ਆਬਾਦੀ ਦੇ ਗਿਰਾਫ਼ ਦੀਆਂ
ਵਧੀ ਜਾਣ ਪੌੜੀਆਂ !
ਕਿੰਨੀਆਂ ਕੁ ਸੜਕਾਂ
ਕਰੋਗੇ ਹੋਰ ਚੌੜੀਆਂ ??

ਖਾ ਲਿਆ ਮਕਾਨਾਂ ਤੇ
ਕਲੋਨੀਆਂ.....ਜ਼ਮੀਨ ਨੂੰ !
'ਸਭ ਕੁੱਝ' ਸੌਂਪ ਦਿੱਤਾ
'ਕਾਮੇ' ਨੇ ਮਸ਼ੀਨ ਨੂੰ !!

ਵਿੱਦਿਆ ਮਿਆਰੋਂ ਡਿੱਗੀ
ਬਣ ਗਈ ਵਪਾਰ ਹੁਣ !
ਬੇ-ਰੁਜ਼ਗ਼ਾਰਾਂ ਵਾਲੀ
ਲੰਬੀ ਹੋਈ ਕਤਾਰ ਹੁਣ !!

ਵਧੀ ਮਹਿੰਗਾਈ ਹੱਦੋਂ
ਚੁੱਲੇ ਠੰਢੇ ਕਰੀ ਜਾਵੇ !
ਤੇ ਹਾਕਮਾਂ ਦਾ ਬਸ 'ਕੱਲੇ
'ਬਿਆਨ' ਦੇ ਕੇ ਸਰੀ ਜਾਵੇ !!

'ਚੈਨਲਾਂ' ਤੇ 'ਨਸ਼ਿਆਂ' ਨੇ
ਖ਼ੋਰੀਆਂ ਜਵਾਨੀਆਂ !
ਕਹਿਰ ਬਣ ਢਹਿਣਗੀਆਂ
'ਇਨ੍ਹਾਂ' ਦੀਆਂ 'ਮਿਹਰਬਾਨੀਆਂ' !!

ਹੱਥਾਂ ਨਾਲ਼ ਦਿੱਤੀਆਂ
ਮੂੰਹਾਂ ਨਾਲ਼ ਖੋਲ੍ਹੋਗੇ !
ਅੱਜ ਨਾ ਜੇ ਬੋਲੇ ਲੋਕੋ
ਫੇਰ ਕਦੋਂ ਬੋਲੋਗੇ...
ਫੇਰ ਕਦੋਂ ਬੋਲੋਗੇ....?????

ਜ.ਔਲਖ