ਸੁੱਕੇ ਝੜੇ ਪੱਤਿਆਂ ਨੇ ਪੁੱਛਿਆ ਬਹਾਰਾਂ ਤੋਂ

ਗਰੀਬ ਪੇਂਡੂ ਜੰਤਾ ਨੇ ਮੌਜੂਦਾ ਸਰਕਾਰਾਂ ਤੋਂ

ਹਾੜੀ ਸੌਣੀ ਵਧੀ ਜਾਂਦੇ ਉਧਾਰ ਨੇ ਪੁੱਛਿਆ

ਬਾਬੇ ਵਿੱਚ ਪੈਨਸ਼ਣ ਦੀ ਕਤਾਰ ਨੇ ਪੁੱਛਿਆ

ਲਵਾਉਂਦਾ ਪੈਸੇ ਲੈਕੇ ਗੂਠਾ ਪਟਵਾਰੀ ਬਾਰੇ ਪੁੱਛਿਆ,

ਸਾਡੀ ਕਦੋਂ ਆਊ ਇਹਨਾਂ ਵਾਰੀ ਬਾਰੇ ਪੁੱਛਿਆ

ਸਕੂਲ ਅੰਗਰੇਜੀ ਦੀਆਂ ਫੀਸਾਂ ਬਾਰ ਪੁੱਛਿਆ

ਬੋਰੀ ਮਾਰਕਾ ਤੋਂ ਨਾ ਹੁੰਦੀਆਂ ਜੋ ਰੀਸਾਂ ਬਾਰੇ ਪੁੱਛਿਆ

ਰੋਟੀਆਂ ਪੋਣੇ ਬੰਨੀਆਂ ਅੰਬ ਦਾ ਅਚਾਰ ਪੁੱਛੇ

ਥਰਮੋਸ ਲੰਚ ਬੌਕਸ ਕਿਹੜੇ ਮਿਲਦੇ ਬਜਾਰ ਪੁੱਛੇ

ਬੇਰੁਜਗਾਰ ਨਿੱਤ ਪੁੱਛਦੇ ਨੇ ਕਈ

ਲੇਬਰ ਚੌਂਕ ਤੇ ਖੜੇ ਕਿਸਾਨ ਕਰਜਈ

ਆੜਤੀਏ ਨੂੰ ਲਾਭ ਦੱਸੋ ਸਾਨੂੰ ਹੋਈ ਹਾਨੀ ਪੁੱਛੇ

ਜਿਹੜਾ ਫਾਹਾ ਲੈ ਕੇ ਮਰਿਆ ਉਸਦੀ ਜਨਾਨੀ ਪੁੱਛੇ

ਹੁਣ ਅੱਗੇ ਕਿਸਦੀ ਤਿਆਰੀ ਬਾਰੇ ਪੁੱਛਿਆ

ਸਾਡੀ ਕਦੋਂ ਆਊ ਇਹਨਾਂ ਵਾਰੀ ਬਾਰੇ ਪੁੱਛਿਆ....

ਬਾਬੇ ਜਿਹੜੇ ਪੈਦਾ ਹੋਏ ਉਹ ਬੇਹਿਸਾਬ ਨੂੰ ਪੁੱਛੋ

ਵਿੱਚ ਚਿੜੀ ਦੇ ਪੌਂਚੇ ਜਿੰਨੇ ਪੰਜਾਬ ਨੂੰ ਪੁੱਛੋ

ਮੀਟਿੰਗ ਕਰਦੇ ਦਰਬਾਰ ਸਾਹਿਬ ਉਹਨਾਂ ਦਾ ਖਿਆਲ ਪੁੱਛੋ

ਰਾਜਨੀਤੀ ਦਾ ਕੀ ਰਿਸ਼ਤਾ ਧਰਮ ਦੇ ਨਾਲ ਪੁੱਛੋ

ਜਿੰਨਾ ਏ ਪੰਜਾਬ ਜੇ ਕੋਈ ਰੰਗਲਾ ਏ ਏਡਾ ਪੁੱਛੋ

ਮੁਰੱਬਿਆਂ ਦੇ ਮਾਲਕ ਕਿਉਂ ਜਾਂਦੇ ਨੇ ਕਨੇਡਾ ਪੁੱਛੋ

ਟਰੱਕ ਟੈਕਸੀ ਦੇ ਡਰੈਵਰਾਂ ਸਰਦਾਰੀ ਬਾਰੇ ਪੁੱਛਿਆ

ਸਾਡੀ ਕਦੋਂ ਆਊ ਇਹਨਾਂ ਵਾਰੀ ਬਾਰੇ ਪੁੱਛਿਆ....

