ਉਹਦੇ ਦਿਉਰ ਦਾ ਵਿਆਹ
ਉਹਨੂੰ ਗੋਡੇ ਗੋਡੇ ਚਾਅ
ਭਾਬੀ ਖੁਸ਼ੀ ਵਿੱਚ ਹੱਸਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਝਾਂਜਰਾਂ ਦੀ 'ਵਾਜ ਸਾਰੀ ਬੀਹੀ ਵਿੱਚ ਆਉਂਦੀ ਆ
ਨੱਚਦੀ ਉਹ ਲੱਕ ਨੂੰ ਸਤਾਰਾਂ ਵਲ਼ ਪਾਉਂਦੀ ਆ
ਮੇਰੇ ਘਰ ਸੋਹਣੀ ਜਿਹੀ ਦਰਾਣੀ ਅੱਜ ਆਉਣੀ
ਚਾਅ ਡੁੱਲ੍ਹਦੇ ਨੂੰ ਡੱਕਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਕਿਸੇ ਨੂੰ ਜਵਾਬ ਦੇਣਾ ਬੋਲੀਆਂ ਦਾ ਆਵੇ ਨਾ
ਮੇਲਣਾਂ ਤੋਂ ਉਹਦੇ ਨਾਲ ਨੱਚਿਆਂ ਵੀ ਜਾਵੇ ਨਾ
ਮੇਲਣਾਂ ਦੀਆਂ ਤਾਂ ਸੱਚੀਂ ਕੱਪੜੇ ਦੇ ਵਾਂਗੂੰ
ਉਹੋ ਤੈਹਾਂ ਲਾ ਕੇ ਰੱਖਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਭੁੱਲਦੀ ਨਾ ਚੇਤਾ ਕਿਸੇ ਸ਼ਗਨ ਮਨਾਉਣ ਦਾ
ਚਾਅ ਉਹਨੂੰ ਸੁਰਮਾ ਦਿਉਰ ਦੇ ਹੈ ਪਾਉਣ ਦਾ
ਕਿਹੜੀ ਗੱਲ ਕਰਨੀ ਤੇ ਕਰਨੀ ਨ੍ਹੀ ਕਿਹੜੀ
ਉਹਦੇ ਕੰਨ ਵਿੱਚ ਦੱਸਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਉਹਦੇ ਅੱਗੇ ਮੜ੍ਹਕ ਕੁਆਰੀਆਂ ਦੀ ਫਿੱਕੀ ਆ
ਹਰ ਅੱਖ ਕੈਮਰੇ ਦੇ ਵਾਂਗ ਉਥੇ ਟਿਕੀ ਆ
ਲੱਭਦਾ ਸ਼ਰਾਬੀ ਹੋਇਆ ਉਸਨੂੰ ਵਿਆਹ 'ਚ
ਦੇਬੀ ਵੀਰੇ ਕੋਲੋਂ ਬੱਚਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਜਿਹਨੂੰ ਉਂਗਲਾਂ ਤੇ ਗਿਣ ਕੇ ਉਡਕਦੇ ਸੀ ਘੜੀ ਉਹੋ ਆਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਵੀਰੇ ਭਾਬੀ ਦੀ ਸ਼ਕੀਨੀ ਦੀ ਨਾ ਝਾਲ ਝੱਲੀ ਜਾਵੇ
ਕਿਹੜਾ ਦੋਹਾਂ ਵਿੱਚੋਂ ਵੱਧ ਸੋਹਣਾ ਸਮਝ ਨਾ ਆਵੇ
ਜੋੜੀ ਰੱਬ ਤੇ ਵਿਚੋਲਿਆਂ ਨੇ ਚੰਗੀ ਤਰ੍ਹਾਂ ਵੇਖ ਕੇ ਬਣਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਤੇਰੇ ਯਾਰਾਂ ਪਾ ਕੇ ਭੰਗੜਾ ਕਰਾਤੀ ਬੱਲੇ ਬੱਲੇ
ਸਾਰੇ ਖੁਸ਼ੀ ਵਿੱਚ ਨੱਚਦੇ ਸ਼ੌਦਾਈ ਹੋ ਚੱਲੇ
ਜਿਹੜੇ ਹੱਥ ਵੀ ਸ਼ਰਾਬ ਨੂੰ ਨਾ ਲਾਉਂਦੇ ਅੱਜ ਉਹਨਾਂ ਨੂੰ ਪਿਆਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਤੇਰੇ ਸਿਰ ਉੱਤੇ ਪੰਡ ਜ਼ਿੰਮੇਵਾਰੀਆਂ ਦੀ ਪੈਣੀ
ਹੁਣ ਪਹਿਲਾਂ ਵਾਲੀ ਮਿੱਤਰਾ ਅਜ਼ਾਦੀ ਨਹੀਉਂ ਰਹਿਣੀ
ਹੁੰਦੀ ਉਮਰਾਂ ਦੀ ਜੇਲ ਵੇ ਕਬੀਲਦਾਰੀ ਮਿਲੇ ਨਾ ਰਿਹਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਦੇਬੀ ਇਕ ਬੁੱਤ ਹੋਈਆਂ ਅੱਜ ਦੋ ਤਸਵੀਰਾਂ
ਇੱਕ ਮੱਥੇ ਵਿੱਚ ਆਈਆਂ ਅੱਜ ਦੋ ਤਕਦੀਰਾਂ
ਹਰ ਕੰਮ 'ਚ ਤਰੱਕੀ ਕਰੇ ਰੱਬ ਤੇਰੀ ਦੁੱਗਣੀ ਕਮਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਗੱਲੀ ਬਾਤੀ ਜਾਨ ਜੋ ਵਾਰੇ ਉਹਦੇ ਕੋਲੋਂ ਬਚ ਕੇ ਰਹਿਣਾ
ਲੋੜ ਪੈਣ ਤੇ ਖੜ੍ਹਦਾ ਨਹੀਂਉ ਵਕਤ ਪਵੇ ਤਾਂ ਪਾਸ ਨਹੀਂ ਹੁੰਦਾ
ਪੈਰਾਂ ਦੀ ਜੋ ਧੂੜ ਕਹਾਵੇ ਅਸਲ ਚ ਸਿਰ ਤੇ ਬਹਿਣਾ ਚਾਹੁੰਦਾ
ਹਰ ਇੱਕ ਦਾ ਜੋ ਦਾਸ ਕਹਾਵੇ ਕਦੇ ਕਿਸੇ ਦਾ ਦਾਸ ਨਹੀਂ ਹੁੰਦਾ
ਕੁਰਸੀ ਉਹੀਉ ਨਾਮ ਬਦਲਦੇ ਜਾਂ ਪੱਗਾਂ ਦੇ ਰੰਗ ਬਦਲਦੇ
ਵਿੱਚ ਪੰਜਾਬ ਦੇ ਵੋਟਾਂ ਮਗਰੋਂ ਹੋਰ ਫ਼ਰਕ ਕੋਈ ਖਾਸ ਨਹੀਂ ਹੁੰਦਾ
ਤਵਾਰੀਖ਼ ਵੀ ਜ਼ਿਕਰ ਹੈ ਕਰਦੀ ਬਸ ਰਾਜੇ ਮਹਾਰਾਜਿਆਂ ਦਾ ਹੀ
ਦੇਬੀ ਸਾਡੇ ਜਿਹੇ ਗਰੀਬਾਂ ਦਾ ਕੋਈ ਇਤਿਹਾਸ ਨਹੀਂ ਹੁੰਦਾ

