ਗਿੱਧੇ ਵਿੱਚ ਨੱਚਦੀ ਨੂੰ ਤਾਲ ਭੁੱਲ ਗਈ ਯਾਰ ਗਲੀ ਚ ਨਜ਼ਰ ਜਦ ਆਇਆ
ਅੱਖ ਦੇ ਇਸ਼ਾਰੇ ਨਾਲ ਹਾਂ ਕਰਤੀ ਜਦੋਂ ਸੱਜਣਾਂ ਰੁਮਾਲ ਹਿਲਾਇਆ

ਲੱਗਦੀ ਨਾ ਅੱਡੀ ਥੱਲੇ ਮੱਚਣ ਅੰਗਿਆਰੀਆਂ
ਗਿੱਧੇ ਵਿੱਚ ਮੁੱਢ ਤੋਂ ਹੀ ਕਰੇ ਸਰਦਾਰੀਆਂ
ਉਹਦੇ ਵਾਂਗੂ ਵੱਜਦੀ ਨਾ ਕਿਸੇ ਕੋਲੋਂ ਤਾਲੀ ਨਾਂਹੀ ਠੂਮਕਾ ਗਿਆ ਲਾਇਆ
ਅੱਖ ਦੇ ਇਸ਼ਾਰੇ ਨਾਲ ਹਾਂ ਕਰਤੀ ਜਦੋਂ ਸੱਜਣਾਂ ਰੁਮਾਲ ਹਿਲਾਇਆ

ਵਾਰੀ ਵਾਰੀ ਮੇਲਣਾਂ ਦੀ ਝੰਡ ਪਹਿਲਾਂ ਲਾਈ ਸੀ
ਮਿੱਤਰਾਂ ਦੇ ਨਾਉਂ ਦੀ ਅਜੇ ਪਹਿਲੀ ਬੋਲੀ ਪਾਈ ਸੀ
ਟੈਲੀਫੋਨ ਵਾਂਗੂ ਤਾਰ ਖੜਕੀ ਦਿਲਾਂ ਦੀ ਯਾਰ ਖਿੱਚਿਆ ਚੁੰਬਕ ਵਾਂਗੂ ਆਇਆ
ਅੱਖ ਦੇ ਇਸ਼ਾਰੇ ਨਾਲ ਹਾਂ ਕਰਤੀ ਜਦੋਂ ਸੱਜਣਾਂ ਰੁਮਾਲ ਹਿਲਾਇਆ

ਚੋਰੀ ਯਾਰੀ ਦੱਸੇ ਢੰਗ ਅੱਖੀਂ ਘਟਾ ਪਾਉਣ ਦਾ
ਬੋਲਿਆ ਬਗੈਰ ਸਾਰੀ ਗੱਲ ਸਮਝਾਉਂਣ ਦਾ
ਦੋ ਉਂਗਲਾ ਤੇ ਲੜ੍ਹ ਚੁੰਨੀ ਦਾ ਲਪੇਟ ਟਾਇਮ ਮਿਲਣੇ ਦਾ ਝੱਟ ਸਮਝਾਇਆ
ਅੱਖ ਦੇ ਇਸ਼ਾਰੇ ਨਾਲ ਹਾਂ ਕਰਤੀ ਜਦੋਂ ਸੱਜਣਾਂ ਰੁਮਾਲ ਹਿਲਾਇਆ

ਕੀਤੇ ਮਖਸੂਸਪੁਰ ਮੁੰਡੇ ਪਰੇਸ਼ਾਨ ਨੇ
ਦਿਲ ਦੀ ਉਹ ਸਾਫ਼ ਪਰ ਅੱਖਾਂ ਬੇਈਮਾਨ ਨੇ
ਆਪ ਰਹਿੰਦੀ ਲੱਭਦੀ ਉਹ ਦੇਬੀ ਦੀਆਂ ਪੈੜਾਂ ਪਿੰਡ ਆਪਣੇ ਮਗਰ ਸਾਰਾ ਲਾਇਆ
ਅੱਖ ਦੇ ਇਸ਼ਾਰੇ ਨਾਲ ਹਾਂ ਕਰਤੀ ਜਦੋਂ ਸੱਜਣਾਂ ਰੁਮਾਲ ਹਿਲਾਇਆ

ਸਾਡੇ ਵੱਖਰੇ ਹੋ ਗਏ ਰਾਹ ਅੜੀਏ
ਜਾਣੀ ਮੁੱਕ ਗਏ ਲੱਗਦੇ ਸਾਹ ਅੜੀਏ
ਤੂੰ ਜੀਣ ਜੋਗੀਏ ਵੱਸਦੀ ਰਹਿ ਅਸੀਂ ਮਰਿਆਂ ਵਾਂਗੂ ਜੀਅ ਲੈਣਾ
ਤੂੰ ਦੇ ਗਈ ਜ਼ਹਿਰ ਜੁਦਾਈਆਂ ਦਾ ਅਸੀਂ ਔਖੇ ਸੌਖੇ ਪੀ ਲੈਣਾ

