.
ਤੱਤੀ-ਪੱਤੀ ਭੂਰ ਕਿਰੀ
ਛਾਲੇ ਪੈ ਜਾਣਗੇ
ਹੁਸਨਾਂ ਦੀ ਧੁੱਪ ਵਿੱਚ ਜ਼ਿੰਦ ਸੜ੍ਹ ਜਾਊਗੀ
ਭਰ ਦੇ ਪਿਆਲਾ ਸਾਕੀ
ਹੋਸ਼ ਝੜ ਜਾਣਗੇ
ਨਹੀਂ ਤਾਂ ਇਹ ਜ਼ਿੰਦਗੀ ਵੀਰਾਨੇ ਵੱਲ ਜਾਊਗੀ
ਛਪੇ ਹੋਏ ਸੋਹਣਿਆਂ ਦੇ
ਸੱਪ ਗੋਰੇ ਹੱਥਾਂ ਉੱਤੇ
ਮੱਥਿਆਂ ਤੇ ਤਿਉੜੀਆਂ ਦੇ ਨਗ਼ ਜਚੇ ਹੋਏ ਨੇ
ਨਿੱਕਲੇ ਨੇ ਪਿੰਡ ਵਿੱਚ
ਨੈਣਾਂ ਦੀ ਕਟਾਰ ਲੈ ਕੇ
ਚੋਬਰਾਂ ਦੇ ਦਿਲਾਂ ਦੇ ਪਰਿੰਦੇ ਫਸੇ ਹੋਏ ਨੇ
ਛੁਰੇ ਨਾਲ ਭੰਨ ਸਾਕੀ
ਬਰਫ਼ਾਂ ਦੀ ਪਾ ਡਲੀ
ਨਹੀਂ ਤਾਂ ਬਿਸ਼ੈਲੀ, ਸਿਰੀਂ, ਲੋਰ ਚੜ੍ਹ ਜਾਊਗੀ
ਵਾਢੀਆਂ ਦੇ ਦਿਨ ਲੰਘੇ
ਅਸ਼ਮਾਨੀ ਫੱਕ ਹੋਈ ਚੜ੍ਹੀ
ਚੜ੍ਹੀ ਹੋਈ ਸੋਹਣਿਓਂ ਤੇ ਇਹੋ ਜੀ ਹਨ੍ਹੇਰ ਹੈ,
ਜ਼ਹਿਰ ਨੂੰ ਸ਼ਰਾਬ
ਤੇ ਪਿਆਰ ਨੂੰ ਨੇ ਸ਼ਹਿਦ ਕਹਿੰਦੇ
ਰਾਤੀਂ ਉੱਠ ਬੋਲ ਪੈਂਦੇ ਚੜ੍ਹ ਗਈ ਸਵੇਰ ਹੈ,
ਫੜ ਹਾੜਾ ਨਜ਼ਰਾਂ ਦਾ
ਉਹਨਾਂ ਨੂੰ ਪਿਲਾ ਸਾਕੀ
ਨਹੀਂ ਤਾਂ ਇਹ ਦਰਿਆ -ਦਿਲੀ ਦੜ ਵੱਟ ਜਾਊਗੀ
ਤੁਰਦੇ ਨੇ ਸੜਕਾਂ ਤੇ
ਲੁੱਕ ਪਾਈ ਪਿਘਲ ਜਾਂਦੀ
ਟਿੱਚਰ -ਭਬੂਕਿਆਂ ਚੋਂ ਇਹ ਸੜ੍ਹ ਜਾਂਦੇ ਨੇ,
ਨੈਣ ਦੋ ਨੁਕੀਲੇ
ਨੋਕਾਂ ਲਾ ਕੇ ਕੱਢਦੇ ਨੇ
ਹਵਾ ਚੋਂ ਨਹੋਰਿਆਂ ਦੇ ਤੀਰ ਛੱਡ ਜਾਂਦੇ ਨੇ,
ਸ਼ਹਿਦ ਚ ਬਰਾਂਡੀ ਪਾਕੇ
ਥੋੜੀ ਜੀ ਹਿਲਾ ਸਾਕੀ,