ਅੱਜ ਕੱਲ ਬਾ ਵਫ਼ਾ ਘੱਟ ਬੇਵਫ਼ਾ ਜ਼ਿਆਦਾ ਮਿਲਦੇ ਨੇ
ਖੁਸ਼ ਤਾਂ ਟਾਵੇਂ ਟਾਵੇਂ ਹੀ ਖਫ਼ਾ ਜ਼ਿਆਦਾ ਮਿਲਦੇ ਨੇ
ਮੱਲੋ ਮੱਲੀ ਦੇ ਕਈ ਖ਼ੈਰ ਖੁਆਹ ਜ਼ਿਆਦਾ ਮਿਲਦੇ ਨੇ
ਰਾਹ ਤੋਂ ਭਟਕੇ ਹੋਏ ਰਹਿਨੁਮਾ ਜ਼ਿਆਦਾ ਮਿਲਦੇ ਨੇ
ਅਸਲੀ ਚਿਹਰਾ ਲੈਕੇ ਕੋਈ ਕੋਈ ਸਾਹਮਣੇ ਆਉਂਦਾ
ਨਕਾਬ ਦੋਸਤੀ ਵਾਲੇ ਚੜ੍ਹਾ ਜ਼ਿਆਦਾ ਮਿਲਦੇ ਨੇ
ਜਿਨ੍ਹਾਂ ਦੀ ਥੋੜ ਵੀ ਹੈ ਲੋੜ ਵੀ ਹੈ ਅਜਲ ਤੋਂ ਦਿਲ ਨੂੰ
ਉਹ ਮਿਲਦੇ ਨਹੀਂ ਪਰ ਖਾਹ ਮਖਾਹ ਜ਼ਿਆਦਾ ਮਿਲਦੇ ਨੇ
ਦਿਲ ਦਿੰਦੇ ਨਹੀਂ ਲੈਂਦੇ ਨਹੀਂ ਸੱਜਦੇ ਕਰਾਉਂਦੇ ਨੇ
ਸਨਮ ਦੇ ਰੂਪ ਵਿੱਚ ਦੇਬੀ ਖ਼ੁਦਾ ਜ਼ਿਆਦਾ ਮਿਲਦੇ ਨੇ

