ਸਜਣਾ ਵੇ
ਸਜਣਾ ਵੇ
ਸਾਨੂੰ ਲਗਾ ਦਰਦ ਅਨੋਖਾ
ਤੇਰੀ ਵਸਦੀ ਰਸਦੀ ਦੁਨੀਆਂ
ਦੇਣ ਲਗੀ ਸਾਨੂੰ ਧੋਖਾ
ਸਜਣਾ ਵੇ
ਸਾਨੂੰ ਉਡੀਕ ਦੀਆਂ ਰਾਤਾਂ ਪਈਆਂ
ਅਜੇ ਤਕ ਨਹੀਂ ਪਰਤ ਕੇ ਆਈਆਂ
ਸੰਝ ਦੀਆਂ ਜੋ ਗਈਆਂ
ਸਜਣਾ ਵੇ
ਅਸਾਂ ਨੈਣੀਂ ਕੰਵਲ ਖਿੜਾਏ
ਕਿਸਮਤ ਵੀ ਅਜ ਹੋਈ ਬਿਗਾਨੀ
ਹੁਣ ਸਾਨੂੰ ਕੌਣ ਮਿਲਾਏ
ਸਜਣਾ ਵੇ
ਸਾਡੇ ਹੜ੍ਹ ਗਮਾਂ ਦਾ ਆਇਆ
ਇਹ ਪੈਂਡਾ ਨਾ ਮੁੱਕਣ ਵਾਲਾ
ਰਾਹ ਵਿਚ ਕਿਸੇ ਮੁਕਾਇਆ
ਸਜਣਾ ਵੇ
ਅਜ ਜੰਮ ਦੁਆਲੇ ਹੋਇਆ
ਅੰਗ ਅੰਗ ਵਿਚ ਕੰਬਣੀ ਛਿੜ ਪਈ
ਜਦ ਆਣ ਕਿਸੇ ਨੇ ਛੋਹਿਆ
ਸਜਣਾ ਵੇ
ਸਾਡੇ ਦਿਲ ਦੇ ਚਾ ਕੁਆਰੇ
ਦੁਨੀਆਂ ਵੀ ਅਜ ਹੋਈ ਪਰਾਈ
ਮੁਕਦੇ ਜਾਣ ਨਜ਼ਾਰੇ
ਸਜਣਾ ਵੇ
ਅਜ ਸਧਰਾਂ ਲੰਮੀਆਂ ਹੋਈਆਂ
ਸੌ ਵਰ੍ਹਿਆਂ ਦੀਆਂ ਸੁਤੀਆਂ ਰੂਹਾਂ
ਵਿਚ ਕਬਰਾਂ ਦੇ ਰੋਈਆਂ