ਬੱਸ ਲੰਗਰ ਈ ਖਾਇਓ ..
ਦੇਖਿਓ ਕਿਤੇ ਬਾਣੀ ਹਿਰਦੇ ਨਾ ਵੱਸ ਜੇ ....
ਆਹਾ ਚੌਧਰਾਂ ਕੁਰਸੀਆਂ, ਜੱਥੇਦਾਰੀਆਂ
ਖੁੱਸ ਜਾਣੇ ਆ ਸਾਰੇ ਰਾਗ ਰੰਗ ..
ਬੱਸ ਜੋੜਿਆਂ ਦੀ ਸੇਵਾ ਹੀ ਸਭ ਤੋਂ ਵੱਡੀ ਹੈ
ਕੋਈ ਵੀ ਸਮਾਜਿਕ ਜਿੰਮੇਵਾਰੀ 
ਏਸ ਲਾਹੇ ਤੋਂ ਵੱਧ ਨੀ ਹੋਣੀ 

ਆਓ ਗੋਲਕਾਂ ਭਰੀਏ
ਨਗਰ ਕੀਰਤਨ ਕੱਢੀਏ

ਕਲਯੁਗ ਦਾ ਪਹਿਰਾ ਹੈ
ਆਉ ਉੱਚੀ ਉੱਚੀ 
ਚੌਪਈ ਦਾ ਪਾਠ ਕਰੀਏ
ਮਹਾਂਕਾਲ ਅਰਾਧੀਏ
ਹਮਰੇ ਦੁਸਟ ਸਭੈ ਤੁਮ ਘਾਵਹੁ
ਤਾਂਕਿ ਅਸੀਂ ਹੋਰ ਦੁਸ਼ਟਤਾ ਕਰ ਸਕੀਏ

ਦੇਖਿਓ 
ਕਿਤੇ ਵਾਕ ਲੈਣ ਲੱਗਿਆਂ ..
"ਪੰਡਤ ਮੁੱਲਾਂ ਛਾਡੈ ਦੋਊਂ 
ਹਮਰਾ ਝਗਰਾ ਰਹਾ ਨਾ ਕੋਊ "
ਵਾਲਾ ਪੰਨਾ ਨਾ ਖੁੱਲ ਜਾਵੇ 
ਕਿਵੇਂ ਭਰਾਂਗੇ ਉਹ ਖਾਤੇ 
ਜੋ ਏਸ ਝਗੜੇ ਦੀ ਕਮਾਈ ਨਾਲ ਭਰਦੇ ਨੇ
ਸੋ ਆਓ ਪਿਆਰਿਉ
ਲੰਗਰ ਛਕੀਏ .. ਨਾਮ ਜਪੀਏ
ਦੀਪਮਾਲਾ ਕਰੀਏ

ਕਾਫ਼ਰ