ਤੂੰ ਮੰਜ਼ਿਲ ਤੇ ਪਹੁੰਚ ਗਈ ਸਾਨੂੰ ਰਾਹ ਚ ਤਬਾਹੀਆਂ ਮਿਲ ਗਈਆਂ
ਦੋਲਤ ਤੇ ਸ਼ੌਹਰਤ ਤੇਰੇ ਲਈ ਸਾਨੂੰ ਰੁਸਵਾਈਆਂ ਮਿਲ ਗਈਆਂ
ਨੀ ਸੱਚਿਆਂ ਹੋਣ ਲਈ ਝੂੱਠੀਆਂ ਜੋ ਖਬਰਾਂ ਤੂੰ ਉਡਾਰੀਆਂ ਮਿਲ ਗਈਆਂ
ਬਰਬਾਦੀ ਤੇ ਜੋ ਘੱਲੀਆਂ ਤੂੰ ਦੇਬੀ ਨੂੰ ਵਧਾਈਆਂ ਮਿਲ ਗਈਆਂ

ਜਿੰਨ੍ਹਾਂ ਨੂੰ ਦਿਲ ਵਿੱਚ ਕਿੰਨੇ ਵਰ੍ਹੇ ਬਿਠਾ ਛੱਡਿਆ ਵਾਹ ਨੀ ਤਕਦੀਰੇ ਉਨ੍ਹੀਂ ਜੜਾਂ ਵਿੱਚ ਬਹਿਣਾ ਸੀ
ਔਹ ਸੱਜਣ ਬੈਠੇ ਬੁੱਕਲ ਦੇ ਵਿੱਚ ਗੈਰਾਂ ਦੇ ਬਸ ਇਹ ਵੇਖਣ ਲਈ ਮਿੱਤਰਾਂ ਜਿਉਂਦੇ ਰਹਿਣਾ ਸੀ

ਜਿੰਨ੍ਹਾਂ ਨੂੰ ਵਾਅਦਾ ਯਾਦ ਨਹੀਂ ਭੁੱਲ ਜਾਣਾ ਏ ਸਿਰਨਾਵਾਂ ਵੀ
ਉਨ੍ਹਾਂ ਦੇ ਦੁਆਲੇ ਭੀੜਾਂ ਨੇ ਸਾਡੇ ਨਾਲ ਨਹੀਂ ਪਰਛਾਵਾਂ ਵੀ
ਇੱਕ ਦਿਨ ਸੀ ਜਿਹੜੇ ਨਜ਼ਰਾਂ ਵਿੱਚੋਂ ਡਿੱਗ ਪਏ ਉਨ੍ਹਾਂ ਨੇ ਆਖਿਰ ਦਿਲ ਤੋਂ ਵੀ ਤਾਂ ਲਹਿਣਾ ਸੀ
ਔਹ ਸੱਜਣ ਬੈਠੇ ਬੁੱਕਲ ਦੇ ਵਿੱਚ ਗੈਰਾਂ ਦੇ ਬਸ ਇਹ ਵੇਖਣ ਲਈ ਮਿੱਤਰਾਂ ਜਿਉਂਦੇ ਰਹਿਣਾ ਸੀ