ਵਾਜੇ ਸ਼ਹਿਨਾਈਆਂ ਗੂੰਜਦੀਆਂ ਤੇਰੇ ਸ਼ਗਨਾਂ ਵਾਲੇ ਵਿਹੜੇ ਨੀ
ਤੇਰੇ ਨਵੇਂ ਜਹਾਨ ‘ਚ ਵੱਸਣ ਦੇ ਸਾਡੇ ਉਜੜਨ ਦੇ ਸੁਨੇੜੇ ਨੀ
ਤੈਨੂੰ ਨਵਿਆਂ ਦੀਆਂ ਵਧਾਈਆਂ ਨੀ ਤੂੰ ਬੀਤ ਗਿਆ ਤੋ ਕੀ ਲੈਣਾ
ਤੂੰ ਦੇ ਗਈ ਜ਼ਹਿਰ ਜੁਦਾਈਆਂ ਦਾ ਅਸੀਂ ਔਖੇ ਸੌਖੇ ਪੀ ਲੈਣਾ

ਮੈਂ ਕਈ ਵਧੀਕੀਆਂ ਜਰੀਆਂ ਨੇ ਤੇ ਕਿੰਨੇ ਅੱਥਰੂ ਸਾਂਭੇ ਨੇ
ਮੈਨੂੰ ਕਈਆਂ ਦੇ ਨਾਲ ਸ਼ਿਕਵਾ ਏ ਤੇ ਕਈਆਂ ਸਿਰੀਂ ਉਲਾਂਭੇ ਨੇ
ਮੇਰਾ ਜ਼ਿੰਦਗੀ ਸਿਰ ਵੀ ਕਰਜਾ ਏ ਕੁੱਝ ਤੇਰੇ ਕੋਲੋਂ ਵੀ ਲੈਣਾ
ਤੂੰ ਦੇ ਗਈ ਜ਼ਹਿਰ ਜੁਦਾਈਆਂ ਦਾ ਅਸੀਂ ਔਖੇ ਸੌਖੇ ਪੀ ਲੈਣਾ

ਦੇਬੀ ਦੀਆਂ ਯਾਦਾਂ ਵਿੱਚ ਤੇਰੀ ਤਸਵੀਰ ਨਾ ਧੁੰਦਲੀ ਪੈਣੀ ਏ
ਕਦੇ ਤੇਰੇ ਵੀ ਕੁੱਝ ਲੱਗਦੇ ਸਾਂ ਇਕ ਚੀਸ ਕਲੇਜੇ ਰਹਿਣੀ ਏ
ਮਰਨਾ ਤਾਂ ਪੈਦਾ ਕੱਲਿਆਂ ਨੂੰ ਪਰ ਔਖਾ ਕੱਲਿਆਂ ਜੀ ਲੈਣਾ
ਤੂੰ ਦੇ ਗਈ ਜ਼ਹਿਰ ਜੁਦਾਈਆਂ ਦਾ ਅਸੀਂ ਔਖੇ ਸੌਖੇ ਪੀ ਲੈਣਾ

ਮੇਰੇ ਕਾਲਜੇ ਤੇ ਲੀਕ ਵਾਂਗੂ ਵਹਿ ਗਿਆ
ਮੱਲੋ ਮੱਲੀ ਦਾ ਪ੍ਰਾਹੁਣਾ ਬਣ ਰਹਿ ਗਿਆ
ਮੈਨੂੰ ਲਾ ਕੇ ਬੋਲੀਆਂ ਪਾਵੇ ਟੁੱਟ ਪੈਣਾ ਨਹੀਓਂ ਸੰਗਦਾ
ਇੱਕ ਗੱਭਰੂ ਪਤਾ ਨਹੀਂ ਕਿਹੜੇ ਪਿੰਡ ਦਾ ਨੱਚਦੀ ਦਾ ਦਿਲ ਮੰਗਦਾ

ਮੈਂ ਤਾਂ ਕੁੜੀ ਅਣਭੋਲ ਉਹਦੇ ਗੂੰਗਿਆਂ ਇਸ਼ਾਰਿਆਂ ਨੂੰ ਨਹੀਓਂ ਜਾਣਦੀ
ਲੋਅ ਸੂਰਜੇ ਦੀ ਧੁੱਪ ਰੰਗੀ ਕੁੜੀਉ ਤਾਰਿਆਂ ਨੂੰ ਨਹੀਓਂ ਜਾਣਦੀ
ਅੱਖ ਮਾਰਦਾ ਬਚਾ ਕੇ ਅੱਖ ਸਾਰਿਆਂ ਤੋਂ ਖੰਘ ਤੋਂ ਬਗੈਰ ਖੰਘਦਾ
ਇੱਕ ਗੱਭਰੂ ਪਤਾ ਨਹੀਂ ਕਿਹੜੇ ਪਿੰਡ ਦਾ ਨੱਚਦੀ ਦਾ ਦਿਲ ਮੰਗਦਾ

