? ਕਦ ਉਦਾਸ ਹੁੰਨਾ ਏਂ
: ਹਰ ਬੂਹੇ 'ਤੇ
ਰੀਝਾਂ ਦੀ ਕਰਬਲਾ...
ਹਰ ਬਿਰਖ 'ਤੇ
ਪੱਤਿਆਂ 'ਚ ਲੁਕੇ ਪਿੰਜਰੇ ...
ਹਰ ਖੇਤ ਵਿਚ
ਉੱਗਦੀ ਸਲਫ਼ਾਸ ...
ਤੂੰ ਇਹ ਪੁੱਛ
ਕਦ ਉਦਾਸ ਨਹੀਂ ਹੁੰਦਾ ...
---------------------------
? ਮਹਿਕਨਾਮਾ
: ਮਹਿਕ ... ਫੁੱਲਾਂ 'ਚ ਨਹੀਂ
ਮਿੱਟੀ ਦੀ ਤਾਸੀਰ 'ਚ ਹੁੰਦੀ
ਆਪਣੀ ਮਿੱਟੀ ਨੂੰ
ਫੁੱਲਾਂ ਜੋਗੀ ਕਰ ਲੈ ...
ਸੰਗੀਤ ... ਸਾਜ਼ ਵਿਚ ਨਹੀਂ
ਸੁਰਤ ਵਿਚ ਹੁੰਦਾ
ਆਪਣੀ ਹੋਂਦ ਨੂੰ
ਸੁਰਾਂ ਨਾਲ ਵਰ ਲੈ ...
------------------------
? ਦ੍ਰਿਸ਼ਟੀਕੋਣ
: ਤੂੰ ਵੇਖਦੀ ਏਂ
ਪਲਕਾਂ ਚੁੱਕ
ਬਿਰਖ ਦੀ ' ਟੀਸੀ '
ਮੈਂ
ਪਤਾਲ 'ਚ ਉੱਤਰ ਕੇ
ਰੁੱਖ ਦੀਆਂ
' ਜੜ੍ਹਾਂ ' ਤੱਕ ਜਾਂਦਾ ਹਾਂ ...
----------------------------
? ਸੂਖ਼ਮਤਾ
: ' ਭਰੇ ਸਫ਼ਿਆਂ ' ਨੂੰ
ਪੜ੍ਹਦੇ ਨੇ
ਸਿਰਫ਼ ... ਜਗਿਆਸੂ
' ਕੋਰੇ ਸਫ਼ੇ '
ਪੜ੍ਹਨ ਦੀ
ਆਦਤ ਹੁੰਦੀ ... ਮਨ- ਬੌਰਿਆਂ ਨੂੰ
---------------------------------
? ਕਦ ਭਾਵੁਕ ਹੁੰਨਾ ਏਂ
: ਮਾਸੂਮ ਸਵੇਰਾਂ ਦੇ ਬਾਝੋਂ
ਸਰਦਲਾਂ
ਸੁੰਨੀਆਂ ਵੇਖ ਕੇ ...
ਸਿਖ਼ਰ ਦੁਪਹਿਰਾਂ
ਦੇ ਸਿਰੀਂ
ਚਿੱਟੀਆਂ ਚੁੰਨੀਆਂ ਵੇਖ ਕੇ ...
-------------------------------
(( ਕਵੀ ਦੇ ਸੰਗ੍ਰਿਹ ' ਦਰਦ ਮਜੀਠੀ ' ਵਿੱਚੋਂ ))

 

ਦਰਸ਼ਨ ਬੁੱਟਰ ਜੀ ਦੀਆਂ ਪ੍ਰਸ਼ਨ-ਕਵਿਤਾਵਾਂ ਕਮਾਲ ਦੀਆਂ ਹਨ - ਇਕ ਬੜੇ ਨਫ਼ੀਸ ਕਿਰਤ ਟੋਟਿਆਂ ਦਾ ਕਲਸਟਰ ਹੈਂ ਇਹ - ਇਕ ਅਤਿ ਸੁੰਦਰ ਨਮੂਨਾ ਤਾਂ ਵੇਖੋ :     

ਮਹਿਕ ... ਫੁੱਲਾਂ 'ਚ ਨਹੀਂ

ਮਿੱਟੀ ਦੀ ਤਾਸੀਰ 'ਚ ਹੁੰਦੀ

ਆਪਣੀ ਮਿੱਟੀ ਨੂੰ

ਫੁੱਲਾਂ ਜੋਗੀ ਕਰ ਲੈ ...

ਸੰਗੀਤ ... ਸਾਜ਼ ਵਿਚ ਨਹੀਂ

ਸੁਰਤ ਵਿਚ ਹੁੰਦਾ

ਆਪਣੀ ਹੋਂਦ ਨੂੰ

ਸੁਰਾਂ ਨਾਲ ਵਰ ਲੈ ...

ਬਾਕਮਾਲ |

ਸ਼ੁਕਰੀਆ, ਬੁੱਟਰ ਜੀ ਲਿਖਣ ਲਈ, ਅਤੇ ਬਿੱਟੂ ਬਾਈ ਜੀ ਸਾਂਝੀ ਕਰਨ ਲਈ |