ਰਿਚਮੰਡ, ਬਰਨਵੀ ਕੋਲੋ ਕੋਲੀ
ਨੇੜੇ ਵੈਨਕੂਵਰ ਲੱਗੇ,
ਸਰ੍ਹੀ ਡੈਲਟਾ ਸਕਾਟ ਰੋਡ ਕੱਟਦੀ
ਨੇੜੇ ਦਰਿਆ ਫਰੇਜਰ ਵੱਗੇ,
ਐਬੋਟਸਫੋਰਡ ਤੇ ਚਿਲਾਵੈੱਕ ਦੂਰ ਸੁਣੀਂਦੇ
ਪੰਜਾਬੀ ਓਹਤੋਂ ਵਸਦੇ ਅੱਗੇ,
ਇਹ ਭੌਂ ਸਾਡੇ ਕਰਮਾਂ ਦੀ
ਹੁਣ ਪੰਜਾਬਣ ਲੱਗੇ…
****
ਪਹਾੜਾਂ ‘ਚੋਂ ਚੜ੍ਹਦਾ ਸੂਰਜ
ਡੁੱਬੇ ਸਮੁੰਦਰੀਂ ਜਾ ਕੇ,
ਦੂਜਾ ਪੰਜਾਬ ਇੱਥੇ ਵੱਸਦਾ
ਦੇਖ ਲਿਆ ਵੈਨਕੂਵਰ ਆ ਕੇ,
ਪਿਆਰ ਦਿਆ ਬੱਦਲਾ ਵੇ
ਫਟ ਜਾ ਕੈਨੇਡਾ ਆ ਕੇ
****
ਕੈਨੇਡਾ ਆ ਕੇ ਲਾਇਸੈਂਸ ਲੈ ਲਿਆ
ਧਿਆਨਾ ਬੁੜਾ ਕਾਰ ਚਲਾਵੇ,
ਕੱਚਾ ਲਾਇਸੈਂਸ ਧੰਨੋ ਦਾ ਲੈ ‘ਤਾ
ਪੰਜਾਬੀ ‘ਚ ਕੰਪਿਊਟਰ ਚਲਾ ਕੇ,
ਬੁੜਾ, ਬੁੜੀ ਨੂੰ ਲੈਸਨ ਦੇਵੇ
ਸਟੇਰਿੰਗ ‘ਤੇ ਬਰੋਬਰ ਬਹਾ ਕੇ,
ਤੂੰ-ਤੂੰ, ਮੈਂ-ਮੈਂ ਹੋਗੀ ਮਿੱਤਰੋ
ਬੁੜੀ ਕਹੇ ਖਸਮਾਂ ਨੂੰ ਸਿਆਪਾ ਖਾਵੇ,
ਹਾਈ ਵੇਅ ਚੜ੍ਹ ਕੇ ਲਾ ਲਿਆ ਜੱਫਾ
ਕਿਹੜਾ ਆਣ ਛੁਡਾਵੇ,
ਅੰਬੋ ਸਿੱਖਦੀ ਨਾ
ਬਾਬਾ ਕੁੱਟ ਕੇ ਕਾਰ ਸਿਖਾਵੇ…
****
ਉੱਚਾ ਬੁਰਜ ਬਰੋਬਰ ਮੋਰੀ
ਦੀਵਾ ਵਿੱਚ ਬਣਾ ਕੇ ਧਰਿਆ,
ਕੈਨੇਡੀਅਨ ਲੰਗੜਾ ਮੁੰਡਾ
ਪੰਜਾਬਣ ਮਲਮਲ ਵਰਗੀ ਵਰਿਆ,
ਹਵਾਈ ਅੱਡੇ ਤੋਂ ਭੱਜੀ ਪੰਜਾਬਣ
ਰਹਿ ਗਿਆ ਹੱਥ ‘ਚ ‘ਬੁੱਕਾ’ ਫੜਿਆ
ਵੇ ਜੋੜੀਆਂ ਬਣਾਈਂ ਬਾਬਲਾ
ਨਰੜ ਨਾ ਜਾਵੇ ਜਰਿਆ…
****
ਵੈਨਕੂਵਰ ਪਹੁੰਚੀ ਵਹੁਟੀ
ਆ ਕੇ ਪਾ ਲਿਆ ਝੱਜੂ,
911 ਹੁਣੇ ਘੁਮਾਵਾਂ
ਕਿੱਧਰ ਲਾੜਾ ਭੱਜੂ,
ਕਦੇ ਨਾ ਵਰਸੂਗਾ
ਜਿਹੜਾ ਗੜ-ਗੜ ਗੱਜੂ….
