ਮਾਲਾ ਦੇ ਮਣਕੇ,ਤੇਰੇ ਨਾਂ ਦੀ ਗਿਣਤੀ,ਗਿਣਤੀ ਵਿੱਚ ਤੁੱਲ ਕੋਈ ਨਾ
ਸੋਨੇ ਦੀ ਕੀਮਤ,ਹੀਰੇ ਦਾ ਮੁੱਲ ਹੈ,ਇਸ਼ਕੇ ਦਾ ਮੁੱਲ ਕੋਈ ਨਾ
ਸੱਜਣਾਂ ਦੇ ਨਾਂ ਤੋਂ ਜੋ ਜਿਆਦਾ ਮਹਿਕੇ ਦੁਨੀਆਂ ਵਿੱਚ ਫੁੱਲ ਕੋਈ ਨਾ
ਦੁਨੀਆਂ ਤੇ ਦੇਬੀ ਸੋਹਣੇ ਤੋਂ ਸੋਹਣੇ ਪਰ ਤੇਰੇ ਤੁੱਲ ਕੋਈ ਨਾ

ਇਸ਼ਕ ਨੇ ਦੇਬੀ ਮਾਰੇ ਕਈ ਵਿਚਾਰੇ ਫਿਰਨ ਕੁਆਰੇ
ਵਿਛੜਣ ਯਾਰ ਪਿਆਰੇ ਲਾ ਕੇ ਲਾਰੇ ਨਾ ਮਿਲਣ ਦੁਬਾਰੇ
ਜਿਨ੍ਹਾਂ ਨੇ ਲਾਈਆਂ ਅੱਖਾਂ ਰੁੱਲ ਗਏ ਲੱਖਾਂ ਵਾਂਗਰਾਂ ਕੱਖਾਂ
ਇਸ਼ਕ ਮੁਕਦਮੇ ਭਾਰੇ ਬਹੁਤੇ ਹਾਰੇ ਗਿਣਦੇ ਤਾਰੇ

ਬਹੁਤ ਵਧੀਆ ਬਾਈ ਜੀ

🙏🙏🙏🙏🙏

ਤੇਜਜੋਤ ਸਿਆਂ ਤਿਹ ਲਾਈ ਪਈ ਐ.. ਬੱਲੇ

 

ਅੰਦਰ ਦੀ ਤਕਲੀਫ਼ ਨੂੰ ਸਦਾ ਛੁਪਾ ਕੇ ਮਿਲਦਾ ਹਾਂ,

ਮੈਂ ਹਰੇਕ ਮੁਸੀਬਤ ਨੂੰ ਮੁਸਕਰਾ ਕੇ ਮਿਲਦਾ ਹਾਂ,

ਮੇਰਾ ਪਹਿਲਾਂ ਆਖ਼ਿਰੀ ਇਸ਼ਕ ਹੈ ਮਾਨਵਤਾ,ਓਸਨੂੰ

ਰੰਗ,ਜਾਤ,ਮਜ਼ਬਾਂ ਦੀਆਂ ਕੰਧਾਂ ਢਾਹ ਕੇ ਮਿਲਦਾ ਹਾਂ,

 

#ਦੇਬੀ ਲਾਈਵ ੮ 

 

ਦੇਬੀ ਲਾਈਵ 8 ਵਿੱਚੋਂ
ਜ਼ਿੰਦਗੀ

ਲੰਮੀ ਜਿਹੀ ਬਾਤ ਵਾਂਗੂ ਮੁੱਕਦੀ ਨਹੀਂ ਰੁੱਖੀ ਹੋ ਗਈ ਏ ਜ਼ਿੰਦਗੀ ਸਜਾ ਵਾਂਗਰਾਂ
ਦੁੱਖਾਂ ਨਾਲ ਭਰੇ ਡੱਕੇ ਉੱਠ ਜਾਂਵਾਂਗੇ ਮਾਰੂਥਲਾਂ ਉੱਤੋਂ ਲੰਘਦੀ ਘਟਾ ਵਾਂਗਰਾਂ

ਕੱਟੀ ਜ਼ਿੰਦਗੀ ਕਿਰਾਏ ਦੇ ਮਕਾਨ ਦੀ ਤਰ੍ਹਾਂ
ਜਿਉਂਦੇ ਰਹੇ ਕਿਸੇ ਉੱਤੇ ਅਹਿਸਾਨ ਦੀ ਤਰ੍ਹਾਂ
ਜ਼ਿੰਦਗੀ ਦੇ ਨਾਲ ਵੀ ਨਿਭਾਉਂਣੀ ਇੰਝ ਪਈ ਕਿਸੇ ਮਾੜੇ ਸਾਕ ਨਾਲ ਪਏ ਵਾਹ ਵਾਂਗਰਾਂ
ਰੁੱਖੀ ਹੋ ਗਈ ਏ

