ਗੱਲ ਇਹ ਨਹੀਂ
ਕਿ ਉਹ ਦਿਖਦਾ ਨਹੀਂ
ਗੱਲ ਇਹ ਹੈ ਕਿ
ਅਸੀਂ ਦੇਖਣਾ ਹੀ ਨਹੀਂ ਚਾਹੁੰਦੇ
ਰੌਲਾ ਇਹ ਨਹੀਂ
ਕਿ ਉਹ ਮਿਲਦਾ ਨਹੀਂ
ਰੌਲਾ ਤਾਂ ਇਹ ਆ
ਕਿ ਅਸੀਂ ਮਿਲਣਾ ਹੀ ਨਹੀਂ ਚਾਹੁੰਦੇ

ਸਾਨੂੰ
ਭੀਡ਼ਾਂ ਚੰਗੀਆਂ ਲੱਗਦੀਆਂ ਨੇ
ਅਸੀਂ ਭੀੜਾਂ ਵਿੱਚ
ਗਵਾਚੇ ਰਹਿਣਾ ਚਾਹੁੰਦੇ ਹਾਂ
ਸਾਨੂੰ ਸ਼ੋਰ ਪਸੰਦ ਆ
ਅਸੀਂ ਸ਼ੋਰ ਵਿੱਚ
ਗੁੰਮ ਰਹਿਣਾ ਚਾਹੁੰਦੇ ਆ
ਅਸੀਂ ਇਕੱਲੇ ਹੋਣ ਤੋਂ ਡਰਦੇ ਆ
ਡਰਦੇ ਆ ਕਿਤੇ
ਆਪਣੇ ਆਪ ਨਾਲ
ਸਾਹਮਣਾ ਨਾ ਹੋ ਜਾਵੇ
ਸਾਨੂੰ ਇਕੱਲਾਪਣ ਮਾਨਣਾ ਨਹੀਂ ਆਉਂਦਾ

ਜੇ ਸਾਨੂੰ
ਪੰਜ ਮਿੰਟ ਉਡੀਕ ਕਰਨੀ ਪੈ ਜਾਵੇ ਕਿਸੇ ਦੀ
ਤਾਂ ਅਸੀਂ ਪਰੇਸ਼ਾਨ ਹੋਣ ਲੱਗਦੇ ਆ
ਇਕੱਲੇ ਬੈਠ ਕਿ ਅਸੀਂ
ਪੰਜ ਮਿੰਟ ਉਡੀਕ ਨਹੀਂ ਕਰ ਸਕਦੇ ਕਿਸੇ ਦੀ
ਜਦੋਂ ਕਿ ਇਸ ਪੰਜ ਮਿੰਟਾਂ ਦੀ
ਇਕੱਲਤਾ ਨੂੰ ਵੀ ਮਾਣਿਆ ਜਾ ਸਕਦਾ
ਉਹ ਭੀਡ਼ ਵਿੱਚ ਨਹੀਂ ਮਿਲਣਾ
ਭੀਡ਼ ਵਿੱਚ ਗੁੰਮਿਆ ਜਾ ਸਕਦਾ ਲੱਭਿਆ ਨਹੀਂ
ਰੋਲੇ 'ਚ ਸ਼ੋਰ ਹੁੰਦਾ ਨਾਦ ਨਹੀਂ ~