ਹਾਂ ਬਈ ਮਿੱਤਰ ਪਿਆਰਿਉ ਇੱਕ ਵਾਰ ਫਿਰ ਹਾਜ਼ਿਰ ਹਾਂ ਆਪਣੀ ਟੁੱਟੀ-ਫੁੱਟੀ ਰਚਨਾ ਲੈਕੇ.....
ਕ੍ਰਿਪਾ ਕਰਕੇ ਮੈਨੂੰ ਮੇਰੀਆਂ ਖਾਮੀਆਂ ਵਾਰੇ ਜਰੂਰ ਦੱਸਣਾ ਤਾਂ ਕਿ ਮੈਂ ਅਗਲੀ ਵਾਰ ਧਿਆਨ ਰੱਖ ਸਕਾਂ....
ਨਵਾਂ ਸਾਲ ਏਹੇ ਸਾਰੀ ਦੁਨੀਆਂ ਲਈ ਚੰਗਾ ਚੜ੍ਹੇ |
ਰਲ-ਮਿਲ ਰਹਿਣ ਸਾਰੇ ਕੋਈ ਨਾ ਕਿਸੇ ਨਾਲ ਲੜ੍ਹੇ |
ਅਮਨਾਂ ਦਾ ਦੇਵੇ ਜੋ ਸੰਦੇਸ਼ ਉਹ ਸੰਗੀਤ ਗੂੰਜੇ,
ਫੁੱਟ ਜਿਹੜੇ ਪਾਉਂਦੇ ਟੁੱਟ ਜਾਣ ਉਹ ਬਾਜੇ ਤੇ ਘੜੇ |
ਪੁੱਠਾ ਸਿੱਧਾ ਲਿਖਦੇ ਤੇ ਗਾਉਂਦੇ ਜਿਹੜੇ ਫੁਕਰੇ ਜਹੇ,
ਥੋੜੀ ਬਹੁਤੀ ਅਕਲ ਤਾਂ ਇਨ੍ਹਾਂ ਦੇ ਵੀ ਘਰੇ ਵੜ੍ਹੇ |
ਕਰਦੀ ਉਡੀਕਾਂ ਜਿਹੜੀ ਮਿਲਣੇ ਨੂੰ ਅਰਸੇ ਤੋਂ,
ਚੰਨ ਪ੍ਰਦੇਸੀ ਉਹਦੇ 'ਅੰਬਰਾਂ' 'ਤੇ ਆਣ ਚੜ੍ਹੇ |
ਮਾਪਿਆਂ ਦੇ ਲਾਡਲੇ ਜੋ ਅੱਖੀਆਂ ਤੋਂ ਦੂਰ ਰਹਿੰਦੇ,
ਉਹੋ ਪ੍ਰਦੇਸੀ ਪੁੱਤ ਏਸ ਸਾਲ ਫੇਰਾ ਪਾਉਣ ਘਰੇ |
ਵਹਿਮਾਂ ਅਤੇ ਭਰਮਾਂ 'ਚ ਫਸਿਆਂ ਨੂੰ ਸੋਝੀ ਆਜੇ,
ਅੰਧਕਾਰ ਦੂਰ ਹੋ ਜਾਏ ਗਿਆਨ ਦਾ ਸੂਰਜ ਚੜ੍ਹੇ |
ਧਰਮਾਂ ਦੇ ਠੇਕੇਦਾਰਾਂ ਨੂੰ ਵੀ ਥੋੜੀ ਮੱਤ ਆਜੇ,
ਹੋਵੇ ਨਾ ਕੋਈ ਵਿਧਵਾ ਤੇ ਨਾ ਕਿਸੇ ਦਾ ਪੁੱਤ ਮਰੇ |
ਰੱਬ ਦੇ ਤਾਂ ਯਾਰ ਮਲਕ ਭਾਗੋ ਜਿਹੇ ਸ਼ੁਰੂ ਤੋਂ ਹੀ,
ਆਵੇ ਕੋਈ ਸੂਰਾ 'ਭਾਈ ਲਾਲੋਆਂ' ਦੀ ਬਾਂਹ ਫੜ੍ਹੇ |
ਮਾਣ ਲਈ ਏ ਗਾਂਧੀਵਾਦੀ ਸੋਚ ਲੋਕਾਂ ਬੜੀ ਦੇਰ,
ਹੁਣ 'ਭਗਤ' ਦੀ ਸੋਚ ਵਾਲਾ ਝੰਡਾ ਲਾਲ ਕਿਲੇ ਚੜ੍ਹੇ |
ਪਿਆਰ ਹੀ ਪਿਆਰ ਦਿਸੇ ਹਰ ਪਾਸੇ ਲੋਕਾਂ ਵਿੱਚ,
ਨਫਰਤਾਂ ਦਾ ਬੂਟਾ ਹੁਣ ਆਪਣੀ ਹੀ ਮੌਤ ਮਰੇ |
ਪਿਛਲੇ ਦਾ ਲੇਖਾ ਜੋਖਾ ਕਰਕੇ ਕੀ ਲੈਣਾ "ਸੰਧੂ",
ਨਵਾਂ ਇਹ ਸਾਲ ਸਾਰੀ ਦੁਨੀਆਂ ਲਈ ਚੰਗਾ ਚੜ੍ਹੇ |
ਬਲਿਹਾਰ ਸੰਧੂ
ਮੈਲਬੋਰਨ - ਅਸਟਰੇਲੀਆ
31/12/2012