ਮੈਂ ਜੱਟ ਹਾਂ
ਇਹ ਸਤਰ ਖ਼ਤਰਨਾਕ ਹੈ
ਬਹੁਤ ਪਿਆਰੀ ਵੀ ਹੈ

ਇਹ ਸਤਰ ਵਿਰਾਸਤੀ ਘੁਮੰਡ ਹੈ
ਨਿਰੀ ਜੱਟ- ਬੂਟ
ਇੱਕ ਟੀਸ ਹੈ-- ਇਹ ਸਤਰ
ਇੱਕ ਦਰਦ ਦੀ ਕਾਂ- ਅੰਗਿਆਰੀ
ਲੈਂਵਰੀ ਕਣਕ 'ਚ ਖੜ੍ਹੀ

ਇਸ ਸਤਰ ਦੇ ਦੋ ਵਿਯੂਅਲ ਵੇਖੋ
ਵਿਯੂਅਲ ਨੰਬਰ ਇੱਕ--
ਮੇਰਾ ਬਹੁਤ ਪਿਆਰਾ ਗ਼ੈਰ- ਜੱਟ ਮਿੱਤਰ
ਦਾਰੂ ਦੀ ਸਿਖ਼ਰ 'ਤੇ ਬੋਲਦਾ ਹੈ :
ਮੈਂ ਤੇਰੇ ਵਰਗੇ ਪੰਜਾਹ ਜੱਟ
ਪੈਰਾਂ ਹੇਠ ਦਰੜੇ ਐ
ਜਿੰਨਾ ਚਿਰ ਤੇਰੇ ਅੰਦਰੋਂ ਜੱਟ ਨੀ ਮਰਦਾ
ਮੈਨੂੰ ਫ਼ੋਨ ਨਾ ਕਰੀਂ

ਵਿਯੂਅਲ ਨੰਬਰ ਦੋ --
ਮੇਰੀ ਸਾਲੇਹਾਰ ਸਰਦਾਰਾਂ ਦੀ ਨੂੰਹ
ਆਪ ਜੱਟੀ
ਮੇਰੇ ਨਾਲ ਗੱਲੀਂ ਲੱਗੀ ਤੁਰ ਰਹੀ ਹੈ
ਮੈਂ ਇੱਕ ਆਲੀਸ਼ਾਨ ਗੁਰਦੁਆਰਾ ਵੇਖ
ਕਹਿੰਦਾ ਹਾਂ :
ਵਾਹ ! ਕਿੰਨਾ ਸੁੰਦਰ ਗੁਰੂ-ਘਰ ਹੈ ਤੁਹਾਡਾ
ਉਸਦੇ ਚਿਹਰੇ 'ਚ ਗੁਰਦੁਆਰਾ ਆਭਾ- ਰਹਿਤ ਹੈ
ਕਹਿੰਦੀ ਹੈ --
ਇਹ ਤਾਂ ਜੱਟਾਂ ਦਾ ਗੁਰਦੁਆਰੈ .....
--------------------------------------------

( ਦੇਵਨੀਤ )
((ਮਰਹੂਮ ਕਵੀ ਦੇ ਕਾਵਿ- ਸੰਗ੍ਰਿਹ ' ਹੁਣ ਸਟਾਲਿਨ ਚੁੱਪ ਹੈ ' ਵਿੱਚੋਂ ))