ਮੇਰੇਂ ਆਪਣੇ ਗਰਾਈਆਂ ਵਿਚੋਂ ਸਤਿਕਾਰ ਦਿੱਤਾ ਸਭ ਨੇ,
ਹੁਣ ਹੋਲੀ-ਹੋਲੀ ਸਮੇ ਨਾਲ ਯਾਦ 'ਚੋ ਵਿਸਾਰ ਦਿੱਤਾ ਸਭ ਨੇ |
ਅੱਜ ਸੁੰਨਾ ਵੇਹੜਾ ਜੀਹਦਾ, ਕਦੇ ਕਿੰਨਾ ਮਕ਼ਬੂਲ ਹੁੰਦਾ ਸੀ
ਮੇਰਾ ਕੱਚੀ ਪਹਿਲੀ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ .......
ਰੇਹ ਵਾਲੀ ਬੋਰੀ ਦਾ ਸਿਓੰਤਾ ਬੈਗ ਮੋਢੇ ਲਟਕਾਉਂਦੇ ਸੀ,
ਫੱਟੀ ਫੜ ਹਥ 'ਚ ਸਕੂਲੇ ਅਸੀਂ ਚਾਈ-ਚਾਈ ਆਉਂਦੇ ਸੀ |
ਹੋ ਕੇ ਕੱਠੇ ਕਰਨੇ ਪਹਾੜੇ ਯਾਦ ਬੈਠ ਥੱਲੇ ਨਿੰਮ ਦੇ ,
ਜੇ ਅੱਜ ਭੁੱਲ ਜਾਈਏ ਓਹੋ ਦਿਨ ਤਾਂ ਕੀ ਏ ਪੱਲੇ ਨਿੰਮ ਦੇ |
ਭੁੱਲਣਾ ਨਹੀ ਕਿਸੇ ਨੂੰ ਵੀ ਸਾਡਾ ਉਦੋਂ ਤੋਂ ਅਸੂਲ ਹੁੰਦਾ ਸੀ
ਮੇਰਾ ਕੱਚੀ ਪਹਿਲੀ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ .......
ਜਾ ਕੇ ਆਪੋ -ਆਪਣੀ ਕਲਾਸ ਵਿਚ ਤੱਪੜਾਂ ਤੇ ਬਹਿੰਦੇ ਸੀ ,
ਸੋਹਣੇ - ਸੋਹਣੇ ਪੂਰਨੇ ਪਵਾਕੇ ਫਿਰ ਫੱਟੀ ਲਿਖ ਲੈਂਦੇ ਸੀ |
ਬੇਲੀਆਂ ਨਾਲ ਸਿਆਹੀ ਦੀ ਦਵਾਤ ਵਿਚ ਸਾਂਝਾ ਪਾ ਕੇ ਰਖੀਆਂ,
ਪੋਚ-ਪੋਚ ਗਾਚਣੀ ਨਾਲ ਧੁੱਪਾਂ 'ਚ ਸੁਕਾਉਂਦੇ ਅਸੀਂ ਫੱਟੀਆਂ |
ਚੂਰੀ ਕੁੱਟੀ ਲਿਆਉਂਦੇ ਘਰੋਂ ਨਾਂ ਖਰਚਾ ਫਜੂਲ ਹੁੰਦਾ ਸੀ
ਮੇਰਾ ਕੱਚੀ ਪਹਿਲੀ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ .......
ਬਹਿ ਕੇ ਖਾਣਾ ਦਲੀਆ ਸ਼ਰੀਹ ਦੀਆਂ ਫਲੀਆਂ ਦੇ ਨਾਲ ਬਈ,
ਖੇਡਦੇ ਸੀ ਖੋਹ -ਖੋਹ , ਸ਼ੇਰ -ਬੱਕਰੀ ਤੇ ਚਕਨਾ ਰੁਮਾਲ ਬਈ |
ਫੜ ਦਾਹੜੀ ਬੋਹੜ ਦੀ ਅੱਧੀ ਛੁੱਟੀ ਝੂਟੈ ਬੜੈ ਲੈਦੇਂ ਸੀ,
ਸਾਰੀ ਛੁੱਟੀ ਪਾ ਰੌਲਾ ਨੰਗੇ ਪੈਰੀ ਘਰ ਭੱਜ ਆਉਂਦੇ ਸੀ |
ਵੱਜ ਜਾਂਦੀ ਘੰਟੀ ਜਦੋਂ ਫਿਰ ਨਹੀਓਂ ਰੁਕਨਾ ਕਬੂਲ ਹੁੰਦਾ ਸੀ
ਮੇਰਾ ਕੱਚੀ ਪਹਿਲੀ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ .......
ਮਾਂ ਨੇ ਮੱਥਾ ਚੁੰਮ ਕੇ ਸਕੂਲ ਜਦੋਂ ਪਹਲੀ ਵਾਰੀ ਤੋਰਿਆ ,
ਕਾਸ਼ ! ਕਿਤੇ ਫਿਰ ਮੁੜ ਆਵੇ ਓਹੋ ਦਿਨ ਜ਼ਿੰਗਦੀ 'ਚੋ ਮੋੜਿਆ |
ਗੁੱਲੀ-ਡੰਡਾ ਖੇਡਾਂ ਫਿਰ ਪਿੜਾਂ ਵਿਚ ਜਾ ਕੇ ਦਿਲ ਬੜਾ ਲੋਚਦਾ ,
ਛੱਡ ਕੇ ਝਮੇਲੇ ਸਾਰੇ ਮੁੜ ਜਾਵਾਂ ਪਿੰਡ ਰਵਾਂ ਨਿਤ ਸੋਚਦਾ |
ਸੀਨੇ ਡੰਗ ਮਾਰਦਾ ਮਾਹੋਲ ਸ਼ਹਿਰੀ ਜੋ ਕਦੇ ਅਨੁਕੂਲ ਹੁੰਦਾ ਸੀ
ਮੇਰਾ ਕੱਚੀ ਪਹਿਲੀ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ
ਮੇਰਾ ਪਿੰਡ ਵਾਲਾ ਐਹੋ ਜਾ ਸਕੂਲ ਹੁੰਦਾ ਸੀ.............
************* ਅਮਨ ਫੱਲੜ *************
