ਚਾਰੇ ਪਾਸੇ ਕਾਲਖ ਚੜ ਗਈ ,ਦੀਵਾ ਤੜਫ਼ ਰਿਹਾ ਕੋਈ
ਸੀ ਮੁੱਦਤ ਤੋਂ ਵੇਖਿਆ ਸੁਪਨਾਂ ,ਨੈਂਣੀਂ ਰੜਕ ਰਿਹਾ ਕੋਈ
ਖ਼ੁਦਗਰਜ਼ਾਂ ਦੀ ਮੰਡੀ ਦੇ ਵਿੱਚ ,ਵੇਚ ਕੇ ਸਭ ਅਰਮਾਨਾਂ ਨੂੰ
ਆਸਾਂ ਦੀ ਲੈ ਖਾਲੀ ਝੋਲੀ ,ਘਰ ਨੂੰ ਪਰਤ ਰਿਹਾ ਕੋਈ
ਜਿਗਰ ਦੇ ਟੋਟੇ ਭੁੱਖਣ-ਭਾਂਣੇ ,ਮਾਘ ਮਹੀਨੇਂ ਮੁੱਕੇ ਦਾਣੇ
ਹੰਝੂਆਂ ਦਾ ਨਿੱਤ ਪਾਣੀ ਪੀ-ਪੀ ,ਹੌਕਿਆਂ ਦੇ ਨਿੱਤ ਟੁੱਕਰ ਖਾਣੇਂ
ਜਿੰਦਗੀ ਦੇ ਬਾਗਾਂ ਵਿੱਚ ਲੱਗੇ ,ਕਰਮਾਂ ਦੇ ਫ਼ਲ ਸਾਰੇ ਕਾਣੇਂ
ਸੋਚਾਂ ਦੀ ਪੰਡ ਸਿਰ ਤੇ ਚੱਕੀ ,ਰੂਹ ਤੋਂ ਤੜਫ਼ ਰਿਹਾ ਕੋਈ
ਖ਼ੁਦਗਰਜ਼ਾਂ ਦੀ ਮੰਡੀ ਦੇ ਵਿੱਚ ,ਵੇਚ ਕੇ ਸਭ ਅਰਮਾਨਾਂ ਨੂੰ
ਆਸਾਂ ਦੀ ਲੈ ਖਾਲੀ ਝੋਲੀ ,ਘਰ ਨੂੰ ਪਰਤ ਰਿਹਾ ਕੋਈ
ਦਿਲ ਦੇ ਖਾਲੀ ਵੇਹੜੇ ਅੰਦਰ ,ਨਿੱਤ ਗਮੀਆਂ ਦਾ ਮੇਲਾ ਲੱਗਦਾ
ਏਧਰ ਕੁੱਲੀ ਦੀ ਛੱਤ ਚੋਵੇ ,ਓਧਰ ਮਹਿਲੀਂ ਰੋਗਨ ਲੱਗਦਾ
ਰੂਹ ਸਾਡੀ ਵਿੱਚ ਫ਼ਰਕ ਹੈ ਕੋਈ ,ਜਾਂ ਫ਼ਿਰ ਫ਼ਰਕ ਹੈ ਸਾਡੇ ਰੱਬ ਦਾ
ਦੇਵਣ ਵਾਲੇ ਦੀ ਵੰਡ ਕਾਣੀ ,ਉੱਤੇ ਹਰਖ ਰਿਹਾ ਕੋਈ
ਖ਼ੁਦਗਰਜ਼ਾਂ ਦੀ ਮੰਡੀ ਦੇ ਵਿੱਚ ,ਵੇਚ ਕੇ ਸਭ ਅਰਮਾਨਾਂ ਨੂੰ
ਆਸਾਂ ਦੀ ਲੈ ਖਾਲੀ ਝੋਲੀ ,ਘਰ ਨੂੰ ਪਰਤ ਰਿਹਾ ਕੋਈ
ਸਾਰੇ ਦਿਨ ਦਾ ਮੁੜਕਾ ਕੱਢ ਕੇ ,ਨਾਂ ਦੋ ਡੰਗਾਂ ਦਾ ਆਟਾ ਗੁੱਝੇ
ਮਨ ਦੀ ਚਾਦਰ ਛਲਨੀ ਹੋਈ ,ਡੰਗ ਲਾਚਾਰੀ ਮਾਰੇ ਗੁੱਝੇ
ਹੰਝੂਆਂ ਦੇ ਨਿੱਤ ਹਾਰ ਚੜਾਵਾਂ ,ਰੱਬ ਦੀ ਗੂੰਗੀ ਫ਼ੋਟੋ ਅੱਗੇ
" ਮਿੰਦਰਾ " ਜਿੰਦਗੀ ਜਿਉਂਦਾ ਏ ,ਜਾਂ ਭੋਗਦਾ ਨਰਕ ਪਿਆ ਕੋਈ
ਖ਼ੁਦਗਰਜ਼ਾਂ ਦੀ ਮੰਡੀ ਦੇ ਵਿੱਚ ,ਵੇਚ ਕੇ ਸਭ ਅਰਮਾਨਾਂ ਨੂੰ
ਆਸਾਂ ਦੀ ਲੈ ਖਾਲੀ ਝੋਲੀ ,ਘਰ ਨੂੰ ਪਰਤ ਰਿਹਾ ਕੋਈ
..............ਗੁਰਮਿੰਦਰ ਸੈਣੀਆਂ.............
|
