ਦੋਸਤੋ ਇੱਕ ਗ਼ਜ਼ਲ ਨਾਲ ਹਾਜ਼ਰੀ ਲਗਵਾ ਰਿਹਾ, ਉਮੀਦ ਹੈ ਕਿ ਆਪ ਸਭ ਪਰਵਾਨ ਕਰੋਗੇ ਅਤੇ ਮੈਨੂੰ ਮੇਰੀਆਂ ਖਾਮੀਆਂ ਤੋਂ ਜਾਨੂ ਕਰਵਾਉਂਦੇ ਰਹੋਗੇ.....//
ਖੁਦਾ ਆਪ ਸਭ ਨੂੰ ਸਦਾ ਖੁਸ਼ ਰੱਖੇ ......ਹੱਸਦੇ-ਵੱਸਦੇ ਰਹੋ............"ਰੂਪ"......// ਰੱਬ ਰਾਖਾ ....//
ਬਹਿਰ ---- ਰਮਲ ਮੁਸੱਦਸ ਮਹਿਜ਼ੂਫ਼
ਰੁਕਨ -- ਫ਼ਾਇਲਾਤੁਨ ਫ਼ਾਇਲਾਤੁਨ ਫ਼ਾਇਲੁਨ
ਹਰ ਕਦਮ ਦਿੱਤਾ ਸਹਾਰਾ ਯਾਰ ਨੇ !!
ਦਰਦ ਮੇਰਾ ਹਰ ਲਿਆ ਗ਼ਮਖ਼ਾਰ ਨੇ !
ਹਰ ਸਮੇਂ, ਧੀ ਦੇ ਜਨਮ ਤੋਂ ਮਰਨ ਤੱਕ,
ਮਾਰਿਆ ਧੀ ਨੂੰ ਸਦਾ ਪਰਿਵਾਰ ਨੇ !
ਘਰ ਤੇਰੇ ਆਏ ਨੇ ਜੋ ਵੋਟਾਂ ਲਈ,
ਪਰਖ ਕਰ ! ਕੀ ਉਹ ਸਹੀ ਹੱਕਦਾਰ ਨੇ !
ਟੁਕੜਿਆਂ ਵਿੱਚ ਵੰਡਿਆ ਹੈ ਦੇਸ਼ ਨੂੰ ,
ਜ਼ਾਤ ਦੇ ਆਧਾਰ ਤੇ ਸਰਕਾਰ ਨੇ !
ਚਾਪਲੂਸੀ ਹਰ ਸਮੇਂ ਕੀਤੀ ਜਿਨਾਂ,
ਅਹੁਦਿਆਂ ਦੇ ਬਣ ਗਏ ਹੱਕਦਾਰ ਨੇ !
ਸਿਰਜਿਆ ਸੀ ਜਿਸ ਕਦੇ ਇਤਿਹਾਸ ਨੂੰ,
ਛਾਪੀ ਨਾ ਉਸਦੀ ਗ਼ਜ਼ਲ ਅਖਬਾਰ ਨੇ !
ਝੂਠ , ਚੋਰੀ , ਠੱਗੀ , ਡਾਕਾ , ਲੁੱਟ-ਖੋਹ,
ਵਹਲਿਆਂ ਦੇ ਅੱਜ ਕੱਲ ਰੁਜ਼ਗਾਰ ਨੇ !
ਹੋਣਗੇ ਪੈਦਾ ' ਭਗਤ ' , ' ਆਜ਼ਾਦ ' ਫਿਰ ,
ਬਹੁਤ ਅੱਤ ਚੁੱਕੀ ਹੈ ਅਤਿਆਚਾਰ ਨੇ !
ਜਿਸ ਦੇ ਮੁਹਰੇ ਝੁੱਕ ਗਈ ਤਲਵਾਰ ਵੀ ,
ਮਾਰਿਆ ਉਸਨੂੰ ਕਲਮ ਦੇ ਵਾਰ ਨੇ !
ਸ਼ੁਕਰੀਆ ਉਸਦਾ ਕਦੇ ਤਾਂ "ਰੂਪ" ਕਰ,
ਇਹ ਕਲਮ ਬਖ਼ਸ਼ੀ ਹੈ ਜਿਸ ਕਰਤਾਰ ਨੇ !
|