ਲੋਕ ਨਿਰਮੋਹੇ ਕਿਸੇ ਦੀ ਨਾ ਬਾਂਹ ਫੜ੍ਹ ਦੇ
ਨ੍ਹੇਰੇ ਵਿੱਚ ਪਰਛਾਵੇਂ ਕਦੋਂ ਨਾਲ ਖੜ੍ਹ ਦੇ
ਦੁਨੀਆਂ ਦੇ ਨਾਲ ਨਹੀਂਉ ਆਸ਼ਕਾਂ ਦੀ ਬਣੀ ਮੁੱਢੋਂ ਸੋਕਣਾਂ ਦੇ ਚੰਦਰੇ ਸੁਭਾਅ ਵਾਂਗਰਾਂ
ਰੁੱਖੀ ਹੋ ਗਈ ਏ

ਗਮ ਵੱਧਦਾ ਸੀਨੇ ਜਿਵੇਂ ਖੇਤੀ ਔਤ ਦੀ
ਹੋਵੇ ਜੀਹਦੇ ਚ ਖਬਰ ਜੰਮਨੇ ਤੇ ਮੌਤ ਦੀ
ਓਸ ਖਤ ਜਿਹੀ ਤਕਦੀਰ ਸਾਡੀ ਜਾਂ ਫੇ ਦਿੱਤੀ ਰੋਗੀ ਨੂੰ ਕੋਈ ਆਖਰੀ ਦਵਾ ਵਾਂਗਰਾਂ
ਰੁੱਖੀ ਹੋ ਗਈ ਏ

ਚੱਲੋ ਲਿਖਿਆ ਸੀ ਲੇਖਾਂ ਵਿੱਚ ਬਦਨਾਮ ਹੋਣਾ
ਹੋਏ ਬਿਨਾਂ ਕੁੱਝ ਕੀਤੇ ਏਸ ਗੱਲ ਦਾ ਏ ਰੋਣਾ
ਖੁਸ਼ ਰਹਿਣ ਦੇਬੀ ਉਹ ਸਾਡੇ ਜੋ ਖਿਲਾਫ਼ ਗਏ ਭੁਗਤ ਸੀ ਨਕਲੀ ਗਵਾਹ ਵਾਂਗਰਾਂ
ਰੁੱਖੀ ਹੋ ਗਈ ਏ

ਦੇਬੀ ਲਾਈਵ 8 ਵਿੱਚੋਂ - ਕਿਤੇ ਕੰਮ ਆਉਣਗੇ

ਬੁੱਲ੍ਹਾਂ ਉੱਤੇ ਹਾਸੇ ਤੂੰ ਸਜਾ ਕੇ ਰੱਖ ਕਿਤੇ ਕੰਮ ਆਉਣਗੇ
ਸੱਜਣਾਂ ਦੇ ਨਾਲ ਤੂੰ ਬਣਾ ਕੇ ਰੱਖ ਕਿਤੇ ਕੰਮ ਆਉਣਗੇ

ਆਪਣੀ ਅਕਲ ਬਹੁਤੀ ਸਿਰ ਨਹੀਂ ਚੜਾਈ ਦੀ
ਕਦੇ ਕਦੇ ਦਿਲ ਦੀ ਵੀ ਮੰਨ ਲੈਣੀ ਚਾਹੀਦੀ
ਦਿਲਾਂ ਵਾਲਿਆਂ ਨਾਲ ਦਿਲ ਲਾ ਕੇ ਰੱਖ ਕਿਤੇ ਕੰਮ ਆਉਣਗੇ

ਆਕੜ ਹੰਕਾਰ ਤਾਂ ਵਿਗਾੜ ਦਿੰਦੇ ਰਿਸ਼ਤੇ
ਵਫ਼ਾ ਤੇ ਹਲੀਮੀ ਸਿਰੇ ਚਾੜ੍ਹ ਦਿੰਦੇ ਰਿਸ਼ਤੇ
ਥੋੜੇ ਬਹੁਤੇ ਰਿਸ਼ਤੇ ਬਚਾ ਕੇ ਰੱਖ ਕਿਤੇ ਕੰਮ ਆਉਣਗੇ

