ਤੁਸੀਂ ਜੇ ਚਾਹੁੰਦੇ ਹੋ?
ਸਾਨੂੰ ਛੇਕ ਦੇਣਾ ਆਪਣੇ ਧਰਮ ਚੋਂ,
ਤਾਂ ਬੜੀ ਖੁਸ਼ੀ ਨਾਲ
ਪੂਰੀ ਲਓ ਆਪਣੀ ਏਸ ਰੀਝ ਨੂੰ।
ਠੀਕ ਹੈ,
ਤੁਹਾਨੂੰ ਹੀ ਮੁਬਾਰਕ ਹੋਣ,
ਸਾਦਗੀ ਦੇ ਸੰਕਲਪ ਤੋਂ ਕੋਹਾਂ ਦੂਰ,
ਸੰਗਮਰਮਰ ਦੇ ਬਣੇ,
ਗੁਰੂਦੁਆਰੇ !
ਹੀਰੇ ਜੜੀਆਂ,
ਸੋਨ ਪਾਲਕੀਆਂ ਵਿੱਚ ਸਜੀਆਂ
ਤੁਹਾਡੀਆਂ ਪਵਿੱਤਰ
ਧਾਰਮਿਕ ਪੁਸਤਕਾਂ।
ਰੋਮ ਰੋਮ ਵੱਸਿਆ ਬ੍ਰਾਹਮਣਵਾਦ !
ਤੁਹਾਨੂੰ ਹੀ ਮੁਬਾਰਕ
ਸਿੱਖੀ ਦੀ
ਬੇਹੱਦ ਸੌੜੀ ਪ੍ਰੀਭਾਸ਼ਾ।
ਪਰ
ਧਰਮ ਦੇ ਠੇਕੇਦਾਰ ਬਣੇ,
ਤੁਸੀਂ ਲੋਕਾਂ ਨੇ,
ਕਦੇ ਫੇਰਿਆ ਹੈ?
ਆਪਣੀ ਪੀੜ੍ਹੀ ਹੇਠ ਸੋਟਾ?
ਕਦੇ ਦੇਖਿਆ ਹੈ
ਆਪਣੜੈ ਗਿਰੀਵਾਨ ਮਹਿ
ਸਿਰ ਨੀਵਾ ਕਰ?
ਕਦੇ ਕੋਸ਼ਿਸ਼ ਕੀਤੀ ਹੈ
ਦੁੱਧ ਚਿੱਟੇ ਕੀਮਤੀ ਬਸਤਰਾਂ ਥੱਲ ਛੁਪੇ,
ਕਸੁੱਧ ਕਾਲੇ ਮਨਾਂ ਨੂੰ ਦੇਖਣ ਦੀ?
ਕੀ ਕਦੇ ਤੁਹਾਨੂੰ ਖਿਆਲ ਆਇਐ,
ਬੀਬੀਆਂ ਦਾਹੜੀਆਂ
ਤੇ ਸਿਰਾਂ ਤੇ ਸੋਂਹਦੀਆਂ
ਦਸਤਾਰਾਂ ਪਿੱਛੇ ਛੁਪੇ ਕਰੂਪ ਚਿਹਰੇ
ਬੇਨਕਾਬ ਕਰਨ ਦਾ?
ਪਰ ਚੇਤੇ ਰੱਖਣਾ
ਤੁਹਾਡਾ ਸਿਆਸੀ ਪਹੁੰਚ ਵਾਲਾ
ਕੋਈ ਵੀ ਫੈਸਲਾ,
ਮਿਟਾ ਤਾਂ ਨਹੀਂ ਸਕਦਾ,
ਪੀੜੀਆਂ ਤੋਂ ਸਾਡੇ ਮਨਾਂ ਵਿੱਚ
ਵਸਦੀ,
ਸਾਡੀਆਂ ਰਗਾਂ ਵਿਚ
ਹਰਕਤ ਕਰਦੀ
ਸਿੱਖੀ ਪ੍ਰਤੀ ਸੱਚੀ ਸ਼ਰਧਾ ਨੂੰ।
ਪਰ ਹਾਂ
ਜੇਕਰ ਤੁਸੀਂ ਖੁਸ਼ ਹੋ
ਸਾਨੂੰ ਆਪਣੀ ਸਿੱਖੀ ਚੋਂ ਖਾਰਜ ਕਰਕੇ,
ਤਾਂ ਅਸੀਂ ਵੀ ਹੌਲੇ ਫੁੱਲ ਹਾਂ,
ਤੁਹਾਡੀ ਏਸ ਵਲਗਣ ਤੋਂ
ਆਜ਼ਾਦ ਹੋਕੇ।
-ਹਰਮੇਲ ਪਰੀਤ
|