ਕਾਗਰਸੀਆਂ ਕੌਮਨਿਸਟਾਂ ਅਕਾਲੀਆਂ ਤੋਂ ਪੁੱਛ,

ਸਤਿਸੰਗ ਭਰੀ ਜਾਂਦੀਆਂ ਟਰਾਲੀਆਂ ਤੋਂ ਪੁੱਛ

ਜੋ ਹੋਇਆ ਇਤਿਹਾਸ ਚ ਨੁਕਸਾਨ ਬਾਰੇ ਪੁੱਛ

ਨਾ ਪੰਜਾਬ ਨਾ ਪੰਜਾਬੀ ਖਾਲਿਸਤਾਨ ਬਾਰੇ ਪੁੱਛ

ਸਰਾਭੇ ਊਧਮ ਤੇ ਭਗਤ ਨੂੰ ਕੀ ਪੁੱਛ ਤੇਰੀ ਜਾਤ

ਪੌਂਡਾਂ ਡੌਲਾਰਾਂ ਤੋਂ ਪੁੱਛ ਕਿ ਰਪੀਏ ਦੀ ਔਕਾਤ

ਇਸ ਧਰਤੀ ਰਹਿ ਕੀਤੀ ਗੱਦਾਰੀ ਬਾਰੇ ਪੁੱਛਿਆ

ਸਾਡੀ ਕਦੋਂ ਆਊ ਇਹਨਾਂ ਵਾਰੀ ਬਾਰੇ ਪੁੱਛਿਆ........

ਜਿਹੜੇ ਸੁਫਨੇ ਚ ਝੂਟੇ ਲੈਂਦੇ ਉਹਨਾਂ ਨੂੰ ਹਲੂਣ ਪੁੱਛ

ਬਾਦਲ ਜਾਂ ਕੈਪਟਨ ਕੀਹਦਾ ਹੈ ਕਨੂੰਨ ਪੁੱਛ

ਪੰਜਾਬ ਵਿੱਚ ਰਹਿਣ ਦਾ ਇਹਨਾਂ ਨੂੰ ਹਿਸਾਬ ਪੁੱਛ

ਫਾਇਦਾ ਕੀ ਹੋਇਆ ਜੋ ਆਏ ਪਹਿਲਾਂ ਇਨਕਲਾਬ ਪੁੱਛ

ਏਥੇ ਰਹਿ ਕੇ ਐਨੇ ਕਿਉਂ ਇਹ ਹੁੰਦੇ ਨੀ ਦਲੇਰ ਪੁੱਛ

ਵੀਜ਼ੇ ਲਵਾਕੇ ਬਣ ਜਾਂਦੇ ਖਾਲਸੇ ਕਿਉਂ ਫੇਰ ਪੁੱਛ

ਸੱਤ ਸਮੁੰਦਰਾਂ ਤੋਂ ਪਾਰ ਮਾਰੀ ਦੀ ਐ ਕਿਵੇਂ ਫੜ ਪੁੱਛ

ਧਾਰ ਖੰਡੇ ਦੀ ਤੇ ਨੱਚਣ ਲਈ ਕਿਹੜਾ ਰਿਹਾ ਖੜ ਪੁੱਛ

ਮਾਤ ਭੂਮੀ ਨੂੰ ਕੱਢੋਂ ਗਾਲਾਂ ਥੋਡੇ ਸਦਕੇ ਹੰਕਾਰਾਂ ਤੇ

ਫੇਰ ਆਖਦੇ ਓਂ ਚੁਟਕਲੇ ਬਣਦੇ ਸਰਦਾਰਾਂ ਤੇ

ਖਾਲਸਾ ਸੀ ਰਚਿਆ ਗੋਬਿੰਦ ਨੇ ਕਿਉਂ ਰੀਝ ਪੁੱਛ

ਫੌਜ ਭਾਰਤੀ ਚ ਹੁੰਦੇ ਕਿਉਂ ਕਿੰਨੇ ਸ਼ਹੀਦ ਪੁੱਛ

ਲਾਕੇ ਫੂਨ ਨੈਣੇਵਾਲੀਏ ਤੋਂ ਠੋਕਰ ਕਰਾਰੀ ਬਾਰੇ ਪੁੱਛਿਆ

ਸਾਡੀ ਕਦੋਂ ਆਊ ਇਹਨਾਂ ਵਾਰੀ ਬਾਰੇ ਪੁੱਛਿਆ........