ਮੇਰੇ ਨੈਣਾਂ ਵਾਲੇ ਤੀਰਾਂ ਨਾਲ ਖੌਰੇ ਉਹਦਾ ਕੱਖ ਵੀ ਵਿਗੜਦਾ ਈ ਨਹੀਂ
ਗੁੱਤ ਸੱਪਣੀ ਨੇ ਵੀ ਤਾਂ ਉਹਨੂੰ ਡੰਗਿਆਂ ਜਹਿਰ ਪਰ ਚੜ੍ਹਦਾ ਈ ਨਹੀਂ
ਪਤਾ ਲੱਗੇ ਨਾ ਸ਼ਿਕਾਰੀ ਕਿਹੜੇ ਪਾਸੇ ਦਾ ਸਪੇਰਾ ਉਹ ਕਿਹੜਾ ਢੰਗ ਦਾ
ਇੱਕ ਗੱਭਰੂ ਪਤਾ ਨਹੀਂ ਕਿਹੜੇ ਪਿੰਡ ਦਾ ਨੱਚਦੀ ਦਾ ਦਿਲ ਮੰਗਦਾ

ਕਿੰਝ ਕਾਹਲਾ ਪੈਂਦਾ ਮਾਰ ਕੇ ਝਪਟ ਬੇਰ ਟੀਸੀ ਵਾਲਾ ਲਾਉਣ ਨੂੰ ਫਿਰੇ
ਮੋਹਰ ਲਾਉਣ ਲਈ ਆਪਣਾ ਛੱਲਾ ਮੇਰੀ ਚੀਚੀ ਵਿੱਚ ਪਾਉਣ ਨੂੰ ਫਿਰੇ
ਸਿਰੋਂ ਵਾਰ ਗਿਆ ਲੱਡੂਆਂ ਦਾ ਜੋੜਾ ਤੇ ਰੁਮਾਲ ਇੱਕ ਸਤਰੰਗ ਦਾ
ਇੱਕ ਗੱਭਰੂ ਪਤਾ ਨਹੀਂ ਕਿਹੜੇ ਪਿੰਡ ਦਾ ਨੱਚਦੀ ਦਾ ਦਿਲ ਮੰਗਦਾ

ਖੌਰੇ ਯਾਰਾਂ ਨਾਲ ਲਾ ਕੇ ਆਇਆ ਸ਼ਰਤਾਂ ਨੱਚੇ ਮੇਰੇ ਨਾਲ ਅੜ ਕੇ
ਨਾਂਅ ਪੁੱਛ ਗਿਆ ਗੇੜਾ ਇੱਕ ਦੇ ਗਿਆ ਨੀ ਦੇਬੀ ਮੇਰੀ ਬਾਂਹ ਫੜ ਕੇ
ਉਸ ਚੰਦਰੇ ਨੂੰ ਵੇਖੇ ਬਿਨਾਂ ਅੜੀਉ ਮੇਰਾ ਨਹੀਓਂ ਬਿੰਦ ਲੰਘਦਾ
ਇੱਕ ਗੱਭਰੂ ਪਤਾ ਨਹੀਂ ਕਿਹੜੇ ਪਿੰਡ ਦਾ ਨੱਚਦੀ ਦਾ ਦਿਲ ਮੰਗਦਾ

ਤੀਜਾ ਕੰਮ ਕਦੀ ਨਾ ਹੋਇਆ ਦੋ ਵਿੱਚ ਉਮਰ ਬੀਤੀ
ਜਾਂ ਤੇਰੇ ਨਾਲ ਇਸ਼ਕ ਹੈ ਕੀਤਾ ਜਾਂ ਫਿਰ ਦਾਰੂ ਪੀਤੀ
ਸੁੱਕੇ ਪੱਤੇ ਵਾਂਗੂ ਤੇਰਿਆਂ ਵਿਛੋੜਿਆਂ ਦੀ ਹਵਾ ਚ ਡੋਲਦੇ ਪਏ
ਅਸੀਂ ਹਾਸਿਆਂ ਚ ਨੀਂਦ ਗੁਆਈ ਸ਼ਰਾਬ ਵਿੱਚੋਂ ਟੋਹਲਦੇ ਪਏ