ਸਾਡੀ ਗਿਣਤੀ ਹੈ ਉਹਨਾਂ ਚ ਜੋ ਸੱਚੇ ਸੀ ਬਦਨਾਮ ਰਹੇ
ਕੀਤੇ ਸੀ ਜ਼ੁਰਮ ਮਸ਼ੂਕਾਂ ਨੇ ਸਿਰ ਆਸ਼ਕਾਂ ਦੇ ਇਲਜਾਮ ਰਹੇ
ਹੋਠਾਂ ਤੇ ਉਂਗਲ ਧਰ ਲਈ ਚੁੱਪ ਕਰਾ ਛੱਡਿਆ ਹੈ ਰੱਬ ਜਾਣਦਾ ਆਪਾਂ ਕੀ ਕੀ ਕਹਿਣਾ ਸੀ
ਔਹ ਸੱਜਣ ਬੈਠੇ ਬੁੱਕਲ ਦੇ ਵਿੱਚ ਗੈਰਾਂ ਦੇ ਬੱਸ ਇਹ ਵੇਖਣ ਲਈ ਮਿੱਤਰਾਂ ਜਿਉਦੇ ਰਹਿਣਾ ਸੀ

ਚਾਹਤ ਨਾ ਨਿਕਲੀ ਸਾਡੇ ਚੋ ਨਾ ਉਹਨਾ ਚੋ ਬੇਇਮਾਨੀ ਗਈ
ਇਹ ਇਸ਼ਕ ਮੁਕਦਮੇ ਲੰਬੇ ਸਨ ਗਰੀਬਾਂ ਦੀ ਲੱਗ ਜਵਾਨੀ ਗਈ
ਜੋ ਜਾਨ ਜਾਨ ਕਹਿੰਦੇ ਸੀ ਜਾਨੋ ਮਾਰ ਗਏ ਤੇ ਦੇਬੀ ਨੇ ਇਹ ਜੁਲਮ ਜਾਨ ਤੇ ਸਹਿਣਾ ਸੀ
ਔਹ ਸੱਜਣ ਬੈਠੇ ਬੁੱਕਲ ਦੇ ਵਿੱਚ ਗੈਰਾਂ ਦੇ ਬਸ ਇਹ ਵੇਖਣ ਲਈ ਮਿੱਤਰਾਂ ਜਿਉਂਦੇ ਰਹਿਣਾ ਸੀ

ਫੂਕ ਮਾਰ ਕੇ ਹਰ ਇੱਕ ਫ਼ਿਕਰ ਉਡਾਈ ਜਾ
ਮੌਤ ਨਹੀਂ ਜਦ ਤੱਕ ਆਉਂਦੀ ਜਸ਼ਨ ਮਨਾਈ ਜਾ
ਸਾਹਾਂ ਵਾਲੀ ਮਾਲਾ ਜਿਸ ਨੇ ਬਖਸ਼ੀ ਏ
ਹਰ ਮਣਕੇ ਨਾਲ ਉਹਦਾ ਨਾਮ ਧਿਆਈ ਜਾ
ਤਰਸ ਕਦੇ ਤਾਂ ਖਾਉ ਕਦੇ ਤਾਂ ਖੋਲੂਗਾ
ਬੈਠਾਂ ਜਿਹੜੇ ਦਰ ਬੂਹਾ ਖੜਕਾਈ ਜਾ
ਸਾਰਿਆਂ ਨੂੰ ਖੁਸ਼ ਕਰਨਾ ਅੱਜ ਕੱਲ ਔਖਾ ਏ
ਯਾਰ ਜੇ ਹੱਸ ਕੇ ਬੋਲੇ ਸ਼ੁਕਰ ਮਨਾਈ ਜਾ
ਸੁੱਕੇ ਟੁੱੱਕ ਗਮਾਂ ਦੇ ਕਿਸਮਤ ਵਿੱਚ ਲਿਖੇ
ਕੋਸੇ ਹੰਝੂਆਂ ਵਿੱਚ ਡੋਬ ਕੇ ਖਾਈ ਜਾ
ਤੇਰੇ ਨਾਲੋਂ ਵੱਧ ਦੁੱਖੀ ਨੇ ਦੁਨੀਆਂ ਤੇ
ਵੇਖ ਉਹਨਾਂ ਵੱਲ ਦੇਬੀ ਵਕਤ ਲੰਘਾਈ ਜਾ

