ਅੱਜ ਦੇ ਪਰਿਵਾਰਾਂ ਦਾ ਰੱਬ ਮੇਲ ਕਰਾਇਆ ਏ
ਮੈਨੂੰ ਦਿਓ ਵਧਾਈਆਂ ਨੀ ਮੈਂ ਵੀਰ ਵਿਆਹਿਆ ਏ

ਅੱਜ ਕਰਮਾਂ ਵਾਲੇ ਦੇ ਸਿਰ ਸਜਿਆ ਸਿਹਰਾ ਏ
ਅੰਮੀਂ ਤੇ ਭੈਣਾਂ ਦੇ ਮੁੱਖਾਂ ਤੇ ਖੇੜਾ ਏ
ਖੁਸ਼ੀਆਂ ਵਿੱਚ ਬਾਬਲ ਦਾ ਵਿਹੜਾ ਨਸ਼ਿਆਇਆ ਏ
ਮੈਨੂੰ ਦਿਓ ਵਧਾਈਆਂ ਨੀ ਮੈਂ ਵੀਰ ਵਿਆਹਿਆ ਏ

ਚਾਚੇ ਤਾਏ ਮਾਮੇ ਸਭ ਦਿੰਦੇ ਵਧਾਈਆਂ ਨੇ
ਸਭ ਸ਼ਗਨ ਮਨਾ ਲਏ ਨੇ ਭੈਣਾਂ ਭਰਜਾਈਆਂ ਨੇ
ਵਿਆਂਦੜ੍ਹ ਦੇ ਚਿਹਰੇ ਤੇ ਅੱਜ ਨੂਰ ਸਵਾਇਆ ਏ
ਮੈਨੂੰ ਦਿਓ ਵਧਾਈਆਂ ਨੀ ਮੈਂ ਵੀਰ ਵਿਆਹਿਆ ਏ

ਮਿਲਦੇ ਨਾ ਸਾਕ ਚੰਗੇ ਜੇਕਰ ਕੋਈ ਟੋਲ੍ਹੇ ਨਾ
ਇਹ ਕਾਰਜ ਔਖੇ ਨੇ ਜੇ ਹੋਣ ਵਿਚੋਲੇ ਨਾ
ਧੰਨਵਾਦ ਵਿਚੋਲੇ ਦਾ ਜਿਸ ਨੇ ਮੇਲ ਕਰਾਇਆ
ਮੈਨੂੰ ਦਿਓ ਵਧਾਈਆਂ ਨੀ ਮੈਂ ਵੀਰ ਵਿਆਹਿਆ ਏ

ਜੋੜੀ ਜੁਗ ਚਾਰ ਜੀਵੇ ਰਹੇ ਪਿਆਰ ਸਦਾ ਬਣਿਆ
ਦੇਬੀ ਇਸ ਰਿਸ਼ਤੇ ਦਾ ਗੁਰੂ ਆਪ ਗਵਾਹ ਬਣਾਇਆ
ਅੱਜ ਸਾਥ ਉਹੋ ਮਿਲਿਆਂ ਜੋ ਧੁਰੋਂ ਲਿਖਾਇਆ ਏ
ਮੈਨੂੰ ਦਿਓ ਵਧਾਈਆਂ ਨੀ ਮੈਂ ਵੀਰ ਵਿਆਹਿਆ ਏ

ਟਿੱਕਾ ਵੀ ਰਾਜੀ ਦਮਕਣ ਨੂੰ
ਵੰਗਾਂ ਵੀ ਰਾਜੀ ਖਣਕਣ ਨੂੰ
ਉਹਦਾ ਲੋਂਗ ਬੋਲੀਆਂ ਪਾਉਣੇ ਨੂੰ
ਝਾਂਜਰ ਵੀ ਮੰਨਦੀ ਛਣਕਣ ਨੂੰ
ਪਹਿਲਾ ਮੁੱਕਰੀ ਜਾਂਦੀ ਸੀ ਹੁਣ ਮੰਨ ਗਈ ਜੱਚਣ ਨੂੰ ਕਰਦੀ ਆ
ਪਰੇ ਹੱਟ ਜਾਉ ਹਾਣ ਦਿਉ ਮੁੰਡਿਉਂ ਇੱਕ ਕੁੜੀ ਨੱਚਣ ਨੂੰ ਕਰਦੀ ਆ

