸਾਨੀ ਨਾਲ ਮਿਲ ਸਕਣਗੀਆਂ..ਆਸ ਹੈ ਮੇਰਾ ਕਿਹਾ ਤੁਸੀ ਸਮਝ ਗਏ ਹੋਵੋਗੇ ਵੀਰ ਜੀ.

ਜਾਣਕਾਰੀ ਲਈ ਧੰਨਵਾਦ ਜੀ

thanx for sharing.