ਸਹੀ ਈ ਤਾਂ ਹੈ
ਕੁੜੀਆਂ ਪੱਥਰ ਹੀ ਹੁੰਦੀਆਂ |
ਹਰ ਧੀ ਦੀ ਮਾਂ

ਪੱਥਰ ਹੀ ਜੰਮਦੀ ਐ |

ਕਿਉਂ ਜੋ
ਜੰਮਦੇ ਸਾਰ ਤਿਰਸਕਾਰ

ਇੱਕ ਪੱਥਰ ਹੀ ਸਹਾਰ ਸਕਦੈ |

ਕਿਉਂ ਜੋ
ਇੱਕ ਪੱਥਰ ਹੀ ਸਹਿ ਸਕਦੈ
ਸਮਾਜ ਦੀ ਨਫ਼ਰਤ |

ਇੱਕ ਪੱਥਰ ਹੀ ਕੱਟ ਸਕਦੈ
ਇਹੋ ਜਿਹੀ ਜਿੰਦਗੀ
ਜਿਹਦਾ ਹਰ ਇੱਕ ਪਲ
ਅਨਜਾਣੇ ਖੌਫ਼ ਚ ਗੁਜ਼ਰਦਾ ਹੋਵੇ |

ਮਧੋਲੇ ਜਾਣ ਤੋਂ ਬਾਅਦ ਵੀ
ਜਿਉਂਦੇ ਰਹਿਣ ਦੀ ਤਾਕਤ
ਇੱਕ ਪੱਥਰ ਹੀ ਰੱਖਦੈ |

ਤੇਜ਼ਾਬ ਦੀਆਂ ਬੌਛਾਰਾਂ
ਮੂੰਹ ਉੱਤੇ ਖਾ
ਇੱਕ ਪੱਥਰ ਹੀ ਜੇਰਾ ਕਰ ਸਕਦੈ
ਦੁਬਾਰਾ ਅੱਗੇ ਵਧਣ ਦਾ |

ਆਪਣੇ ਹੀ ਭਰਾ ਵੱਲੋ
ਕੀਤੇ ਸ਼ਰੀਰਕ ਸੋਸ਼ਣ ਦਾ ਦਰਦ
ਇੱਕ ਪੱਥਰ ਹੀ ਸਹਿ ਸਕਦੈ |

ਘਰੋਂ ਬਾਹਰ ਨਿੱਕਲਦਿਆਂ
ਹਜ਼ਾਰਾਂ ਘੂਰਦੀਆਂ ਅੱਖਾਂ ਨੂੰ
ਇੱਕ ਪੱਥਰ ਹੀ ਚੀਰ ਕੇ ਅੱਗੇ ਲੰਘ ਸਕਦੈ |

ਇੱਕ ਪੱਥਰ ਹੀ ਬਲ ਰੱਖਦਾ ਐ
ਕਿਸੇ ਸੀਟੀ ਦਾ ਜਵਾਬ
ਕਿਸੇ ਚਪੇੜ ਨਾਲ ਦੇਣ ਦਾ |

ਇੱਕ ਪੱਥਰ ਹੀ ਹੁੰਦੈ
ਜੋ 5 ਸਾਲ ਦੀ ਉਮਰ ਚ
ਇੱਕ ਬਲਾਤਕਾਰ ਸਹਿ ਲੈਂਦੈ |

ਇੱਕ ਪੱਥਰ ਹੀ ਹੁੰਦੈ
ਜੋ ਆਪਣਿਆਂ ਅੰਗਾਂ ਤੇ
ਚਾਕੂਆਂ ਦਾ ਵਾਰ ਸਹਿ ਕੇ ਵੀ
ਜਿਉਣ ਦੀ ਚਾਹ ਰੱਖਦੈ |

ਅੱਤ ਦਰਜੇ ਚੰਗਾ ਐ ਪੱਥਰ
ਕਿਸੇ ਮਰਦ ਤੋਂ
ਕਿਸੇ ਸਰਕਾਰ ਤੋਂ
ਕਿਸੇ ਰੱਬ ਤੋਂ