ਸੁੱਖ ਨਾਲ ਉਹਦੇ ਨਾਲ ਖਲੋਣ ਵਾਲੇ ਬੜੇ
ਦੇਬੀ ਦਿਆਂ ਦੁੱਖਾਂ ਵਿੱਚ ਰੋਣ ਵਾਲੇ ਬੜੇ
ਮਹਿੰਗੇ ਹੰਝੂ ਆਪਣੇ ਬਚਾ ਕੇ ਰੱਖ ਕਿਤੇ ਕੰਮ ਆਉਣਗੇ

ਤੇਰਾ ਜਵਾਬ ਹੋਰ ਹੈ ਮੇਰਾ ਸਵਾਲ ਹੋਰ ਸੀ
ਮੇਰੀ ਬਾਜ਼ੀ ਹੋਰ ਹੈ ਪਰ ਤੇਰੀ ਚਾਲ ਹੋਰ ਸੀ
ਰਿਸ਼ਤਾ ਬਹੁਤ ਦੂਰ ਤੱਕ ਜਾਣਾ ਨਹੀਂ ਸੀ ਆਪਣਾ
ਤੇਰੀ ਗੇਮ ਹੋਰ ਹੈ ਦੇਬੀ ਦਾ ਖਿਆਲ ਹੋਰ ਸੀ

ਤੇਰੇ ਹਿੱਸੇ ਜਿੰਨੇ ਵੀ ਮੁਨਾਫ਼ੇ ਆਉਂਦੇ ਸਾਂਭ ਲੈ ਤੂੰ ਕਿਸੇ ਦਾ ਉਠਾ ਕੇ ਨੁਕਸਾਨ ਅਸੀਂ ਚੱਲੇ ਆਂ
ਗਿਣੀ ਜਾਈਂ ਭਾਵੇਂ ਸਾਰੀ ਜ਼ਿੰਦਗੀ ਹੀ ਬੈਠ ਕੇ ਤੂੰ ਐਨੇ ਕੁ ਤਾਂ ਕਰਕੇ ਅਹਿਸਾਨ ਅਸੀਂ ਚੱਲੇ ਆਂ

ਲੋੜ ਵੇਲੇ ਯਾਰਾਂ ਦੀਆਂ ਪੌੜੀਆਂ ਬਣਾਈਆਂ ਨਾ
ਰਿਸ਼ਤੇ ਕਮਾਉਂਦੇ ਰਹੇ ਕੀਤੀਆਂ ਕਮਾਈਆਂ ਨਾ
ਸਾਥੋਂ ਸਿੱਖ ਸਾਥੋਂ ਪੁੱਛ ਬਾਜ਼ੀ ਖੇਡੀ ਜਿੱਤ ਵੀ ਗਏ ਉਹੀ ਸਾਨੂੰ ਕਹਿੰਦੇ ਨੇ ਨਾਦਾਨ ਅਸੀ ਚੱਲੇ ਆਂ
ਗਿਣੀ ਜਾਈਂ ਭਾਵੇਂ ਸਾਰੀ ਜ਼ਿੰਦਗੀ

ਮੁੱਦਤਾਂ ਤੋਂ ਬੋਲ ਸਾਡੇ ਪੌਣਾਂ ਵਿੱਚ ਗੂੰਜਦੇ
ਆਸ਼ਕਾਂ ਦੇ ਨੈਣਾਂ ਵਿੱਚੋਂ ਹੰਝੂ ਰਹਿੰਦੇ ਪੂੰਝਦੇ
ਸਦੀਆਂ ਵੇਖਣ ਗਈਆਂ ਵਕਤ ਦੇ ਪਿੰਡੇ ਉੱਤੇ ਐਨੇ ਗੂੜ੍ਹੇ ਛੱਡ ਕੇ ਨਿਸ਼ਾਨ ਅਸੀਂ ਚੱਲੇ ਆਂ
ਗਿਣੀ ਜਾਈਂ ਭਾਵੇਂ ਸਾਰੀ ਜ਼ਿੰਦਗੀ

ਕਿੰਨੇ ਹੱਲੇ ਹੋਏ ਮੇਰਾ ਦਿਲ ਐਸੀ ਥਾਂ ਹੈ
ਕੱਲੇ ਕੱਲੇ ਜ਼ਖਮ ਤੇ ਅੱਢੋ ਅੱਢ ਨਾਂ ਹੈ
ਮੁੱਢੋਂ ਸੋਫੀਆਂ ਨੇ ਹੁਣ ਤਾਂਈਂ ਕਿੰਨਾ ਖੂਨ ਪੀਤਾ ਖੂਨ ਨਾਲ ਲਿਖ ਕੇ ਬਿਆਨ ਅਸੀਂ ਚੱਲੇ ਆਂ
ਗਿਣੀ ਜਾਈਂ ਭਾਵੇਂ ਸਾਰੀ ਜ਼ਿੰਦਗੀ

