********************************************
ਕਲਮ ਉਦਾਸ ਏ ਅੱਜ,
ਕਿਤੇ ਸਿਆਹੀ ਨੇ ਆਪਣਾ ਰੰਗ...
ਮਨੁੱਖਤਾ ਦੇ ਰੰਗ ਵਾਂਗ ਵਟਾ ਤੇ ਨਹੀ ਲਿਆ,
ਜਾਂ ...
ਕਿਧਰੇ ਧਰਤੀ ਦੀ ਹਿੱਕ ਅੰਦਰ,
ਉੱਬਲਦੀ ਤਪਸ਼ ਦੇ ਕਾਰਣ.. .
ਕਾਗਜ਼ ਤੇ ਭਸਮਾ ਨਹੀ ਗਿਆ ||
ਪੌਣਾਂ ਦੀ ਉਦਾਸੀ ਦੱਸਦੀ ਏ,
ਸ਼ਾਇਦ ਸੁਨੇਹਾ ਲੱਗ ਗਿਆ ਹੋਣੈ...
ਜ਼ਹਿਰੀਲੀਆਂ ਹਵਾਵਾਂ ਥੀਂ ,
ਜਾਂ ...
ਪਵਿੱਤਰ ਤੋਂ ਅਪਵਿੱਤਰ ਹੋਈ ...
ਗੰਗਾਂ ਦੀਆ ਆਹਾਂ ਥੀਂ ||
ਖਾਮੋਸ਼ੀ ਬੁਝਾਰਤ ਨਹੀ ਇੰਦਰ ਦੇਵਤਾ ਦੀ,
ਕਰੋਧਿਤਾ ਹੋਣੀ ਏ ...
ਲੱਕੜ੍ਹਹਾਰੇ ਦੀ ਕੁਹਾੜੀ ਤੇ ...
ਜਾਂ ...
ਸ਼ਰੇਆਮ ਜੰਗਲਾਂ ‘ਤੇ ਚਲਦੀ ਆਰੀ ਤੇ ||
ਪਾਣੀ ਦੀਆਂ ਲਹਿਰਾਂ ‘ਚ ਵੀ ਕਸਕ ਏ,
ਕਿਤੇ ਧਰਤੀ ਦੇ ਸੀਨੇ ‘ਚ ਸਿੰਜੇ ਜ਼ਹਿਰ ਦੀ...
ਕਨਸੋਅ ਤਾਂ ਨਹੀ ਪੈ ਗਈ ਇਹਨੂੰ,
ਜਾਂ ...
ਜ਼ਿੰਦਗੀ ਤੋਂ ਅੱਕੇ ਕਿਸੇ ਮਨੁੱਖ ਦੀ..
ਲਾਸ਼ ਤਾਂ ...
ਆਪਣੇ ਵਹਿਣ ‘ਚ ਵਹਾ ਨਹੀ ਲੈ ਗਈ ਇਹਨੂੰ ||
ਹਾਇ ! ਬਸੰਤਰ ਦਾ ਦੈਂਤ ਰੂਪ ‘ਚ ਆਉਣਾ ,
ਕਿਤੇ ਆਸਮਾਨ ਨੂੰ ਛੂੰਹਦੀ ਮਹਿਗਾਈ ਨਾਲ ...
ਲਪਟਾਂ ਦਾ ਕੋਈ ਮੁਕਾਬਲਾ ਤੇ ਨਹੀਂ ,
ਜਾਂ ...
ਫ਼ਿਰ ਆਪਣਾ ਈ ਘਰ ਫ਼ੂਕ ...
ਤਮਾਸ਼ਾ ਦੇਖਦਾ ਕੋਈ ਬਾਵਰਾ ਤੇ ਨਹੀ ||
********************************************
..........ਆਰਜ਼ੂ
੦੩/੦੧/੨੦੧੦
੦੨:੦੦:੦੦