ਹਾਇ...............ਹਾਇ.............।

ਮੇਰੇ ਦਿਲ ਦਾ ਦਰਦ ਵਧਦਾ ਹੀ ਜਾਏ।

ਤਬਾਹੀ ਦੇ ਆਸਾਰ ਨਜਰ ਆਵਣ ਲੱਗੇ

ਛਾਤੀ ਵਿੱਚ ਦਰਦ ਦੇ ਕੀੜੇ ਸਿਰ ਉਠਾਵਣ ਲੱਗੇ

ਰੁੱਸ ਚੱਲੀਆਂ ਮੇਰੇ ਨਾਲ ਸਾਹਾਂ ਦੀਆਂ ਲੜੀਆਂ

ਇੰਨਾਂ ਨੂੰ ਮਿੰਨਤਾਂ ਕੌਣ ਕਰਕੇ ਮਨਾਏ?

ਹਾਇ...............ਹਾਇ.............।

ਅੱਖਾਂ ਦੇ ਸਾਮ੍ਹਣੇ ਆਪਣਾ ਸਿਵਾ ਮੱਚਦਾ

ਲੋਹੜੀ ਸਮਝਕੇ ਮੈਂ ਤਿਲਾਂ ਦੀਆਂ ਮੁੱਠਾਂ ਸੁੱਟਦਾ

ਥੁੜ ਚੱਲੀਆਂ ਮੇਰੇ ਕੋਲ ਬਹਾਰਾਂ ਦੀਆਂ ਘੜੀਆਂ

ਰੁੱਠੜੇ ਸੱਜਣਾਂ ਨੂੰ ਕੌਣ ਮੋੜ ਲਿਆਏ?

ਹਾਇ...............ਹਾਇ.............।

ਮੇਰੇ ਹੂੰਗਰੇ ਦੇ ਨਾਲ ਸਭ ਟੁੱਟ ਗਈਆਂ ਯਾਰੀਆਂ

ਇੱਕ ਆਹ ਉੱਤੇ ਲੱਗਣ ਅਨੇਕ ਕਿਲਕਾਰੀਆਂ

ਸਰੀਰ ਤੋਂ ਵੀ ਪਹਿਲਾਂ ਹੱਡੀਆਂ ਰੂਹ ਦੀਆਂ ਸੜੀਆਂ

ਸੁਲ਼ਗਦੀ ਸਵਾਹ ਵਿੱਚੋਂ ਕੌਣ ਫ਼ੁੱਲ ਚੁਗਾਏ?

ਹਾਇ...............ਹਾਇ.............।

ਪੱਸਲ਼ੀ ਦੇ ਵਿੱਚੋਂ ਡਾਢੀ ਮਾਰੂ ਪੀੜ ਨਿੱਕਲਦੀ

ਏਸ ਜ਼ਿੰਦਗੀ ਦੀ ਜਾਪਦੀ ਦੁਪਹਿਰੀ ਢਲਦੀ

ਛਟਾਂਕ ਦੇ ਦਿਲ ਚ ਛੁਪੀਆਂ ਗ਼ਮਾਂ ਦੀਆਂ ਧੜੀਆਂ

ਰੁੜ੍ਹੀ ਜਾਂਦੀ ਉਮਰ ਨੂੰ ਕੌਣ ਟੁੱਭੀਮਾਰ ਬਚਾਏ?

ਹਾਇ...............ਹਾਇ.............।