ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ
ਕਾਲ ਪੈਣ ਦਾ ਖ਼ਦਸ਼ਾ ਹੋਇਆ ਸ਼ੁੱਧ ਹਵਾਵਾਂ ਦਾ

ਨਾੜ ਹਟੇ ਨਾ ਕਣਕ, ਪਰਾਲੀ ਦਾ ਜੇ ਫੂਕਣ ਤੋਂ
ਰੱਬ ਵੀ ਮੁਕਤ ਨਾ, ਕਰ ਸਕਦਾ ਸਾਨੂੰ ਪ੍ਰਦੂਸ਼ਣ ਤੋਂ
ਹੱਥੀਂ ਖ਼ੁਦ ਗਲ ਘੁੱਟ ਰਹੇ ਹਾਂ ਆਪਣੇ ਚਾਵਾਂ ਦਾ
ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ

ਫੈਕਟਰੀਆਂ ਦਾ ਧੂਆਂ, ਪਰਤ ਓਜ਼ੋਨ ਉਜਾੜ ਰਿਹਾ
ਰੁੱਖ ਵੱਢ ਬੰਦਾ ਪੈਰੀਂ, ਆਪ ਕੁਹਾੜਾ ਮਾਰ ਰਿਹਾ
ਆਪਣੀ ਖ਼ਾਤਿਰ ਜਾਲ, ਬੁਣ ਰਿਹਾ ਆਪ ਬਲਾਵਾਂ ਦਾ
ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ

ਜੋ ਜ਼ਹਿਰੀਲਾ ਪਾਣੀ, ਵਿੱਚ ਦਰਿਆਵਾਂ ਪਾ ਰਹੇ ਹਾਂ
ਕੈਂਸਰ ਜਿਹੀ ਬਿਮਾਰੀ, ਸੱਦਾ ਭੇਜ ਬੁਲਾ ਰਹੇ ਹਾਂ
ਦੁੱਖ ਡਾਢਾ ਝੰਗ, ਬੇਲੇ, ਝਿੜੀਆਂ ਉੱਜੜੀਆਂ ਥਾਵਾਂ ਦਾ
ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ

ਸ਼ੁੱਧ ਹਵਾ, ਸ਼ੁੱਧ ਪਾਣੀ, ਸਾਡੀਆਂ ਜੀਵਨ ਲੋੜਾਂ ਨੇ
ਇਨ੍ਹਾਂ ਬਾਝੋਂ ਸਭ ਕੁਝ, ਹੁੰਦਿਆਂ ਵੀ ਸਭ ਥੋੜਾਂ ਨੇ
ਹਰ ਦੋਸ਼ੀ ਨੂੰ ਹੁਕਮ ਸੁਣਾਓ, ਸਖ਼ਤ ਸਜ਼ਾਵਾਂ ਦਾ
ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ

ਕੁਝ ਚਿੰਬੜੋ ਸਰਕਾਰਾਂ ਨੂੰ, ਕੁਝ ਹੰਭਲਾ ਖ਼ੁਦ ਮਾਰੋ
‘ਹਸਮੁਖ’ ਮਸਲਾ ਹਰ ਹੀਲੇ, ਹੱਲ ਕਰਨਾ ਪਊ ਯਾਰੋ
ਸੀਚੇਵਾਲ ਦੇ ਵਾਂਗੂ ਮੋੜੋ ਰੁਖ਼ ਹਵਾਵਾਂ ਦਾ
ਦੂਸ਼ਿਤ ਹੋ ਗਿਆ ਪਾਣੀ ਲੋਕੋ ਪੰਜ ਦਰਿਆਵਾਂ ਦਾ

ਜੈਲਦਾਰ ਸਿੰਘ ਹਸਮੁਖ
ਮੋਬਾਈਲ:96465-94294

ਸਚੀ ਗੱਲ ਹੈ ਬਿੱਟੂ ਜੀ ....ਇਹ ਬਹੁਤ ਵਡੀ ਸਮਸਿਆ ਹੈ....ਕਈ ਮਹਾਨ ਹਸਤਿਆ ਲਗਿਆਂ ਹੋਇਆਂ ਨੇ ਇਸ ਮੁਦੇ ਦਾ ਹੱਲ ਲਭਣ ਲਈ...ਜਿਵੇ ਕੀ ਸੰਤ ਸਿੰਚੇਵਾਲਾ ਜੀ ....ਦੇਖੋ ਕੀ ਬਣਦਾ ਹੁਣ ਅੱਗੇ...ਸਾਨੂ ਸਾਰਿਆ ਨੂ ਵੀ ਇਸ ਗੰਭੀਰ ਮੁਦੇ ਤੇ ਮਿਲਕੇ  ਯੋਗਦਾਨ ਕਰਨਾ ਚਾਹਿਦਾ ਹੈ .........

ਬਹੁਤ ਹੀ ਸੋਹਣੀ ਤੇ ਮਾਰਗ ਦਰਸ਼ਾਉਣ ਵਾਲੀ ਰਚਨਾ ਹੈ....ਅੱਜ ਜੋ ਹਾਲਤ ਬਣਦੇ ਜਾ ਰਹੇ ਨੇ ਇਸ ਤੋ ਇਹ ਅੰਦਾਜ਼ਾ ਹੀ ਲਗਾਇਆ ਜਾ ਸਕਦਾ ਹੈ ਕਿ ਸਾਡਾ ਭਵਿਖ ਕਿੰਨਾ ਹਨੇਰੇ ਵਿਚ ਜਾ ਰਿਹਾ ਹੈ ਸੋ ਇਸ ਲਈ ਸਾਨੂ ਹੁਣ ਮੁੜ ਚੇਤਨ ਹੋ ਜਾਣਾ ਚਾਹਿਦਾ ਹੈ...ਸਾਂਝਾ ਕਰਨ ਲਈ ਬਹੁਤ ਬਹੁਤ ਸ਼ੁਕਰੀਆ...!!!

THANKS FOR SHAIRING