ਟੁਟੀਆਂ ਤਾਰਾਂ

ਟੁਟੀਆਂ ਤਾਰਾਂ ਦੇ ਵਿਚੋਂ
ਸੰਗੀਤ ਅਜੇ ਵੀ ਉਭਰਦਾ ਹੈ
ਹੌਕੇ ਭਰਦੇ ਗੀਤਾਂ ਨੂੰ
ਸੰਗ ਟੁਟੀ ਤਾਰ ਦੇ ਸੁਰ ਦਾ ਹੈ

ਸਿਸਕਦੇ ਹੋਏ ਕੁਝ ਬੋਲ ਮੇਰੇ
ਤਰਜ਼ ਮਿਲਾਣ ਦੀ ਕਰਦੇ ਨੇ
ਡਿਗੀਆਂ ਹੋਈਆਂ ਮਹਿਰਾਬਾਂ ਨੂੰ ਫੜ
ਤਾਰ ਹਿਲਾਣ ਦੀ ਕਰਦੇ ਨੇ
ਸੋਗ ਦੇ ਵਾਯੂੰ-ਮੰਡਲ 'ਚ
ਜਸ਼ਨ ਮੋਇਆ ਜਿਹਾ ਛਿੜਦਾ ਹੈ

ਹੋਠਾਂ ਤੇ ਆਏ ਸ਼ਬਦਾਂ ਨੂੰ ਜਦ
ਫਿਰ ਮਰਦੇ ਹੋਏ ਦੇਖਦੀ ਹੈ
ਯਖ ਹੋ ਚੁਕੇ ਜਜਬਾਤਾਂ ਨੂੰ
ਇਕ ਤਪਸ਼ ਨਿੰਮਾ ਜਿਹਾ ਸੇਕਦੀ ਹੈ
ਮਾਤਮ ਦਾ ਇਕ ਕਾਫਲਾ ਦਿਲ 'ਚੋਂ
ਅਖਾਂ ਵਲ ਨੂੰ ਤੁਰਦਾ ਹੈ

ਸਾਹ ਮੇਰਾ ਫਿਰ ਗਾਂਦੇ ਗਾਂਦੇ
ਹਰ ਇਕ ਬੋਲ ਤੇ ਰੁਕਦਾ ਹੈ
ਪੀੜਾਂ ਦੇ ਨਾਲ ਭਰਿਆ ਹਰ ਬੋਲ
ਜਾਪਦਾ ਹੈ ਜਿਵੇਂ ਦੁਖਦਾ ਹੈ
ਦੀਪਕ ਰਾਗ ਦੀਆਂ ਲਾਟਾਂ ਅੰਦਰ
ਜਿਸਮ ਮੇਰਾ ਫਿਰ ਸੜਦਾ ਹੈ   

ਬਹੁਤ ਹੀ ਖੂਬਸੂਰਤ ਲਿਖਤ,,,,,,,,ਮਨ ਬਹੁਤ ਖੁਸ਼ ਹੋ ਗਿਆ ਪੜਕੇ,,,ਜੀਓ,,,

Realy .....ਇਕ਼ਬਾਲ ਜੀ .......ਫਿਰ ਤੋਂ ਬਹੁਤ ਖੂਬ.........

wah ji wah !! bahut khoob iqbal ji..