ਯਾਦ ਪਰਾਂ ਹੋਵੇ ਨਾ ਤੇ ਨੀਂਦ ਨੇੜੇ ਆਵੇ ਨਾ
ਜਾ ਰੱਬਾ ਏਦਾਂ ਕੋਈ ਕਿਸੇ ਨੂੰ ਸਤਾਵੇ ਨਾ
ਆ ਕੇ ਬੈਠੇ ਨੇ ਪਿਆਲੇ ਵਿੱਚ ਸਾਹਮਣੇ ਪਰ ਨਹੀਂਓ ਬੋਲਦੇ ਪਏ
ਅਸੀਂ ਹਾਸਿਆਂ ਚ ਨੀਂਦ ਗੁਆਈ ਸ਼ਰਾਬ ਵਿੱਚੋਂ ਟੋਹਲਦੇ ਪਏ

ਲੱਗਣੇ ਤੋਂ ਪਹਿਲਾਂ ਜਿਹੜਾ ਸੋ ਲਿਆ ਤੇ ਗਾ ਲਿਆ
ਡਾਢੀਆਂ ਨੀ ਤੇਰੀਆਂ ਵਧੀਕੀਆਂ ਨੇ ਖਾ ਲਿਆ
ਲਾਉਂਦੇ ਦਾਰੂ ਕੋਲ ਤੇਰੀਆਂ ਸ਼ਿਕਾਇਤਾਂ ਤੇ ਦੁੱਖ ਸੁੱਖ ਫੋਲਦੇ ਪਏ
ਅਸੀਂ ਹਾਸਿਆਂ ਚ ਨੀਂਦ ਗੁਆਈ ਸ਼ਰਾਬ ਵਿੱਚੋਂ ਟੋਹਲਦੇ ਪਏ

ਤੇਰੇ ਕੀਤੇ ਵਾਅਦਿਆਂ ਨੂੰ ਪੂਰਾ ਹੋਣਾ ਆਉਂਦਾ ਨਾ
ਇੱਕ ਵੀ ਤਾਂ ਲਫਜ਼ ਤਸੱਲੀ ਦਾ ਥਿਆਉਂਦਾ ਨਾ
ਸੱਚੀ ਤੇਰੇ ਵਾਂਗੂ ਝੂੱਠੀਆਂ ਨੇ ਤੇਰੀਆਂ ਚਿੱਠੀਆਂ ਫਰੋਲਦੇ ਪਏ
ਅਸੀਂ ਹਾਸਿਆਂ ਚ ਨੀਂਦ ਗੁਆਈ ਸ਼ਰਾਬ ਵਿੱਚੋਂ ਟੋਹਲਦੇ ਪਏ

ਮਰਿਆ ਬਰੋਬਰ ਤਾਂ ਤੂੰ ਹੀ ਕਰ ਛੱਡੇ ਨੀ
ਚੰਗਾ ਹੋਵੇ ਦੋਸ਼ ਜੇ ਸ਼ਰਾਬ ਸਿਰ ਲੱਗੇ ਨੀ
ਦੇਬੀ ਉਨ੍ਹਾਂ ਦਾ ਵੀ ਭਲਾ ਪਿਆ ਮੰਗਦਾ ਜਿਹੜੇ ਉਹਨੂੰ ਰੋਲਦੇ ਪਏ
ਅਸੀਂ ਹਾਸਿਆਂ ਚ ਨੀਂਦ ਗੁਆਈ ਸ਼ਰਾਬ ਵਿੱਚੋਂ ਟੋਹਲਦੇ ਪਏ

ਵਫ਼ਾ ਖੂਨ ਵਿੱਚ ਹੁੰਦੀ ਮਿਲਦੀ ਨਾ ਮੁੱਲ ਜਾ ਕਿਸੇ ਨਾਲ ਤੂੰ ਨਿੱਭਾ ਕੇ ਦਿਖਾਈ
ਦੇਬੀ ਨੂੰ ਤੂੰ ਦਿਲ ਵਿੱਚੋਂ ਕੱਢ ਕੇ ਤਾਂ ਦੱਸੀ ਦੇਬੀ ਦੇ ਤੂੰ ਦਿਲ ਵਿੱਚੋਂ ਜਾ ਕੇ ਦਿਖਾਈ
ਸਾਂਝੇ ਤਿੰਨ ਅੱਖਰ ਨੇ ਸਾਡੇ ਨਾਂਵਾਂ ਵਿੱਚ ਤੂੰ ਚਾਅਵੇਂ ਵੀ ਤਾਂ ਮੇਰਾ ਨਾਂ ਭੁਲਾਇਆ ਨਹੀਂਉ ਜਾਣਾ
ਦਿਲ ਉੱਤੇ ਤੇਰੇ ਲੀਕ ਵਾਂਗੂ ਵਹਿ ਗਿਆ ਮੈਂ ਮਿਟਾਇਆ ਨਹੀਂਉ ਜਾਣਾ