ਸੋਹਣਿਆਂ ਦੇ ਗਲੇ ਚੋਂ ਖਟਾਸ ਮਰ ਜਾਊਗੀ
ਮਟਰਾਂ ਦੇ ਖੇਤ ਵਿੱਚ
ਤਿੱਤਲੀਆਂ ਉਡਾਉਂਦੇ
ਕਦੇ-ਕਦੇ ਮੱਥੇ ਉੱਤੋਂ ਜੁਲਫ਼ਾਂ ਹਟਾਉਂਦੇ ਨੇ,
ਪਿੰਡ ਵਿੱਚ ਆਸ਼ਕਾਂ ਦੇ
ਤੁਰੇ ਆਉਂਦੇ ਫਾਕੇ
ਇਸ਼ਕੇ ਦਾ ਚੋਗਾ ਇਹ ਕਬੂਤਰਾਂ ਨੂੰ ਪਾਉਂਦੇ ਨੇ
ਅਕ਼ਲਾਂ ਨੂੰ ਹੁਸਨਾਂ ਚੋਂ
ਕਿਸੇ ਤਰ੍ਹਾਂ ਮਿਲਾ ਸਾਕੀ
ਨਹੀਂ ਤਾਂ ਉਡਾਰੀ ਕਿਤੇ ਪਾਸਲੇ ਬਹਿ ਜਾਊਗੀ
ਨਸੀਹਤਾਂ,ਇਸ਼ਾਰਿਆਂ ਨੂੰ
ਦਿਲਾਸਾ ਜਿਹਾ ਦੱਸਦੇ ਨੇ
ਸਾਡੇ ਰੱਖੇ ਰੋਜ਼ਿਆਂ ਨੂੰ ਛਲਾਵਾ ਜਿਹਾ ਕਹਿੰਦੇ ਨੇ,
ਦੱਬਦੇ ਨਈਂ ਵਾਹਣਾਂ ਵਿਚ
ਜਵਾਨੀ ਦਾ ਏ ਜ਼ੋਰ ਏਨਾ
ਇਹ ਨਾਹਟ -ਗਿਆਰਾਂ ਤਵੀਆਂ ਅਠਾਰਾਂ ਖਿੱਚ ਲੈਂਦੇ ਨੇ,
ਗੇੜੀਆਂ ਦੇ ਜਾਮ ਖੁੱਲੇ
ਕਰਦੇ ਬੇਆਮ ਸਾਕੀ
ਕੁਆਰ-ਦਿਲੇ ਪੋਰਾਂ ਵਿੱਚ ਲਕੀਰ-ਬੀ ਇਹ ਪਾਊਗੀ,
ਪਿੰਡ ਦੀਆਂ ਬੀਹੀਆਂ ਚੋਂ
ਕਿਲਕਾਰੀਆਂ ਨੇ ਪੈਂਦੀਆਂ
ਲੱਗਦੇ ਹੈ ਸੋਹਣੇ ਅੱਜ ਜਿਆਦਾ ਪੀ ਬੈਠੇ ਨੇ,
ਉਂਗਲਾਂ ਚ ਪਾਏ ਹੋਏ
ਸਾਡੇ ਸੁੱਟੇ ਛੱਲੇ ਨੇ
ਗਲ੍ਹਾਂ ਵਿੱਚ ਗੁੰਦੇ ਹੋਏ ਸਾਡੇ ਵਾਲੇ ਕੈਂਠੇ ਨੇ,
ਤੋੜ ਦੇ ਤੂੰ ਤਾਲਾ ਝੱਟ
ਖ੍ਹੋਲ ਦੇ ਭੰਡਾਰਾ ਸਾਕੀ
ਭੱਤਿਆਂ ਦੀ ਥਾਂਵੇ ਅੱਜ ਲਾਲ -ਪਰੀ ਜਾਊਗੀ,
ਭਰ ਦੇ ਪਿਆਲਾ ਸਾਕੀ
ਹੋਸ਼ ਝੜ੍ਹ ਜਾਣਗੇ
ਨਹੀਂ ਤਾਂ ਇਹ ਜ਼ਿੰਦਗੀ ਵੀਰਾਨੇ ਵੱਲ ਜਾਊਗੀ