ਮੁੱਦਤ ਬੀਤੀ ਇੱਕ ਦੂਜੇ ਨਾਲ ਰੁੱਸਿਆਂ ਨੂੰ ਕੋਈ ਦਰਦੀ ਸੁਲਾਹ ਕਰਾਉਣ ਨਹੀਂ ਆਇਆ
ਨੰਗੇ ਖੁੱਲ੍ਹੇ ਜ਼ਖਮ ਸੀ ਅੰਤ ਨਾਸੂਰ ਹੋਏ ਲਾਉਣੇ ਵਾਲਾ ਮੱਲ੍ਹਮਾਂ ਲਾਉਣ ਨਹੀਂ ਆਇਆ

ਸਾਡੇ ਦਿਲ ਦੇ ਵਿਹੜੇ ਸੱਥਰ ਵਿਛਿਆ ਏ ਗੂੰਜਦੀਆਂ ਸ਼ਹਿਨਾਈਆਂ ਆਪਾਂ ਕੀ ਕਰੀਏ
ਸਾਡੀ ਖੇਤੀ ਲੋਆਂ ਦੇ ਨਾਲ ਝੁਲਸ ਗਈ ਸਾਡੇ ਭਾਅ ਦਾ ਕਿੱਧਰੇ ਸਾਉਣ ਨਹੀਂ ਆਇਆ
ਮੁੱਦਤ ਬੀਤੀ ਇੱਕ ਦੂਜੇ ਨਾਲ ਰੁੱਸਿਆਂ ਨੂੰ ਕੋਈ ਦਰਦੀ ਸੁਲਾਹ ਕਰਾਉਣ ਨਹੀਂ ਆਇਆ

ਗਲਤੀ ਕੋਈ ਕਸੂਰ ਬੋਲ ਕੇ ਦੱਸਿਆ ਨਾ ਮੁਲਾਕਾਤ ਬੰਦ ਹੋਣ ਨਾ' ਦੂਰੀਆਂ ਹੋ ਗਈਆਂ
ਹੌਲੀ ਹੌਲੀ ਕੰਧ ਦਿਲਾਂ ਵਿੱਚ ਪੈਂਦੀ ਗਈ ਲੱਗਦਾ ਸੀ ਕੋਈ ਆਊ ਢਾਹੁਣ ਨਹੀਂ ਆਇਆ
ਮੁੱਦਤ ਬੀਤੀ ਇੱਕ ਦੂਜੇ ਨਾਲ ਰੁੱਸਿਆਂ ਨੂੰ ਕੋਈ ਦਰਦੀ ਸੁਲਾਹ ਕਰਾਉਣ ਨਹੀਂ ਆਇਆ

ਜਦ ਇੱਜਤ ਅਫਜਾਈ ਮੇਰੀ ਹੋਈ ਸੀ ਕਿੰਨੇ ਵਾਕਿਫ਼ ਚਿਹਰੇ ਗੈਰ ਹਾਜ਼ਰ ਸਨ
ਜਦੋਂ ਤਮਾਸ਼ਾ ਬਣਿਆ ਆਪਣੇ ਸ਼ਹਿਰ ਚ ਮੈਂ ਪੁੱਛੋ ਨਾ ਜੀ ੳਦਣ ਕੌਣ ਨਹੀਂ ਆਇਆ
ਮੁੱਦਤ ਬੀਤੀ ਇੱਕ ਦੂਜੇ ਨਾਲ ਰੁੱਸਿਆਂ ਨੂੰ ਕੋਈ ਦਰਦੀ ਸੁਲਾਹ ਕਰਾਉਣ ਨਹੀਂ ਆਇਆ

