ਨਾਨਕ ਨੇ ਸੰਸਾਰ ਹੀ ਗਾਹ ਤਾ,
ਮੱਕੇ ਦਾ ਵੀ ਫੇਰਾ ਲਾ ਤਾ,
ਕਾਬਾ ਵੀ ਉਹਨੇ ਫੇਰ ਫਿਰਾ ਤਾ,
ਰੱਬ ਦਾ ਨਕਸ਼ਾ ਹੋਰ ਦਿਖਾ ਤਾ,
ਧੁਰ ਅੰਦਰੋਂ ਹੀ ਤਾਰ ਜੁੜਾਤਾ,
ਪਰ,
ਸਾਡਾ ਮੱਕਾ ਘੁੰਮਿਆ ਹੀ ਨਹੀਂ ਐ,
ਸਾਨੂੰ ਨਾਨਕ ਮਿਲਿਆ ਹੀ ਨਹੀਂ ਐ,
ਸਾਡਾ ਬੀਜ ਫੁੱਲ ਬਣਿਆ ਹੀ ਨਹੀਂ ਐ।

ਸਾਨੂੰ ਰੱਬ ਨਾ ਨਜ਼ਰੀਂ ਆਉਂਦਾ,
"੧ਓ" ਨਾ ਸਮਝੀ ਆਉਂਦਾ ।

ਆਪਾਂ ਫੁੱਲਾਂ ਨਾਲ ਸਜਾਇਐ,
ਸੋਨੇ ਮੜ੍ਹ ਕੇ ਖ਼ੂਬ ਲਸ਼ਕਾਇਐ,
ਰੁਮਾਲੇ ਦੇ ਕੇ ਚੁੱਪ ਕਰਾਇਐ।।
ਕਹਿੰਦੇ,
੧ਓ ਨੂੰ ਪੜ੍ਹਨਾ ਨਹੀਂ ਐ,
ਦਹਿਲੀਜ਼ਾਂ ਤੋਂ ਕੱਢਣਾ ਨਹੀਂ ਐ,
ਬੀੜ ਨੂੰ ਪਿੱਠ ਕਰ ਖੜਨਾ ਨਹੀਂ ਐ,
ਸਵਾਲ ਕੋਈ ਵੀ ਕਰਨਾ ਨਹੀਂ ਐ,
ਤਰਕ ਦਾ ਬੂਹਾ ਫੜ੍ਹਨਾ ਨਹੀਂ ਐ।

ਬਾਬੇ ਨਾਨਕ ਦੁਨੀਆਂ ਗਾਹ ਤੀ,
ਸੁੱਤੀ ਪਈ ਤਸਵੀਰ ਜਗਾ ਤੀ,

ਨਾਨਕ ਬਾਗ਼ੀ ਜਾਤ ਪਛਾਣੇ,
ਆਜ਼ਾਦੀ ਦੀ ਰੁੱਤ ਬਖਾਣੇ,
ਨਾਨਕ, ਤਾਂ ਕਰਤਾਰ ਪਛਾਣੇ...
ਪਰ
ਰਹਿ ਗਏ ਤੇਰੇ ਹੀ ਪੁੱਤ ਇਆਣੇ ~