ਖੁਸ਼ ਰਹਿਣ ਦੇਬੀ ਉਹ ਚੋਟਾਂ ਜੀਹਨਾਂ ਮਾਰੀਆਂ
ਮੁੱਕੇ ਸਾਰੇ ਲੇਖੇ ਮੁੱਕ ਗਈਆਂ ਦੇਣਦਾਰੀਆਂ
ਮੁੱਕੇ ਹੁਣ ਕੰਮ ਸਾਰੇ ਤੇਰਾ ਧੰਨਵਾਦ ਰੱਬਾ ਆ ਲੈ ਚੁੱਕ ਆਪਣੀ ਤੂੰ ਜਾਨ ਅਸੀਂ ਚੱਲੇ ਆਂ
ਗਿਣੀ ਜਾਈਂ ਭਾਵੇਂ ਸਾਰੀ ਜ਼ਿੰਦਗੀ

ਆਪਣੀ ਛਾਂ ਨੂੰ ਛੂੰਹਦੀ ਫਿਰਦੀ
ਮਿੱਤਰਾਂ ਦੀ ਹਿੱਕ ਲੂੰਹਦੀ ਫਿਰਦੀ
ਨੀ ਤੇਰਾ ਨਖਰਾ ਜਹਾਨੋਂ ਵੱਖਰਾ ਰਹਿੰਦਾ ਹਾਣਦਿਆਂ ਨੂੰ ਹੱਥਾਂ ਉੱਤੇ ਚਾਰਦਾ ਕੁੜੀਏ
ਨੀ ਤੇਰਾ ਕੋਕਾ ਇਸ਼ਕ ਦਾ ਹੋਕਾ ਨੀ ਤੇਰੀ ਝਾਂਜਰ ਦਾ ਛਣਕਾਟਾ ਵਾਜਾਂ ਮਾਰਦਾ ਕੁੜੀਏ

ਜਦ ਬਿੱਲੀਆਂ ਅੱਖਾਂ ਦੇ ਤੀਰ ਛੂਹਕਦੇ ਆਉਂਦੇ ਨੀ
ਫਿਰ ਭੱਜ ਭੱਜ ਲੋਕੀਂ ਆਪਣੀ ਜਾਨ ਬਚਾਉਂਦੇ ਨੀ
ਨੀ ਤੇਰਾ ਨੱਚਣਾ ਕਸੂਤਾ ਤੱਕਣਾ ਗਲੇ ਦੇ ਗੱਭਰੂ ਦੇ ਲੱਗ ਜਾਂਦਾ ਫੱਟ ਤਲਵਾਰ ਦਾ ਕੁੜੀਏ
ਨੀ ਤੇਰਾ ਕੋਕਾ ਇਸ਼ਕ ਦਾ ਹੋਕਾ

ਤੂੰ ਪੋਜ ਬਣਾਉਂਦੀ ਸ਼ੀਸ਼ੇ ਮੂਹਰੇ ਖੜ੍ਹਕੇ ਨੀ
ਤੇਰਾ ਸੁਰਮਾਂ ਖਬਰੇ ਕਿੰਨੀਆਂ ਅੱਖਾਂ ਵਿਚ ਰੜਕੇ ਨੀ
ਗੁੱਤ ਘੁੰਮਾਉਂਦੀ ਕਿੱਧਰੋਂ ਆਉਂਦੀ ਹਰ ਦਮ ਚਰਚਾ ਛਿੜਿਆ ਰਹਿੰਦਾ ਤੇਰੇ ਭਾਰ ਦਾ ਕੁੜੀਏ
ਨੀ ਤੇਰਾ ਕੋਕਾ ਇਸ਼ਕ ਦਾ ਹੋਕਾ

ਤੇਰੀ ਠੋਡੀ ਦਾ ਪੰਜ ਦਾਣਾ ਬਾਤਾਂ ਪਾਉਂਂਦਾ ਨੀ
ਨਾਲੇ ਬੁੱਝਦਾ ਦੇਬੀ ਨਾਲੇ ਸ਼ਰਤਾਂ ਲਾਉਂਦਾ ਨੀ
ਗੱਲਾਂ ਗੁੱਝੀਆਂ ਅਸਾਂ ਤੱਕ ਪੁੱਜੀਆਂ ਤੇਰੇ ਲਾਰਿਆਂ ਦੇ ਨਾਲ ਹੁਣ ਤੱਕ ਵਕਤ ਗੁਜਾਰ ਦਾ ਕੁੜੀਏ
ਨੀ ਤੇਰਾ ਕੋਕਾ ਇਸ਼ਕ ਦਾ ਹੋਕਾ