ਵੀਣੀ ਵਿੱਚ ਵੰਗਾਂ ਕੱਚ ਦੀਆਂ ਦਿਲ ਤੇ ਲਿਸ਼ਕਾਰੇ ਪਾਉਣਗੀਆਂ
ਤੁਸੀਂ ਵੇਖੀਉ ਅੱਖਾਂ ਚੋਰਨੀਆਂ ਦਿਨ ਦੀਵੀ ਸੰਨਾਂ ਲਾਉਣਗੀਆਂ
ਕਈ ਕਾਲਜੇ ਲੂਹਣੇ ਨੇ ਜਿਹੜੀ ਲਾਟ ਮੱਚਣ ਨੂੰ ਕਰਦੀ ਆ
ਪਰੇ ਹੱਟ ਜਾਉ ਹਾਣ ਦਿਉ ਮੁੰਡਿਉਂ ਇੱਕ ਕੁੜੀ ਨੱਚਣ ਨੂੰ ਕਰਦੀ ਆ

ਇਹਦੀ ਤੱਕਣੀ ਕਹਿੰਦੀ ਲੱਗਦੀ ਵਾਪਸ ਨੀ ਕਰਨਾ ਦਿਲ ਖੋਹ ਕੇ
ਗੁੱਤ ਨਾਗਣੀ ਡੰਗ ਕੇ ਆਖੁਗੀਂ ਮਰਜਾਣਿਆਂ ਡਿੱਗ ਪਰਾ ਹੋ ਕੇ
ਤਿੱਖੀਆਂ ਨਜ਼ਰਾਂ ਵਾਲੀ ਕਿਸੇ ਤੇ ਅੱਖ ਰੱਖਣ ਨੂੰ ਕਰਦੀ ਆ
ਪਰੇ ਹੱਟ ਜਾਉ ਹਾਣ ਦਿਉ ਮੁੰਡਿਉਂ ਇੱਕ ਕੁੜੀ ਨੱਚਣ ਨੂੰ ਕਰਦੀ ਆ

ਗੁੱਟਾਂ ਤੇ ਨਾਲ ਸ਼ੌਕੀਨਨ ਨੇ ਸਤਰੰਗੇ ਬੰਨ੍ਹ ਰੁਮਾਲ ਲਏ
ਦਿਲ ਬਿੰਦੇ ਬੌਬੀ ਵਰਗਿਆਂ ਦੇ ਇਉਂ ਲੱਗਦਾ ਏ ਬੰਨ੍ਹ ਨਾਲ ਲਏ
ਪਹਿਲੇ ਤੋੜ ਜਿਹੀ ਦੇਬੀ ਲਹੂ ਦੇ ਵਿੱਚ ਰੱਚਣ ਨੂੰ ਕਰਦੀ ਆ
ਪਰੇ ਹੱਟ ਜਾਉ ਹਾਣ ਦਿਉ ਮੁੰਡਿਉਂ ਇੱਕ ਕੁੜੀ ਨੱਚਣ ਨੂੰ ਕਰਦੀ ਆ

ਖੜ੍ਹੇ ਤੈਨੂੰ ਪਿੱਟਦੇ ਆਂ ਸੱਪ ਦੀਏ ਲੀਕੇ ਨੀ
ਫ਼ੌਜਦਾਰੀ ਕੇਸ ਵਿੱਚ ਪੈਂਦੀ ਏ ਤਰੀਕੇ ਨੀ
ਜਦੋਂ ਦਿਲ ਕੀਤਾ ਘੱਲ ਸੰਮਨ ਬੁਲਾ ਲਿਆ
ਸਾਨੂੰ ਤੇਰੇ ਸ਼ਹਿਰ ਦਿਆਂ ਗੇੜਿਆਂ ਨੇ ਖਾ ਲਿਆ

