ਤੇਰਾ ਮਰ ਜਾਣਾ ਹੀ ਬੇਹਤਰ ਸੀ
ਜਿਹੜੀਆਂ ਮਜ਼ਬੂਰਨ ਨਹੀਂ ਮਰ ਸਕੀਆਂ
ਉਹ ਜਿਉਂਦਿਆਂ ਵਿੱਚ ਵੀ ਕਿੱਥੇ ਹਨ?
ਤੇਰਾ ਮਰ ਜਾਣਾ ਹੀ ਬੇਹਤਰ ਸੀ....
ਜੇ ਤੇਰੇ ਤੇ ਮੌਤ ਹਾਵੀ ਨਾ ਹੁੰਦੀ
ਭਾਰਤ ਦੀ ਨਿਆਂ ਪਾਲਿਕਾ ਨੇ
ਤੈਨੂੰ ਕਦਮ-ਕਦਮ ਤੇ ਮਰਨ ਲਈ
ਮਜ਼ਬੂਰ ਕਰ ਦੇਣਾ ਸੀ....।
ਬਹੁਤ ਕੁੱਝ ਸੁਲਝ ਗਿਆ ਹੈ
ਤੇਰੇ ਮਰ ਜਾਣ ਨਾਲ
ਪੁਲਿਸ ਦੀ ਤਫਤੀਸ਼ੀ ਖਤਮ ਹੋ ਗਈ ਹੈ
ਹਾਕਮ ਸੁੱਖ ਦੀ ਨੀਂਦ ਸੋਣ ਜੋਗੇ ਹੋ ਗਏ ਨੇ
ਮੋਮਬੱਤੀਆਂ ਮਾਯੂਸ ਹੋ ਗਈਆਂ ਹਨ
ਤੇ ਦਰਿੰਦੇ
ਹੋਣੀ ਕਬੂਲਣ ਦੇ ਸਮਰੱਥ ਹੋ ਗਏ ਨੇ...।
ਟੀਵੀ ਚੈੱਨਲਾਂ ਨੂੰ ਚਾਰ ਕੁ ਦਿਨਾਂ ਦੇ
ਮਹਿੰਗੇ ਇਸ਼ਤਿਹਾਰ ਮਿਲ ਗਏ ਹਨ
ਕਵੀਆਂ ਨੂੰ ਕਵਿਤਾ ਅਹੁੜ ਗਈ ਹੈ
ਬੁੱਧੀਜੀਵੀਆਂ ਨੂੰ ਚਰਚਾ ਦਾ ਵਿਸ਼ਾ ਮਿਲ ਗਿਆ ਹੈ
ਅਤੇ ਆਮ ਲੋਕਾਂ ਨੂੰ ਖਾਸ ਖਬਰ ਮਿਲ ਗਈ ਹੈ...।
ਤੇਰੀ ਮੌਤ
ਤੇਜ਼ੀ ਨਾਲ ਚਮਕਦੇ ਹੋਏ
ਭਾਰਤ ਦੀ ਮਹਾਨਤਾ ਤੇ
ਪ੍ਰਸ਼ਨ ਚਿੰਨ੍ਹ ਨਹੀਂ ਹੈ...
ਤੇਰੀ ਮੌਤ
ਨਿਆਂਪਾਲਿਕਾ ਦੀ ਭਰੋਸੇਯੋਗਤਾ ਤੇ
ਲਿਖਿਆ ਬੇਦਾਵਾ ਵੀ ਨਹੀਂ ਹੈ....
ਤੇਰੀ ਮੌਤ ਹਵਾ ਦਾ ਬੁੱਲ੍ਹਾ ਮਾਤਰ ਹੈ
ਜੋ ਆਇਆ
ਤੇ ਚਲਾ ਗਿਆ.......।
ਤਿਰੰਗਾ ਸ਼ਾਨ ਨਾਲ ਲਹਿਰਾ ਰਿਹਾ ਹੈ
ਨਵੇਂ ਸਾਲ ਦੇ ਜਸ਼ਨ ਮਨਾਉਣ ਦੀਆਂ ਤਿਆਰੀਆਂ
ਪੂਰੇ ਜੋਸ਼ੋ-ਖਰੋਸ਼ ਨਾਲ ਕੀਤੀਆਂ ਜਾ ਰਹੀਆਂ ਨੇ
ਕੈਟਰੀਨਾ ਕੈਫ ਦੀ ਅਡਵਾਂਸ ਬੁਕਿੰਗ ਹੋ ਰਹੀ ਹੈ
ਚੋਥਾ ਪੈੱਗ ਲਾਕੇ ਤੇਰੀ ਬਾਂਹ ਫੜ੍ਹਨ ਦੀਆਂ ਟਾਹਰਾਂ ਤੇ
ਤੇਰੇ ਹੀ ਭਰਾਵਾਂ ਨੇ ਭੰਗੜਾ ਪਾਉਣ ਦਾ ਪਰੋਗਰਾਮ
ਨਿਸ਼ਚਿਤ ਕਰ ਲਿਆ ਹੈ...।
ਇਸ ਲਈ ਤੇਰਾ ਮਰ ਜਾਣਾ ਹੀ ਬੇਹਤਰ ਸੀ
ਇੱਕ ਹੋਰ ਦਾਮਿਨੀ ਦੇ ਜਿਉਂਦੀ ਹੋਣ ਲਈ
ਤੇਰਾ ਮਰ ਜਾਣਾ ਹੀ ਬੇਹਤਰ ਸੀ
ਤੇਰਾ ਮਰ ਜਾਣਾ ਹੀ ਬੇਹਤਰ ਸੀ....।।
ਸੁਰਜੀਤ ਗੱਗ