ਕਿਸੇ ਪੱਥਰ ਤੇ ਲੀਕ ਹਾਂ ਮੈਂ ਪਾਣੀ ਤੇ ਨਹੀਂ
ਤੇਰੀ ਜ਼ਿੰਦਗੀ ਦਾ ਸੱਚ ਹਾਂ ਕਹਾਣੀ ਤੇ ਨਹੀਂ
ਭੇਦ ਹਾਂ ਮੈਂ ਤੈਥੋਂ ਜੋ ਕਹਾਣੀਆਂ ਬਣਾ ਕੇ ਵੀ ਸੁਣਾਇਆ ਨਹੀਂਉ ਜਾਣਾ
ਦਿਲ ਉੱਤੇ ਤੇਰੇ ਲੀਕ ਵਾਂਗੂ ਵਹਿ ਗਿਆ ਮੈਂ ਮਿਟਾਇਆ ਨਹੀਂਉ ਜਾਣਾ

ਨਾਮ ਲਿੱਖਦੀ ਸੀ ਮੇਰਾ ਤਾਰੇ ਜੋੜ ਜੋੜ ਕੇ
ਸੁੱਖਾਂ ਮੰਗਦੀ ਸੀ ਦੀਵੇ ਪਾਣੀਆ ਚ ਰੋੜ ਕੇ
ਦੀਵਾ ਮੇਰੀ ਯਾਦ ਵਾਲਾ ਲੱਖ ਫੂਕਾਂ ਮਾਰ ਲੈ ਬੁਝਾਇਆ ਨਹੀਂਉ ਜਾਣਾ
ਦਿਲ ਉੱਤੇ ਤੇਰੇ ਲੀਕ ਵਾਂਗੂ ਵਹਿ ਗਿਆ ਮੈਂ ਮਿਟਾਇਆ ਨਹੀਂਉ ਜਾਣਾ

ਤੈਥੋਂ ਭੁੱਲਣੀ ਨਾ ਨਿੱਭਣੀ ਉਹ ਰੀਤ ਹੋ ਗਿਆ
ਰੋਂਦੇ ਫੱਟਾ ਦਾ ਬਿਆਨ ਸੋਗੀ ਗੀਤ ਹੋ ਗਿਆ
ਗੀਤ ਵੀ ਉਹ ਜਿਹੜਾ ਤੈਨੂੰ ਰਹਿਣਾ ਸਦਾ ਯਾਦ ਪਰ ਗਾਇਆ ਨਹੀਂਉ ਜਾਣਾ
ਦਿਲ ਉੱਤੇ ਤੇਰੇ ਲੀਕ ਵਾਂਗੂ ਵਹਿ ਗਿਆ ਮੈਂ ਮਿਟਾਇਆ ਨਹੀਂਉ ਜਾਣਾ

ਤੇਰੇ ਮੱਥੇ ਦਾ ਨਿਸ਼ਾਨ ਮੈਂ ਲੁਕੋ ਨਹੀਂਉ ਹੋਣਾ
ਲੋਕਾਂ ਹੱਸਣਾ ਤੇਰੇ ਤੇ ਤੈਥੋਂ ਰੋ ਨਹੀਂਉ ਹੋਣਾ
ਹੰਝੂ ਮਖਸੂਸਪੁਰੀ ਤਾਂਈ ਦੇ ਕੇ ਤੈਥੋਂ ਮੁਸਕਾਇਆ ਨਹੀਂਉ ਜਾਣਾ
ਦਿਲ ਉੱਤੇ ਤੇਰੇ ਲੀਕ ਵਾਂਗੂ ਵਹਿ ਗਿਆ ਮੈਂ ਮਿਟਾਇਆ ਨਹੀਂਉ ਜਾਣਾ

ਪਿਆਰ ਵਿੱਚ ਦੂਰ ਦੂਰ ਰਹਿਣਾ ਚੰਗਾ ਨਹੀਂ
ਨਿੱਕੀ ਨਿੱਕੀ ਗੱਲੋਂ ਰੁੱਸ ਬਹਿਣਾ ਚੰਗਾ ਨਹੀਂ
ਕੋਈ ਨਾ ਭਰੋਸਾ ਆਉਣ ਵਾਲੇ ਪਲ ਦਾ
ਗੁੱਸਾ ਨਾ ਮਨਾਈਏ ਸੱਜਣਾ ਦੀ ਗੱਲ ਦਾ