ਦੱਸ ਸਾਥੋਂ ਕਿਹੜੀਆਂ ਬਗਾਰਾ ਨਾ ਕਰਾਈਆਂ ਨੀ
ਤੇਰੇ ਸੱਦਿਆਂ ਨੇ ਪੈਰੀਂ ਜੁੱਤੀਆਂ ਨਾ ਪਾਈਆਂ ਨੀ
ਤੇਰੇ ਰੋੜ ਸਾਡੇ ਪੈਰਾਂ ਵਾਲੀਆਂ ਬਿਆਈਆਂ ਨੀ
ਤੋੜਿਆ ਤੂੰ ਭਾਵੇਂ ਇਹਨਾਂ ਰਿਸ਼ਤਾ ਨਿਭਾ ਲਿਆ
ਸਾਨੂੰ ਤੇਰੇ ਸ਼ਹਿਰ ਦਿਆਂ ਗੇੜਿਆਂ ਨੇ ਖਾ ਗਿਆ

ਰੇਤ ਉੱਤੇ ਪੈੜਾਂ ਤੇਰੇ ਵਾਅਦੇ ਬਣ ਚੱਲੇ ਨੀ
ਯਾਰ ਨਾ ਜਹਾਨ ਦੱਸ ਕੀ ਆ ਤੇਰੇ ਪੱਲੇ ਨੀ
ਦਿਲਾਂ ਨੂੰ ਤੂੰ ਸਮਝਿਆ ਮੁੰਦਰੀਆਂ ਛੱਲੇ ਨੀ
ਜਦੋਂ ਜੀਅ ਕੀਤਾ ਜਿਹਦੇ ਨਾਲ ਵੀ ਵਟਾ ਲਿਆ
ਸਾਨੂੰ ਤੇਰੇ ਸ਼ਹਿਰ ਦਿਆਂ ਗੇੜੇਆਂ ਨੇ ਖਾ ਗਿਆ

ਦਾਰੂ ਦੀਏ ਮੱਟੀਏ ਨੀ ਰੂਪ ਦੀਏ ਹੱਟੀਏ ਨੀ
ਦਿਨੇ ਦੀਵੀ ਚੋਰੀਏ ਨੀ ਸਫ਼ਿਆਂ ਤੋਂ ਕੋਰੀਏ ਨੀ
ਅਮਾਨਤੇ ਪਰਾਈਏ ਨੀ ਹੋਣੀ ਦੀਏ ਜਾਈਏ ਨੀ
ਜ਼ਿੰਦਗੀ ਨਾ' ਰੁੱਸਿਆ ਨੇ ਤੈਨੂੰ ਗਲ੍ਹ ਲਾ ਗਿਆ
ਸਾਨੂੰ ਤੇਰੇ ਸ਼ਹਿਰ ਦਿਆਂ ਗੇੜੇਆਂ ਨੇ ਖਾ ਲਿਆ

ਬਦਲੀ ਤੂੰ ਝੂੱਠਿਆ ਗਵਾਹਾਂ ਦੇ ਬਿਆਨਾਂ ਵਾਂਗ
ਦੇਬੀ ਅਸੀ ਖੜ੍ਹੇ ਰਹੇ ਲੁੱਟੇ ਅਰਮਾਨਾਂ ਵਾਂਗ
ਲੰਘੇ ਹੋਏ ਮਿਆਦ ਤੋਂ ਪੁਰਾਣਿਆਂ ਮਕਾਨਾਂ ਵਾਂਗ
ਬੁੱਲਾਂ ਉੱਤੇ ਚੁੱਪ ਵਾਲਾ ਜਿੰਦਾ ਮਰਵਾ ਲਿਆ
ਸਾਨੂੰ ਤੇਰੇ ਸ਼ਹਿਰ ਦਿਆਂ ਗੇੜੇਆਂ ਨੇ ਖਾ ਲਿਆ

