ਸਿੱਖੀ ਦੀ ਗੱਲ

ਜਿਹਦੇ ਰਗ-ਰਗ ਵਿੱਚ ਕੁਰਬਾਨੀ ਐ
ਜਿਹਦਾ ਜੱਗ ਵਿੱਚ ਨਾ ਕੋਈ ਸਾਨੀ ਐ
ਜਿੱਥੇ ਹਰ ਕੋਈ ਸੀਸ ਦਾ ਦਾਨੀ ਐ
ਮੈ ਓਸ ਸਿੱਖੀ ਦੀ ਗੱਲ ਕਰਾਂ………..

ਜੋ ਮਜ਼ਲੂਮਾਂ ਲਈ ਲੜਦਾ ਹੈ
ਗਊ ਗਰੀਬ ਦੀ ਰਾਖੀ ਕਰਦਾ ਹੈ
ਜੋ ਅੜਦਾ ਉਹੀ ਝੜਦਾ ਹੈ
ਮੈ ਓਸ ਸਿੱਖੀ ਦੀ ਗੱਲ ਕਰਾਂ………..

ਜੋ ਸੂਰਵੀਰ ਅਖਵਾਉਦੇਂ ਨੇ
ਮੁੱਲ ਜੋ ਅਣਖਾਂ ਦਾ ਪਾਉਂਦੇ ਨੇ
ਦੁੱਖ ਓਪਰੇ ਆਪ ਹੰਢਾਉਂਦੇ ਨੇ
ਮੈ ਓਸ ਸਿੱਖੀ ਦੀ ਗੱਲ ਕਰਾਂ………..

ਛਕ ਅੰਮ੍ਰਿਤ ਗਿੱਦੜੋਂ ਸ਼ੇਰ ਬਣੇ
ਸਵਾ ਲੱਖ ਦੇ ਅੱਗੇ ਇੱਕ ਤਣੇ
ਪੁੱਟ ਦਿੰਦੇ ਵੈਰੀ ਨੂੰ ਜੜ੍ਹ ਸਣੇ
ਮੈਂ ਓਸ ਸਿੱਖੀ ਦੀ ਗੱਲ ਕਰਾਂ………..

ਜੋ ਪਰਿਵਾਰ ਵਾਰ ਕੇ ਸ਼ੁਕਰ ਕਰੇ
ਡਾਢੇ ਦੀ ਕਰਨੀ ਹੱਸ ਜ਼ਰੇ
ਰਹਿੰਦੇ ਜੱਗ ’ਤੇ ‘ਭੁੱਲਰਾ’ ਹਰੇ ਭਰੇ
ਮੈਂ ਓਸ ਸਿੱਖੀ ਦੀ ਗੱਲ ਕਰਾਂ………..

-ਯਾਦਵਿੰਦਰ ਸਿੰਘ ਭੁੱਲਰ