ਅਸੀਂ ਤੇ ਪੰਜ ਤੱਤ (A Satire on what man is doing to environment)
ਸੁਣਿਐ ਪਰਦੂਸ਼ਣ ਨਾਲ,
ਸਭ ਨੂੰ ਪਵਿੱਤਰ
ਕਰਨ ਵਾਲਾ ਜਲ
ਖੁਦ ਦੂਸ਼ਿਤ ਹੋ ਗਿਐ,
ਅਤੇ ਜੀਵਨ ਦਾਈਨੀ
ਹਵਾ ਦਾ ਆਪਣਾ
ਦਮ ਘੁਟਣ ਨੂੰ ਐ ?
ਮੀਡਿਆ ਭੰਡੀ ਪਰਚਾਰ
ਨੇ ਭੰਨਿਆ ਏ ਇਹਦਾ
ਠੀਕਰਾ ਵੀ ਸਾਡੇ
ਵਿਕਾਸਸ਼ੀਲ ਜਤਨਾਂ
ਦੇ ਸਿਰ |
ਇਨ੍ਹਾਂ ਇੱਕਾ ਦੁੱਕਾ ਘਟਨਾਵਾਂ ਦੀ
ਪਰਸੈਂਟੇਜ ਕੱਢੀਏ,
ਤਾਂ ਰੋਡ ਐਕਸੀਡੈਂਟਾਂ ਤੋਂ
ਬਹੁਤ ਘੱਟ ਹੋਏਗੀ |
ਆਗਾਮੀ ਪੀੜ੍ਹੀਆਂ ਦੀ,
ਬੇਹਤਰੀ ਲਈ
ਸਾਇੰਟਿਫਿਕ ਤਜਰਬੇ,
ਚੱਲੀ ਜਾ ਰਹੇ ਨੇ |
ਇਦ੍ਹੇ ਵਿਚ ਸਾਇੰਸ
ਦਾ ਕੀਹ ਦੋਸ,
ਜੇ ਭੂਗਰਭ ਵਿਚ,
ਅੰਮ੍ਰਿਤ ਦੀ ਥਾਂ
ਵਿਸ ਮੱਲੀ ਜਾ ਰਹੇ ਨੇ ?
ਜਿਓਪੋਲੀਟਿਕਸ ਦੀ
ਰੰਗ ਭੂਮੀ ਵਿਚ,
ਪ੍ਰਪੰਚਾਂ ਦੇ ਸਰਪੰਚਾਂ ਦੀ,
ਵਿਸ਼ਵ ਸ਼ਾਂਤੀ ਅਤੇ
ਸੁਰੱਖਿਆ ਵਾਰੇ,
ਚਿੰਤਾ ਸਲਾਹੁਣਯੋਗ ਏ |
ਅਕਾਸ਼ ਕਾਦਰ ਦੀ
ਵਿਸ਼ਾਲਤਾ ਅਤੇ
ਉਦ੍ਹੇ ਕਰਮ ਦੀ ਇਕਸਾਰਤਾ
ਦਾ ਅਖੰਡ ਚਿੰਨ੍ਹ ਹੈ |
ਇਹਨੂੰ ਵੀ ਸ਼ਾਂਤੀ
ਦੇ ਲੰਬਰਦਾਰਾਂ ਨੇ,
ਰਾਜਨੀਤਕ ਹਿਰਸ
ਅਤੇ ਸੁਆਰਥਾਂ
ਦੀ ਰੇਸ਼ਮੀ ਡੋਰੀ ਨਾਲ,
ਸੀਮਾਵਾਂ ਵਿਚ,
ਬੰਨ੍ਹ ਦਿੱਤਾ ਹੈ |
ਪ੍ਰਤੱਖ ਪਰ ਅਛੋਹ,
ਜਨਮ ਵੇਲੇ ਅਸੀਸ,
ਵਿਆਹ ਵਿਚ ਸੰਕਲਪ,
ਅੰਤਮ ਸੰਸਕਾਰ ਤੇ
ਮੁਕਤੀਦਾਤੀ ਪ੍ਰਚੰਡ
ਅਤੇ ਉੱਕੀ ਨਿਰਮੋਹ,
ਬਸ ਅੱਗ ਹੀ ਬਚੀ ਏ,
ਪੰਜਾਂ ਤੱਤਾਂ ਵਿਚੋਂ,
ਅਭਿੱਟ ਤੇ ਪਵਿੱਤਰ |
ਜਗਜੀਤ ਸਿੰਘ ਜੱਗੀ
Five elements: ਜਲ, ਹਵਾ, ਭੂ, ਅਕਾਸ਼ ਅਤੇ ਅੱਗ
|