ਹੁਸਨਾਂ ਦੀ ਸਰਕਾਰ ਤੇ ਭਾਵੇਂ ਸੈਂਟਰ ਦੀ ਸਰਕਾਰ
ਦੋਵਾਂ ਤੋਂ ਰੱਬ ਬਚਾਵੇ ਯਾਰੋ ਬੁਰੀ ਇਨ੍ਹਾਂ ਦੀ ਮਾਰ
ਦੋਵੇਂ ਜਣੀਆਂ ਬਿਨਾਂ ਕਸੂਰੋ ਮਾਰਾ ਮਾਰਦੀਆ
ਦਿਲਾਂ ਵਾਲਿਆਂ ਨੂੰ ਦੋਵੇਂ ਸਰਕਾਰਾ ਮਾਰਦੀਆ

ਹੁਸਨਾਂ ਦੀ ਸਰਕਾਰ ਦੀ ਸਾਨੂੰ ਡੇਲ੍ਹੀ ਸ਼ੌਪਿੰਗ ਮਾਰੇ
ਸੈਂਟਰ ਦੀ ਸਰਕਾਰ ਮਾਰਦੀ ਟੈਕਸ ਲਗਾ ਕੇ ਭਾਰੇ
ਬਿਨ ਤਨਖਾਹੋ ਨੌਕਰੀ ਅਸੀਂ ਬਗਾਰਾ ਮਾਰਦੀਆ
ਦਿਲਾਂ ਵਾਲਿਆਂ ਨੂੰ ਦੋਵੇਂ ਸਰਕਾਰਾ ਮਾਰਦੀਆ

ਇੱਕ ਘੂਰ ਨਾਲ ਮਾਰੇ ਦੂਜੀ ਡੰਡੇ ਨਾਲ ਡਰਾਉਂਦੀ
ਇੱਕ ਨੈਣੀਂ ਕੈਦ ਕਰੇ ਤੇ ਦੂਜੀ ਹਵਾਲਾਤ ਵਿੱਚ ਪਾਉਂਦੀ
ਆਫਰੀਆਂ ਨੇ ਜਿਦ੍ਹਾ ਜੀ ਸਾਨੂੰ ਹਾਰਾ ਮਾਰਦੀਆ
ਦਿਲਾਂ ਵਾਲਿਆਂ ਨੂੰ ਦੋਵੇਂ ਸਰਕਾਰਾ ਮਾਰਦੀਆ

ਇੱਕ ਸਾਡੇ ਤੇ ਦਿਲ ਦੀ ਚੋਰੀ ਦਾ ਇਲਜਾਮ ਲਗਾਵੇ
ਦੂਜੀ ਸਾਨੂੰ ਘੜੀ ਘੜੀ ਕਾਨੂੰਨੀ ਸਬਕ ਸਿਖਾਵੇ
ਆਸ਼ਕ ਧੁਰ ਤੋਂ ਫੱਟੜ ਉੱਪਰੋਂ ਆਹਾ ਮਾਰਦੀਆ
ਦਿਲਾਂ ਵਾਲਿਆਂ ਨੂੰ ਦੋਵੇਂ ਸਰਕਾਰਾ ਮਾਰਦੀਆ

ਦੇਬੀ ਵਰਗੇ ਕਈ ਇਹਨਾਂ ਸਰਕਾਰਾ ਦੇ ਹੀ ਪੱਟੇ
ਫੋਕੀ ਵਾਹ ਵਾਹ ਨੂੰ ਭਲਾ ਮਖਸੂਸਪੁਰੀ ਕੀ ਚੱਟੇ
ਕੰਮ ਕਦੇ ਨਾ ਆਈਆਂ ਖਾਲੀ ਟਾਰਾ ਮਾਰਦੀਆ
ਦਿਲਾਂ ਵਾਲਿਆਂ ਨੂੰ ਦੋਵੇਂ ਸਰਕਾਰਾ ਮਾਰਦੀਆ

ਕਹਿੰਦੇ ਭਾਗਾਂ ਵਾਲੇ ਹੁੰਦੇ ਜਿਹੜੇ ਪਾਉਣ ਚਿੱਠੀਆਂ
ਨਾਲੇ ਵੱਸਦੇ ਘਰਾਂ ਦੇ ਵਿੱਚ ਆਉਣ ਚਿੱਠੀਆਂ

ਚਿੱਠੀ ਵੀਰ ਦੀ ਨੂੰ ਭੈਣ ਹੈ ