ਅਹਿਸਾਸਾਂ ਦਾ ਸਿਲਸਿਲਾ ਜੇ ਰੁਕ ਗਿਆ ਤਾਂ ਕੀ ਹੋਊ ?
ਮੇਰੇ ਦਿਲ 'ਚੋਂ ਦਰਦੇ-ਗਮ ਜੇ ਮੁੱਕ ਗਿਆ ਤਾਂ ਕੀ ਹੋਊ ?

ਅਹਿ ਨੂੰ ਐਨਾਂ ਉਹ ਨੂੰ ਓਦਾਂ ਲੁਟਣਾ ਤੂੰ ਠਾਣਿਐਂ,
ਯਾਦ ਰੱਖ ਜੇ ਗੇੜ ਉਲਟਾ ਘੁਕ ਗਿਆ ਤਾਂ ਕੀ ਹੋਊ ?

ਹਰ ਜ਼ਨਾਜਾ ਦੇਖ ਕੇ ਹੋ ਜਾਂਦੀ ਜਾਹਿਰ ਬਾਤ ਹੈ,
ਮੇਰੇ ਅੰਦਰ ਵਗ ਰਿਹਾ ਸਾਹ ਉਕ ਗਿਆ ਤਾਂ ਕੀ ਹੋਊ ?

ਬੱਚਿਆਂ ਆਂਗੂੰ ਤਿਤਲੀਆਂ ਦੇ ਪਿੱਛੇ ਕਾਸ਼ ਮੈਂ ਭੱਜਦਾ,
ਨਾ ਸੋਚਦਾ ਗੁਲ ਟਹਿਕਦੇ ਤੱਕ, ਸੁੱਕ ਗਿਆ ਤਾਂ ਕੀ ਹੋਊ ?

ਵਾਰਿਸ ਸ਼ਾਹ ਵੀ ਅਪਣਾ ਕਿੱਸਾ ਲਿਖਦਾ ਹੋਊ ਸੋਚਦਾ,
ਖੇੜਿਆਂ ਥਾਵੇਂ ਰਾਂਝਾ ਸਿਆਲੀਂ ਢੁਕ ਗਿਆ ਤਾਂ ਕੀ ਹੋਊ ?

ਅਹਿਦੀ ਮੰਜੀ ਠੋਕਣੀ ਮੈਂ ਉਹਦੀ ਮੰਜੀ ਠੋਕਣੀ,
ਸੋਚ 'ਗਿੱਲ' ਤੇਰਾ ਖੁਦ ਦਾ ਮੰਜਾ ਠੁਕ ਗਿਆ ਤਾਂ ਕੀ ਹੋਊ ?
**ਇਕਬਾਲ ਸਿੰਘ ਗਿੱਲ**

hmmm.. nice one...