ਕਦੀ ਨਾ ਸੁਣਾਈਏ ਗੁੱਸੇ ਗਿੱਲੇ ਮਜਬੂਰੀਆਂ
ਇਹੀ ਨੇ ਪਵਾਉਂਦੇ ਸਦਾ ਦਿਲਾਂ ਵਿੱਚ ਦੂਰੀਆਂ
ਕੋਈ ਨਾ ਇਲਾਜ ਫੇਰ ਐਸੀ ਸੱਲ ਦਾ
ਗੁੱਸਾ ਨਾ ਮਨਾਈਏ ਸੱਜਣਾ ਦੀ ਗੱਲ ਦਾ

ਸੱਜਣਾ ਲਈ ਦੇਬੀ ਜਿੰਦ ਜਾਨ ਵਾਰੀਏ
ਦੁੱਖ ਸੁੱਖ ਆਪਾਂ ਰਲ ਕੇ ਸਹਾਰੀਏ
ਯਾਰੀਆਂ ਦੇ ਪਿੱਛੇ ਇਹ ਜਹਾਨ ਚੱਲਦਾ
ਗੁੱਸਾ ਨਾ ਮਨਾਈਏ ਸੱਜਣਾ ਦੀ ਗੱਲ ਦਾ

ਉੱਠਦਾ ਬਹਿੰਦਾ ਕੰਮ ਤੇ ਜਾਂਦਾ ਤੇਰੇ ਹੀ ਗੁਣ ਗਾਉਂਦਾ
ਜੱਟ ਪਾਉਂਦਾ ਭੰਗੜੇ ਜਦੋਂ ਫਰਾਈਡੇ ਆਉਂਦਾ

ਮੰਡੇ ਨੂੰ ਤੁਰ ਪੈਂਦਾ ਕੰਮ ਨੂੰ ਰੋਜ ਨੀ ਸ਼ਿਫਟਾਂ ਲਾਉਂਦਾ
ਲੰਘੇ ਥਰਸਡੇ ਚੜੇ ਫਰਾਈਡੇ ਲੱਖ ਲੱਖ ਸ਼ੁਕਰ ਮਨਾਉਂਦਾ
ਵੀਕਐਂਡ ਨੂੰ ਮੇਰੀਏ ਜਾਣੇ ਲੈ ਦਿਉ ਸੂਟ ਮਨਭਾਉਂਦਾ
ਜੱਟ ਪਾਉਂਦਾ ਭੰਗੜੇ ਜਦੋਂ ਫਰਾਈਡੇ ਆਉਂਦਾ

ਇੱਕ ਫੋਟੋ ਤੇਰੀ ਬਟੂਏ ਦੂਜੀ ਸੀਨੇ ਵਿੱਚ ਸਜਾਈ
ਹਰ ਦਮ ਤੇਰਾ ਚੇਤਾ ਬਲੀਏ ਲਿਵ ਤੇਰੇ ਨਾਲ ਲਾਈ
ਨਾ ਅੱਕੇ ਨਾ ਥੱਕੇ ਓਵਰ ਟਾਈਮ ਖੁਸ਼ੀ ਨਾਲ ਲਾਉਂਦਾ
ਜੱਟ ਪਾਉਂਦਾ ਭੰਗੜੇ ਜਦੋਂ ਫਰਾਈਡੇ ਆਉਂਦਾ

ਸੋਂਦੀਆਂ ਨਾ ਉਹ ਅੱਖੀਆਂ ਜਿਨ੍ਹਾਂ ਇਸ਼ਕ ਦੇ ਰੋਗ ਸਹੇੜੇ
ਰੋੜ ਤੇਰੀ ਮੈਂ ਕਰਤੀ ਨੀਵੀਂ ਮਾਰ ਮਾਰ ਕੇ ਗੇੜੇ
ਖਬਰੇ ਕਿੰਨੀ ਵਾਰੀ ਤੈਨੂੰ ਸੈਲ ਤੋਂ ਫੋਨ ਘੁੰਮਾਉਂਦਾ
ਜੱਟ ਪਾਉਂਦਾ ਭੰਗੜੇ ਜਦੋਂ ਫਰਾਈਡੇ ਆਉਂਦਾ

ਝੂਟੇ ਤੈਨੂੰ ਦੇਣ ਲਈ ਮੈਂ ਹੋਂਡਾ ਨਵੀਂ ਕਢਾਈ
ਦਾਰੂ ਛੱਡਤੀ ਜਿਦਣ ਦੀ ਤੂੰ ਲਾਇਫ ਮੇਰੀ ਵਿੱਚ ਆਈ
ਹੁਣ ਤਾਂ ਰੇਸ਼ਮ ਦੇਬੀ ਕੋਲੋਂ ਤੇਰੇ ਗੀਤ ਲਿਖਵਾਉਂਦਾ
ਜੱਟ ਪਾਉਂਦਾ ਭੰਗੜੇ ਜਦੋਂ ਫਰਾਈਡੇ ਆਉਂਦਾ