ਦੁਨੀਆਂ ਦਾਰੀ ਬਾਰੇ ਕੁੱਝ ਵੀ ਪਤਾ ਨਹੀਂ ਮੰਨਿਆ ਕਾਰੋਬਾਰ ਚ ਦੇਬੀ ਫੇਲ ਹਾਂ ਮੈਂ
ਨਾਮ ਦੁਆਂਵਾਂ ਨੇਕੀਆਂ ਯਾਰ ਕਮਾਉਣੇ ਨੇ ਮੈਂ ਦੁਨੀਆਂ ਵਿੱਚ ਨੋਟ ਕਮਾਉਣ ਨਹੀਂ ਆਇਆ
ਮੁੱਦਤ ਬੀਤੀ ਇੱਕ ਦੂਜੇ ਨਾਲ ਰੁੱਸਿਆਂ ਨੂੰ ਕੋਈ ਦਰਦੀ ਸੁਲਾਹ ਕਰਾਉਣ ਨਹੀਂ ਆਇਆ

ਕੋਈ ਉਜੜਿਆ ਕੋਈ ਆਬਾਦ ਹੋਇਆ
ਦਿੱਤਾ ਸਬਕ ਤੂੰ ਹਾਲੇ ਨਾ ਯਾਦ ਹੋਇਆ
ਦੇਬੀ ਸੋਚਦਾ ਦੱਸੇਗਾ ਕੌਣ ਤੈਨੂੰ
ਕਿੰਨਾ ਜਿਕਰ ਤੇਰਾ ਤੈਥੋਂ ਬਾਅਦ ਹੋਇਆ

ਦੀਦ ਤੇਰੀ ਦੀ ਔੜ ਲੱਗੀ ਏ ਕਿੰਨੇ ਵਰ੍ਹਿਆਂ ਤੋਂ ਯਾਦਾਂ ਵਾਲੇ ਸਰੋਵਰ ਵੀ ਹੁਣ ਸੁੱਕੀ ਜਾਂਦੇ ਨੇ
ਤੂੰ ਤੇ ਚਾਰ ਕੁ ਦਿਨ ਹੀ ਗੱਲਾਂ ਕਰਕੇ ਤੁਰ ਗਈ ਸੀ ਮਿੱਤਰ ਹੁਣ ਤੱਕ ਤੇਰੀਆਂ ਗੱਲਾਂ ਪੁੱਛੀ ਜਾਂਦੇ ਨੇ

ਪੁੱਛਦੇ ਘਟਨਾ ਜ਼ਿੰਦਗੀ ਦੇ ਵਿੱਚ ਕੋਈ ਤੈਥੋਂ ਬਾਅਦ ਹੋਈ
ਪੁੱਛਦੇ ਮੈਨੂੰ ਪੱਟ ਕੇ ਕਿੱਥੇ ਤੂੰ ਆਬਾਦ ਹੋਈ
ਤੇਰੇ ਹਾਸਿਆਂ ਦੇ ਵਿੱਚ ਅੱਜ ਕੱਲ ਕੌਣ ਛਣਕਦਾ ਏ ਦੋਸ਼ ਤੇਰੇ ਤੇ ਜਾਂ ਕਿਸਮਤ ਤੇ ਸੁੱਟੀ ਜਾਂਦੇ ਨੇ
ਤੂੰ ਤੇ ਚਾਰ ਕੁ ਦਿਨ ਹੀ ਗੱਲਾਂ ਕਰਕੇ ਤੁਰ ਗਈ ਸੀ ਬਿੰਦਾ ਬੌਬੀ ਤੇਰੀਆਂ ਗੱਲਾਂ ਪੁੱਛੀ ਜਾਂਦੇ ਨੇ

ਇੰਤਜ਼ਾਰ ਕਿਸ ਗੱਲ ਦਾ ਤੈਨੂੰ ਰਹਿੰਦਾ ਹੋਵੇਗਾ
ਤੇਰੇ ਦੇਸ਼ ਵੀ ਸੂਰਜ ਚੜਦਾ ਲਹਿੰਦਾ ਹੋਵੇਗਾ
ਸਾਹਾਂ ਵਾਲੇ ਸੁਨੇਹੇ ਤੈਨੂੰ ਪਹੁੰਚਦੇ ਜਾ ਕਿ ਨਹੀਂ ਮੇਰੇ ਵੱਲੋਂ ਤਾਂ ਰੋਜ ਹੀ ਸੱਚੀ ਮੁੱਚੀ ਜਾਂਦੇ ਨੇ
ਤੂੰ ਤੇ ਚਾਰ ਕੁ ਦਿਨ ਹੀ ਗੱਲਾਂ ਕਰਕੇ ਤੁਰ ਗਈ ਸੀ ਮਿੱਤਰ ਹੁਣ ਤੱਕ ਤੇਰੀਆਂ ਗੱਲਾਂ ਪੁੱਛੀ ਜਾਂਦੇ ਨੇ