****
ਇੰਡੀਆ ਆਲ਼ੀ ਆਦਤ ਨਾ ਜਾਵੇ
ਨਜ਼ਾਰਾ ਆਉਂਦਾ ਪੁੱਠੇ ਕੰਮ ਕਰਕੇ,
ਲਾਲ ਬੱਤੀ ‘ਚੋਂ ਗੱਡੀ ਕੱਢਤੀ
ਐਕਸੀਡੈਂਟ ਬਹਿ ਗਿਆ ਕਰਕੇ,
ਮਗਰੋਂ ਆ ਗਿਆ ਪੁਲਸੀਆ
ਠਾਣੇ ਲੈ ਗਿਆ ਫੜ ਕੇ,
ਨੀਂ ਛੁਡਾ ਲੈ ਵੈਰਨੇ
ਟੂੰਮਾਂ ਗਹਿਣੇ ਧਰ ਕੇ…
****
ਬੌਸ ਫੈਕਟਰੀ ਦਾ ਗੰਦਾ ਸੁਣੀਂਦਾ
ਟੇਡਾ-ਟੇਡਾ ਝਾਕੇ,
ਗਰੀਨ ਹਾਊਸ ਪਿੰਡਾ ਫੂਕਦੈ
ਜੌਬ ਲੱਭਾਂ ਕਿਹੜੇ ਪਾਸੇ,
ਲਾਲਚ ਡਾਲਰਾਂ ਦਾ
ਵੈਰੀ ਹੋਗੇ ਮਾਪੇ…
****
ਛੇ ਮਹੀਨਿਆਂ ਦਾ ਸਾਗ ਬਣਾਤਾ
ਧਰਤਾ ਫਰਿੱਜ ‘ਚ ਲਾ ਕੇ,
ਲੰਚ ਬਣਾਉਣ ਨੂੰ ਟਾਈਮ ਨ੍ਹੀਂ ਹੈਗਾ
ਖਾ ਲੀਂ ਪੀਜਾ ਲਿਆ ਕੇ,
ਤਾਜ਼ੀਆਂ ਖਾਂਦੇ ਸੀ
ਅੱਕ ਗਏ ਬੇਹੀਆਂ ਖਾ ਕੇ…
****
ਕੈਨੇਡਾ ਦੇ ਮੁੰਡੇ ਨਾਲ ਵਿਆਹ ਕਰਾ ਲਿਆ
ਮਾਪੇ ਝੱਟ-ਪੱਟੇ ਮੰਨੇ,
ਵਿੱਚ ਕੈਨੇਡਾ ਜਾ ਕੇ ਲੁਕ ਗਿਆ,
ਨਾ ਲਾਈ ਕਿਸੇ ਬੰਨੇ,
ਚਰ੍ਹੀ ਦੇ ਟਾਂਡਿਆਂ ਨੂੰ
ਸਮਝ ਬੈਠੀ ਸਾਂ ਗੰਨੇ…
-ਗੁਰਮੇਲ ਸਿੰਘ ਬੀਰੋਕੇ
ਮੋਬਾਈਲ: 001-604-825-8053
Email: gurmailbiroke@gmail.com
