ਰੰਗਾਂ 'ਚ ਵਜਦੇ ਰੰਗ ਨੇ
ਹੱਥਾਂ 'ਚ ਸੋਹਲ ਅੰਗ ਨੇ
ਅੱਖਾਂ ਚ ਸ਼ੀਸ਼ਾ ਉਤਰਿਆ
ਹੱਡਾਂ ਨੂੰ ਗੁੰਨ੍ਹਦਾ ਮਾਸ ਹੈ
ਹਾਲ੍ਹੇ ਵੀ ਬਾਕੀ ਆਸ ਹੈ
ਕਿ ਅੱਲਾ-ਮੀਆਂ ਪਾਸ ਹੈ।

ਸ਼ਾਵਾ ਲਲਾਰੀਆ ਰੰਗੀਆਂ
ਜੂਡਸ ਦੀਆਂ ਦਾੜ੍ਹੀਆਂ ਬੱਗੀਆਂ
ਮਰੀਅਮ ਦੀਆਂ ਛਾੱਤੀਆਂ ਨੰਗੀਆਂ
ਆਦਮ ਨੂੰ ਉਂਗਲ ਨਾ ਕਰੋ
ਇਸ ਨਸਲ ਦਾ ਇਤਿਹਾਸ ਹੈ
ਕਿ ਅੱਲਾ-ਮੀਆਂ ਪਾਸ ਹੈ।

ਠੰਡੇ ਲਹੂ ਨੂੰ ਫ਼ਰਕ ਕੀ
ਹੱਥਾਂ ਚ ਹੱਥ ਜਾਂ ਛੂਰੀਆਂ
ਮੂੰਹ ਬੋਟੀਆਂ ਜਾਂ ਚੂਰੀਆਂ
ਅਣਹੋਂਦ ਹੀ ਹੁਣ ਹੋਂਦ ਹੈ
ਰਲਗੱਡ ਇਨਕਲਾਬ ਹੈ
ਕਿ ਅੱਲਾ-ਮੀਆਂ ਪਾਸ ਹੈ।

ਅੱਖਾਂ ਚ ਜੇ ਲੱਭਦਾ ਨਹੀਂ
ਝੱਗੇ 'ਚੋਂ ਲੱਭਜੇ ਕੀ ਪਤਾ
ਜਾਂ ਖੋਲ੍ਹੋ ਕੱਚੇ ਮਾਸ ਨੂੰ
ਕਿੱਥੇ ਲੁਕਿਆ ਰੱਬ ਜੇ ਕੀ ਪਤਾ
ਕਹਿੰਦੇ ਨੇ ਜਿੱਥੇ ਕੁਝ ਨਹੀਂ
ਉੱਥੇ ਵੀ ਉਸਦਾ ਵਾਸ ਹੈ
ਮੁੱਲਾਂ ਜੀ ਫ਼ੇਰੋ ਛੂਰੀਆਂ
ਹੁਣ ਅੱਲਾ-ਮੀਆਂ ਪਾਸ ਹੈ।

ਮ੍ਰਿਤੁੰਜੇ