ਪੁੱਛਦੇ ਤੇਰਾ ਫੌਨ ਮੇਲ ਕਦੇ ਆਉਂਦੀ ਏ ਕਿ ਨਹੀਂ
ਨਵੇਂ ਸਾਲ ਦਾ ਕਾਰਡ ਕਦੇ ਕੋਈ ਪਾਉਂਦੀ ਏ ਕਿ ਨਹੀਂ
ਲੋਕਟ ਵਿੱਚੋਂ ਫੋਟੋ ਹੁਣ ਤਾਂ ਕੱਢਦੀ ਹੋਣੀ ਏ ਗੱਲੀਬਾਤੀ ਲੂਣ ਜਖ਼ਮ ਤੇ ਭੁੱਕੀ ਜਾਂਦੇ ਨੇ
ਤੂੰ ਤੇ ਚਾਰ ਕੁ ਦਿਨ ਹੀ ਗੱਲਾਂ ਕਰਕੇ ਤੁਰ ਗਈ ਸੀ ਬਿੰਦਾ ਬੌਬੀ ਤੇਰੀਆਂ ਗੱਲਾਂ ਪੁੱਛੀ ਜਾਂਦੇ ਨੇ

ਤੂੰ ਮੇਰੀ ਕੀ ਲੱਗਦੀ ਕਿਸੇ ਨੂੰ ਸਮਝ ਨਹੀਂ ਆ ਸਕਦੀ
ਸਾਰਿਆਂ ਦੇ ਨਾਲ ਤੇਰੀ ਗੱਲ ਕੀਤੀ ਨਹੀਂ ਜਾ ਸਕਦੀ
ਦੇਬੀ ਦੇ ਨਾਲ ਤੇਰਾ ਰਿਸ਼ਤਾ ਦਫਨ ਹੈ ਜਿਹੜੀ ਥਾਂ ਨੈਣ ਕਮਲੇ ਰੋਜ਼ ਕਬਰ ਨੂੰ ਪੁੱਟੀ ਜਾਂਦੇ ਨੇ
ਤੂੰ ਤੇ ਚਾਰ ਕੁ ਦਿਨ ਹੀ ਗੱਲਾਂ ਕਰਕੇ ਤੁਰ ਗਈ ਸੀ ਮਿੱਤਰ ਹੁਣ ਤੱਕ ਤੇਰੀਆਂ ਗੱਲਾਂ ਪੁੱਛੀ ਜਾਂਦੇ ਨੇ

ਹਵਾ ਵਾਂਗਰਾਂ ਰੁਮਕਦੇ ਲੰਘ ਗਏ ਓਹ ਅਸੀਂ ਰੁੱਖ ਦੇ ਵਾਂਗਰਾਂ ਖੜ੍ਹੇ ਰਹਿ ਗਏ
ਸੋਹਣੇ ਚਿਹਰੇ ਲਈ ਤੋਹਫਾ ਸੀ ਬੜਾ ਸੋਹਣਾ ਤੇ ਨੱਗ ਲੌਂਗ ਦੇ ਵਿੱਚ ਹੀ ਜੜੇ ਰਹਿ ਗਏ
ਦੇਬੀ ਝੂੱਟੇ ਉਹ ਗੈਰ ਨੂੰ ਦੇਣ ਲੱਗੇ ਤੇ ਆਪਾਂ ਆਸ ਦੀ ਪੀਂਘ ਤੇ ਚੜ੍ਹੇ ਰਹਿ ਗਏ
ਸੁਲਾਹ ਹੋਣ ਦਾ ਨਹੀਂ ਸਬੱਬ ਬਣਿਆ ਤੇ ਯਾਰ ਨਿੱਕੀ ਜਿਹੀ ਗੱਲ ਤੇ ਅੜੇ ਰਹਿ ਗਏ

