(ਸਾਂਭਿਆ ਹੋਇਆ ਖ਼ਤ)
ਖ਼ਤ ਤੇਰਾ ਇੱਕੋ ਹੀ ਆਇਆ ਸੀ ਮੇਰੇ ਕੋਲ
ਤੇ ਉਹ ਹਾਲੇ ਵੀ ਮੇਰੇ ਕੋਲ ਹੀ ਹੈ
ਜੇ ਨਾ ਭੁੱਲਦੇ ਹੋਵਾਂ ਤਾਂ
ਕਰੀਬ ਅੱਠ ਕੁ ਸਾਲ ਤਾਂ ਹੋ ਹੀ ਗਏ ਨੇ
ਉਹਨੂੰ ਮੇਰੇ ਕੋਲ ਪਏ ਨੂੰ
ਸ਼ਬਦਾਂ ਦੀ ਹਾਲਤ ਬਿਲਕੁੱਲ ਉਦੋਂ ਵਰਗੀ ਹੀ ਏ
ਜਿਹੜੇ ਤੂੰ ਘਰ ਦੀ ਛੱਤ ਤੇ ਬੈਠ ਕੇ
ਸਭ ਤੋਂ ਚੋਰੀ ਲਿਖੇ ਸੀ
ਬਸ ਜੇ ਹਾਲਤ ਵਿਗੜ ਰਹੀ ਏ ਤਾਂ ਖ਼ਤ ਦੇ ਕਿਨਾਰਿਆਂ ਦੀ
ਪਤਾ ਨਹੀਂ ਕਿਉਂ ਚਾਰੇ ਪਾਸਿਆਂ ਤੋਂ ਭੁਰਨੇ ਜੇ ਸ਼ੂਰੁ ਹੋ ਗਏ ਨੇ
ਇੰਝ ਵੀ ਨਹੀਂ ਕਿ ਮੈਂ ਉਹਨੂੰ
ਮੋੜ ਤੋੜ ਕੇ ਇਕ ਪਾਸੇ ਸੁੱਟਿਆ ਏ
ਬੜੀ ਸ਼ਾਨ ਆਪਣੀ ਇਕ ਡੇਅਰੀ ਵਿਚ ਰੱਖਿਆ ਏ
ਇਕ ਇਕ ਸ਼ਬਦ ਤੇਰੇ ਸਾਹਾਂ ਚੋਂ ਨਿਕਲਿਆ ਸੀ ਨਾ
ਤੇ ਕਈ ਵਾਰ ਜਦ ਮੈਂ ਡੇਅਰੀ ਖੋਲਦਾ ਹਾਂ ਤਾਂ
ਉਹ ਖ਼ਤ ਇੰਝ ਕਿਸੇ ਕਵਿਤਾ ਨਾਲ ਗਲ ਲੱਗਿਆ ਹੁੰਦਾ ਏ
ਜਿਵੇਂ ਤੇਰੇ ਤੇ ਮੇਰੇ ਸ਼ਬਦਾਂ ਨੂੰ ਵੀ
ਆਪਸ ਚ ਇਸ਼ਕ ਹੋ ਗਿਆ ਹੋਵੇ,
ਤੇ ਤੇਰੇ ਨਾਂ ਦਾ ਸੱਸਾ ਤੇ ਮੇਰੇ ਨਾਂ ਦੇ ਗੱਗਾ
ਆਪਸ ਵਿੱਚ ਇੰਝ ਗੱਲਾਂ ਕਰਦੇ ਨੇ
ਜਿਵੇਂ ਆਪਾਂ ਮਗਰੋਂ
ਤੇ ਉਹ ਪਹਿਲਾਂ ਮਿਲੇ ਹੋਣ।
ਗੁਰਜੰਟ ਤਕੀਪੁਰ

Brilliant Gurjant sir g Brilliant,............