ਮੇਰੇ ਮਹਿਬੂਬ
ਮੈਂ ਪਰਤਾਂਗਾ।
ਪਰਤਾਂਗਾ ਉਨ੍ਹਾਂ ਲਈ…
ਜੋ ਮੇਰੀਆਂ ਬਾਂਹਾਂ ਬਣੇ
ਧੁੱਪਾਂ ਵਿੱਚ ਛਾਂਵਾਂ ਬਣੇ
ਦੁੱਖਾਂ ਵਿੱਚ ਮਾਵਾਂ ਬਣੇ।
ਤੇ
ਬਚਾਈ ਰੱਖਿਆ
ਮੈਨੂੰ, ਮੇਰੀ ਹੋਂਦ ਨੂੰ
ਤੇਰੇ ਦਿੱਤੇ ਦੁੱਖਾਂ ਤੋਂ
ਕੰਡਿਆਲੇ ਰੁੱਖਾਂ ਤੋਂ
ਹਿਜਰ ਦੀਆਂ ਭੁੱਖਾਂ ਤੋਂ।
ਪਰ
ਤੂੰ ਨਾ ਸੋਚੀਂ।
ਕਿ
ਮੈਂ ਪਰਤਿਆ
ਤੈਨੂੰ ਵੇਖਣ ਲਈ
ਜੇ …
ਤੂੰ ਅਜਿਹਾ ਸੋਚਿਆ ਤਾਂ
ਗ਼ਲਤ ,ਬਿਲਕੁਲ ਗ਼ਲਤ
ਮੈਨੂੰ ਵੀ ਸਰ ਗਿਆ
ਮੇਰਾ ਊਣਾ ਪਾਸਾ ਭਰ ਗਿਆ
ਮੈਂ ਡੁੱਬਦਾ ਡੁੱਬਦਾ ਤਰ ਗਿਆ
ਜਿਨ੍ਹਾਂ ਦੀਆਂ ਦੁਆਵਾਂ ਨਾਲ।
ਮੈਂ ਪਰਤਾਂਗਾ ਉਨ੍ਹਾਂ ਲਈ
ਮੇਰੇ ਮਹਿਬੂਬ
ਮੈਂ ਪਰਤਾਂਗਾ…।

ਸੁਖਪਾਲ ਕਿੰਗਰਾ-ਸੰਪਰਕ: 95696-41013