ਤੈਨੂੰ ਚੰਗਾ ਲੱਗੇ ਦਿਲਾਂ ਨਾਲ ਖੇਡਣਾ ਆਪਾਂ ਗੱਲ ਦਿਲ ਉੱਤੇ ਲਾਈ ਹੋਈ ਆ
ਝੂਠੀਏ ਨੀ ਲਾਰੇ ਤੇਰੇ ਨਹੀਂ ਮੁੱਕਣੇ ਜਿੰਦ ਸਾਡੀ ਮੁੱਕਣੇ ਤੇ ਆਈ ਹੋਈ ਆ

ਰੰਗ ਕੇ ਤੂੰ ਭੁੱਲੀ ਜਿਹੜੇ ਰੰਗੇ ਹੋਏ ਆਂ
ਲਾਰਿਆਂ ਦੀ ਰੱਸੀ ਉੱਤੇ ਟੰਗੇ ਹੋਏ ਆਂ
ਚਿਹਰੇ ਉੱਤੇ ਚਿਹਰਾ ਤੇਰਾ ਖੋਟ ਨਾ ਦਿੱਸੇ
ਚੰਗੇ ਭਲਿਆਂ ਨੂੰ ਸਾਡੀ ਚੋਟ ਨਾ ਦਿੱਸੇ
ਸਾਡਾ ਨਾ ਕਿਸੇ ਵੀ ਹਾਲ ਚਾਲ ਪੁੱਛਿਆ ਸਾਡੀ ਨਾ ਕਿਤੇ ਵੀ ਸੁਣਵਾਈ ਹੋਈ ਆ
ਝੂਠੀਏ ਨੀ ਲਾਰੇ ਤੇਰੇ ਨਹੀਂ ਮੁੱਕਣੇ ਜਿੰਦ ਸਾਡੀ ਮੁੱਕਣੇ ਤੇ ਆਈ ਹੋਈ ਆ

ਉਹਨੂੰ ਦੂਜੇ ਕਿਸੇ ਸਬਕ ਦੀ ਲੋੜ ਨਹੀਂ ਢਾਈ ਅੱਖਰ ਪ੍ਰੇਮ ਦੇ ਜਿਹੜਾ ਪੜ੍ਹ ਜਾਂਦਾ
ਅੜ ਕੇ ਜੇ ਮਾਸ਼ੂਕ ਵੀ ਨਾਲ ਖਲੋ ਜਾਵੇ ਆਸ਼ਕ ਸਾਰੀ ਦੁਨੀਆਂ ਦੇ ਨਾਲ ਲੜ ਜਾਂਦਾ
ਆਸ਼ਕ ਦੇ ਲਈ ਇਸ਼ਕ ਰੜੇ ਪਹਾੜ ਜਿਹਾ ਡਿੱਗ ਕੇ ਨਹੀਂਉ ਬਚਣਾ ਤਾਂ ਵੀ ਚੜ੍ਹ ਜਾਂਦਾ
ਸ਼ਮਾਂ ਸੁਨੇਹੇ ਭੇਜੇ ਨਾ ਪਰਵਾਨਿਆਂ ਨੂੰ ਲੱਗੀ ਵਾਲਾ ਆ ਕੇ ਆਪੇ ਸੜ ਜਾਂਦਾ

ਤੂੰ ਜਿਉਂਦੀ ਪਿਆਰ ਦੀ ਤੌਹੀਨ ਕਰਕੇ
ਅਸੀਂ ਮਾਰੇ ਗਏ ਆਂ ਯਕੀਨ ਕਰਕੇ
ਕਿਸੇ ਝੋਲੀ ਟੀਸੀ ਵਾਲਾ ਬੇਰ ਪੈ ਗਿਆ
ਸਾਡੇ ਕਾਲਜੇ ਚ ਖੁੱਭਾ ਕੰਡਾ ਰਹਿ ਗਿਆ
ਇਸ਼ਕੇ ਚ ਦੇਬੀ ਨੁਕਸਾਨ ਨਾ ਗਿਣੇ ਭਾਵੇਂ ਕਿੱਡੀ ਕੀਮਤ ਚੁਕਾਈ ਹੋਈ ਆ
ਝੂਠੀਏ ਨੀ ਲਾਰੇ ਤੇਰੇ ਨਹੀਂ ਮੁੱਕਣੇ ਜਿੰਦ ਸਾਡੀ ਮੁੱਕਣੇ ਤੇ ਆਈ ਹੋਈ ਆ