ਜਿਹੜਾ ਐਨਾ ਕੁਝ ਸਹਿ ਕੇ ਵੀ
ਜਿਉਣਾ ਲੋਚਦੈ |

ਪੱਥਰ ਇੰਨੇ ਚਿਰ ਈ ਪੱਥਰ ਐ
ਜਿੰਨਾ ਚਿਰ ਅਡੋਲ ਤੇ ਸ਼ਾਂਤ ਪਿਆ ਹੁੰਦੈ |
ਜਦੋਂ ਹੰਭ  ਕੇ ਜ਼ਾਲਮਾਂ ਦੇ ਮੱਥੇ ਚ ਵੱਜੇ
ਤਾਂ ਪੱਥਰ ਵੀ
ਜਾਨਲੇਵਾ ਹਥਿਆਰ ਬਣ ਜਾਂਦੈ |

ਹੁਣ ਵਕ਼ਤ ਆ ਗਿਆ ਐ
ਕਿ ਆਪਣੇ ਪੱਥਰ ਹੋਣ ਤੇ
ਸ਼ਰਮ ਨਹੀਂ , ਮਾਣ ਕੀਤਾ ਜਾਵੇ |
ਤੇ ਮਾੜਿਆਂ ਦੇ ਮੱਥੇ ਵੱਜ
ਇਹਨਾਂ ਨੂੰ ਛਲਣੀ ਕੀਤਾ ਜਾਵੇ |
ਵੱਜਿਆ ਤਾਂ ਕੱਚ ਈ ਬਥੇਰਾ ਹੁੰਦੈ
ਕੁੜੀਆਂ ਤਾਂ ਫੇਰ ਪੱਥਰ ਨੇ |

- ਹਰਜੋਤ -

ਹਰਜੋਤ ਜੀ - ਸ਼ੁਕਰੀਆ, ਇਸ ਤਰਾਂ ਦੀ ਜੋਤ ਹਰ ਦਿਲ ਵਿਚ ਇਸ ਕਿਰਤ ਰਾਹੀਂ ਜਗਾਉਣ ਦਾ ਉਪਰਾਲਾ ਕਰਨ ਲਈ | ਮੈਂ ਤਾ ਪਹਿਲਾਂ ਹੀ ਇਸ ਗੱਲ ਦਾ ਕਾਇਲ ਹਾਂ ਕਿ ਕੁੜੀਆਂ ਕਿਸੇ ਤੋਂ ਘੱਟ ਨਹੀਂ |

ਔਰ ਬਿੱਟੂ ਬਾਈ ਜੀ, ਆਪ ਜੀ ਦਾ ਵੀ ਬਹੁਤ ਬਹੁਤ ਸ਼ੁਕਰੀਆ ! ਆਪ ਜਤਨ ਕਰਕੇ ਸੋਹਣੇ ਸੋਹਣੇ ਮੋਤੀ ਚੁਗ ਕੇ ਲਿਆਉਂਦੇ ਹੋ ਅਤੇ ਉਸ ਫੋਰਮ ਤੇ ਅਪਲੋਡ ਕਰਦੇ ਹੋ ਜਿੱਥੇ ਆਪ ਜੀ ਨੂੰ ਐਸੀਆਂ ਚੀਜ਼ਾਂ ਦੀ ਕਦਰ ਹੋਣ ਦੀ ਉੰਮੀਦ ਹੈ | ਆਸ ਹੈ ਅਤੇ ਅਰਦਾਸ ਹੈ ਕਿ ਆਪ ਜੀ ਦੀ ਉੰਮੀਦ ਨੂੰ ਫਲ ਪਵੇ |

ਰੱਬ ਰਾਖਾ 

 ਅੱਜ ਮੈਨੂ ਮਾਨ ਹੈ ਪਥਰ ਹੋਣ ਤੇ . . . 

Thanx ਬਿੱਟੂ ji thanx for sharing