ਨਿਰੋਲ ਕੂੜ ਦੇ ਸੰਘਣੇ ,ਹਨੇਰੇ ਜੰਗਲ ਵਿਚ
ਜੇ ਤੂੰ ਨਾ ਵੀਣੀਓਂ ਫੜ ਕੇ ਬਚਾ ਲਿਆ ਹੁੰਦਾ
ਮੇਰੇ ਹਰ ਰਾਜ਼ ਦੇ ਮਹਿਰਮ ਮੇਰਾ ਯਕੀਨ ਕਰੀਂ
ਤੇਰੇ ਖ਼ਿਆਲ ਨੂੰ ਗ਼ਫ਼ਲਤ ਨੇ ਖਾ ਲਿਆ ਹੁੰਦਾ

ਭਲਾ ਹੈ ਪਾਣੀਆਂ ਹੇਠਾਂ ਹਮੇਸ਼ਾ ਰੇਤ ਰਹੀ
ਭਲਾ ਹੈ ਭੇਤ ਦੀ ਇਹ ਗੱਲ ਹਮੇਸ਼ਾ ਭੇਤ ਰਹੀ
ਕਿ ਤੇਰਾ ਜ਼ਿਕਰ ਜੇ ਲਫ਼ਜ਼ਾਂ ਦੇ ਵਿਚ ਸਮਾ ਸਕਦਾ
ਤਾਂ ਹੁਣ ਨੂੰ ਕਹਿ ਲਿਆ ਹੁੰਦਾ, ਸੁਣਾ ਲਿਆ ਹੁੰਦਾ

ਭਲਾ ਹੈ ਰੇਤ ਦੇ ਹੇਠਾਂ ਲਰਜ਼ਦੇ ਪਾਣੀ ਸਨ
ਸੁਣਦੀਆਂ, ਦਿਸਦੀਆਂ ਚੀਜ਼ਾਂ ਮਹਿਜ਼ ਕਹਾਣੀ ਸਨ
ਨਹੀਂ ਤਾਂ ਪਾਠੀਆਂ ਪੁਸਤਕ 'ਚੋਂ ਪੜ੍ਹ ਲਿਆ ਹੁੰਦਾ
ਨਹੀਂ ਤਾਂ ਰਾਗੀਆਂ ਸਾਜ਼ਾਂ 'ਤੇ ਗਾ ਲਿਆ ਹੁੰਦਾ

ਮੇਰੇ ਖ਼ਾਬਾਂ ਦੇ ਵਿਚ ਪੱਥਰ ਦੀ ਇਕ ਪਰੀ ਆਈ
ਸੁਲਗਦੀ ਪਿਆਸ ਵੀ ਤਲੀਆਂ 'ਤੇ ਹੀ ਧਰੀ ਆਈ
ਮੇਰੇ ਕੰਢੇ 'ਤੋਂ ਜੇ ਪਿਆਸੀ ਹੀ ਪਰਤ ਜਾਂਦੀ ਤਾਂ
ਮੈਂ ਪਾਣੀ ਹੋਣ ਦਾ ਗੌਰਵ ਗਵਾ ਲਿਆ ਹੁੰਦਾ

ਝਗੜਦੇ, ਦੌੜਦੇ, ਖ਼ੁਦ ਨੂੰ ਹੀ ਠਿੱਬੀਆਂ ਲਾਉਂਦੇ
ਸਦਾ ਓਹੀ ਤੁਰੇ ਰਸਤੇ ਰਹੇ ਹਾਂ ਦੁਹਰਾਉਂਦੇ
ਨਿਕਲ ਕੇ ਭੀੜ 'ਚੋਂ ਕੰਢੇ 'ਤੇ ਰੁਕ ਗਏ ਹੁੰਦੇ
ਕਦੋਂ ਦਾ ਇਹ ਅਮੁੱਕ ਪੈਂਡਾ ਮੁਕਾ ਲਿਆ ਹੁੰਦਾ...

ਵਿਜੈ ਵਿਵੇਕ

ਨਿਹਾਇਤ ਹੀ ਸ਼ਾਨਦਾਰ |