ਕੁਰਬਾਨੀ ਦੇ ਵਾਰਿਸਾਂ ਨੂੰ ਹੁਣ ਸਾਰ ਨਾ ਤੇਰੀ
ਤੇਰੀ ਰੱਤ ਦੇ ਬਾਗਾਂ ਵਿਚ ਗੁਲਜ਼ਾਰ ਨਾ ਤੇਰੀ
ਉਲਝ ਕਿਤੇ ਜਾ ਗੁਰਬਤ ਦੇ ਤੂਫਾਨਾਂ ਨਾਲ
ਕੰਢਾ ਕੰਢਾ ਵਰਜਿਤ ਹੈ, ਮੰਝਧਾਰ ਨਾ ਤੇਰੀ
ਸ਼ੀਸ਼ਿਆਂ ਵਿਚ ਨੁਮਾਇਸ਼ ਹੈ,ਧਨੀਆਂ ਦੇ ਹੱਥੀਂ
ਰੱਖੀ ਰੁਲਦੀ,ਲੋਕਾਂ ਲਈ ਤਲਵਾਰ ਨਾ ਤੇਰੀ
ਜੋਕਾਂ ਰਜ ਰਜ ਚੂਸ ਲਈ ਆਜ਼ਾਦੀ ਤੇਰੀ
ਛੱਡੀ ਇਕ ਤਸਵੀਰ ਤੀਕ ਰੰਗਦਾਰ ਨਾ ਤੇਰੀ
ਵਹੀਆਂ ਦੇ ਵਿਚ ਦਰਜ ਹੈ ਤੂੰ,ਤੇਰਾ ਘਰ ਵਾੜਾ
ਗਿਰਵੀ ਤੇਰੀ ਜਾਨ ਵੀ ਹੈ ਮੁਖਤਾਰ ਨਾ ਤੇਰੀ
ਔਸ਼ਧ ਖੂਨ-ਉਬਾਲ ਤੇਰਾ ਸ਼ਾਹਾਂ ਵਸ ਕੀਤੀ
ਮਜ਼ਦੂਰਾਂ ਦੇ ਰੋਗਾਂ ਨੂੰ ਗੁਣਕਾਰ ਨਾ ਤੇਰੀ
ਰਗ-ਰਗ ਦੇ ਵਿਚ ਵਗਦਾ ਲੇਕਿਨ ਚਿੱਟਾ ਹੋਇਆ
ਲੱਭਦੀ ਅੱਜ ਦੇ ਖੂਨ ਵਿਚੋਂ ਲਿਸ਼ਕਾਰ ਨਾ ਤੇਰੀ
ਕਹਿਣੇ ਨੂੰ ਜਮਹੂਰੀ ਹੈ ਸਭ ਤੰਤਰ ਤੇਰਾ
ਵੋਟ ਤਾਂ ਹੈ ,ਉਸ ਤੋਂ ਜੋ ਬਣੇ ਸਰਕਾਰ ਨਾ ਤੇਰੀ
---