ਨੱਚ ਨੱਚ ਮੇਲਣੇ ਕਮਾਲ ਕਰਦੀ
ਕੁੜੀਆਂ ਦਾ ਜਾਵੇਂ ਮੰਦਾ ਹਾਲ ਕਰਦੀ
ਹਾਣੀਆਂ ਦੇ ਨਾਲ ਲਾ ਕੇ ਸ਼ਰਤਾਂ ਮੈਂ ਆਇਆ ਤੈਨੂੰ ਪੈਣਾ ਏ ਮਾਣ ਮੇਰਾ ਰੱਖਣਾ
ਗਿੱਧੇ ਵਿੱਚ ਮਿੱਤਰਾਂ ਨੇ ਅੱਜ ਤੇਰੇ ਬਰਾਬਰ ਨੱਚਣਾ

ਤੇਰੇ ਨੈਣਾਂ ਵਿੱਚੋਂ ਪੀ ਕੇ ਤੇਰੇ ਉੱਤੇ ਖੇੜ ਨੀ
ਤਾਰ ਅਣਛੋਹੀ ਤੇਰੇ ਦਿਲ ਵਾਲੀ ਛੇੜਨੀ
ਨਾਗਣੇ ਨੀ ਪਾਉਣਾ ਤੈਨੂੰ ਕੀਲ ਕੇ ਪਟਾਰੀ ਨਾਲੇ ਡੰਗ ਜਹਿਰੀਲੇ ਕੋਲੋਂ ਬਚਣਾ
ਗਿੱਧੇ ਵਿੱਚ ਮਿੱਤਰਾਂ ਨੇ ਅੱਜ ਤੇਰੇ ਬਰਾਬਰ ਨੱਚਣਾ

ਕੱਢ ਲਈ ਏ ਜਾਨ ਤੇਰੇ ਲੱਕ ਦੇ ਹੁਲਾਰਿਆਂ
ਕੀਤਾ ਮਜ਼ਬੂਰ ਸਾਨੂੰ ਅੱਖ ਦੇ ਇਸ਼ਾਰਿਆਂ
ਪਿੰਡ ਦਿਆਂ ਮੁੰਡਿਆਂ ਨੂੰ ਲਾ ਕੇ ਬੋਲੀ ਪਾਵੇ ਸਾਡਾ ਅੱਥਰੀ ਕਾਲਜਾ ਮੱਚਣਾ
ਗਿੱਧੇ ਵਿੱਚ ਮਿੱਤਰਾਂ ਨੇ ਅੱਜ ਤੇਰੇ ਬਰਾਬਰ ਨੱਚਣਾ

ਤੂੰ ਤਾਂ ਮਖਸੂਸਪੁਰੇ ਮੇਲ ਵਿੱਚ ਆਈ ਨੀ
ਦੇਬੀ ਦੀ ਹੈ ਤੇਰੇ ਪਿੰਡੋਂ ਵੱਡੀ ਭਰਜਾਈ ਨੀ
ਬਣ ਸਕਦੇ ਆਂ ਇੱਕ ਦੂਜੇ ਦੇ ਸਹਾਈ ਤੂੰ ਮੰਨ ਜਾਏ ਕਿਸੇ ਨੇ ਨੀ ਡੱਕਣਾ
ਗਿੱਧੇ ਵਿੱਚ ਮਿੱਤਰਾਂ ਨੇ ਅੱਜ ਤੇਰੇ ਬਰਾਬਰ ਨੱਚਣਾ

ਉਹਦੇ ਦਿਉਰ ਦਾ ਵਿਆਹ
ਉਹਨੂੰ ਗੋਡੇ ਗੋਡੇ ਚਾਅ
ਭਾਬੀ ਖੁਸ਼ੀ ਵਿੱਚ ਹੱਸਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਝਾਂਜਰਾਂ ਦੀ 'ਵਾਜ ਸਾਰੀ ਬੀਹੀ ਵਿੱਚ ਆਉਂਦੀ ਆ
ਨੱਚਦੀ ਉਹ ਲੱਕ ਨੂੰ ਸਤਾਰਾਂ ਵਲ਼ ਪਾਉਂਦੀ ਆ
ਮੇਰੇ ਘਰ ਸੋਹਣੀ ਜਿਹੀ ਦਰਾਣੀ ਅੱਜ ਆਉਣੀ
ਚਾਅ ਡੁੱਲ੍ਹਦੇ ਨੂੰ ਡੱਕਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਕਿਸੇ ਨੂੰ ਜਵਾਬ ਦੇਣਾ ਬੋਲੀਆਂ ਦਾ ਆਵੇ ਨਾ
ਮੇਲਣਾਂ ਤੋਂ ਉਹਦੇ ਨਾਲ ਨੱਚਿਆਂ ਵੀ ਜਾਵੇ ਨਾ
ਮੇਲਣਾਂ ਦੀਆਂ ਤਾਂ ਸੱਚੀਂ ਕੱਪੜੇ ਦੇ ਵਾਂਗੂੰ
ਉਹੋ ਤੈਹਾਂ ਲਾ ਕੇ ਰੱਖਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਭੁੱਲਦੀ ਨਾ ਚੇਤਾ ਕਿਸੇ ਸ਼ਗਨ ਮਨਾਉਣ ਦਾ
ਚਾਅ ਉਹਨੂੰ ਸੁਰਮਾ ਦਿਉਰ ਦੇ ਹੈ ਪਾਉਣ ਦਾ
ਕਿਹੜੀ ਗੱਲ ਕਰਨੀ ਤੇ ਕਰਨੀ ਨ੍ਹੀ ਕਿਹੜੀ
ਉਹਦੇ ਕੰਨ ਵਿੱਚ ਦੱਸਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਉਹਦੇ ਅੱਗੇ ਮੜ੍ਹਕ ਕੁਆਰੀਆਂ ਦੀ ਫਿੱਕੀ ਆ
ਹਰ ਅੱਖ ਕੈਮਰੇ ਦੇ ਵਾਂਗ ਉਥੇ ਟਿਕੀ ਆ
ਲੱਭਦਾ ਸ਼ਰਾਬੀ ਹੋਇਆ ਉਸਨੂੰ ਵਿਆਹ 'ਚ
ਦੇਬੀ ਵੀਰੇ ਕੋਲੋਂ ਬੱਚਦੀ ਫਿਰੇ
ਕਿ ਪੱਬਾਂ ਭਾਰ ਨੱਚਦੀ ਫਿਰੇ

ਜਿਹਨੂੰ ਉਂਗਲਾਂ ਤੇ ਗਿਣ ਕੇ ਉਡਕਦੇ ਸੀ ਘੜੀ ਉਹੋ ਆਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਵੀਰੇ ਭਾਬੀ ਦੀ ਸ਼ਕੀਨੀ ਦੀ ਨਾ ਝਾਲ ਝੱਲੀ ਜਾਵੇ
ਕਿਹੜਾ ਦੋਹਾਂ ਵਿੱਚੋਂ ਵੱਧ ਸੋਹਣਾ ਸਮਝ ਨਾ ਆਵੇ
ਜੋੜੀ ਰੱਬ ਤੇ ਵਿਚੋਲਿਆਂ ਨੇ ਚੰਗੀ ਤਰ੍ਹਾਂ ਵੇਖ ਕੇ ਬਣਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਤੇਰੇ ਯਾਰਾਂ ਪਾ ਕੇ ਭੰਗੜਾ ਕਰਾਤੀ ਬੱਲੇ ਬੱਲੇ
ਸਾਰੇ ਖੁਸ਼ੀ ਵਿੱਚ ਨੱਚਦੇ ਸ਼ੌਦਾਈ ਹੋ ਚੱਲੇ
ਜਿਹੜੇ ਹੱਥ ਵੀ ਸ਼ਰਾਬ ਨੂੰ ਨਾ ਲਾਉਂਦੇ ਅੱਜ ਉਹਨਾਂ ਨੂੰ ਪਿਆਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਤੇਰੇ ਸਿਰ ਉੱਤੇ ਪੰਡ ਜ਼ਿੰਮੇਵਾਰੀਆਂ ਦੀ ਪੈਣੀ
ਹੁਣ ਪਹਿਲਾਂ ਵਾਲੀ ਮਿੱਤਰਾ ਅਜ਼ਾਦੀ ਨਹੀਉਂ ਰਹਿਣੀ
ਹੁੰਦੀ ਉਮਰਾਂ ਦੀ ਜੇਲ ਵੇ ਕਬੀਲਦਾਰੀ ਮਿਲੇ ਨਾ ਰਿਹਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ

ਦੇਬੀ ਇਕ ਬੁੱਤ ਹੋਈਆਂ ਅੱਜ ਦੋ ਤਸਵੀਰਾਂ
ਇੱਕ ਮੱਥੇ ਵਿੱਚ ਆਈਆਂ ਅੱਜ ਦੋ ਤਕਦੀਰਾਂ
ਹਰ ਕੰਮ 'ਚ ਤਰੱਕੀ ਕਰੇ ਰੱਬ ਤੇਰੀ ਦੁੱਗਣੀ ਕਮਾਈ ਸੱਜਣਾ
ਹੋਵੇ ਲੱਖ ਵਾਰੀ ਤੈਨੂੰ ਤੇਰੇ ਯਾਰਾਂ ਵੱਲੋਂ ਵਿਆਹ ਦੀ ਵਧਾਈ ਸੱਜਣਾ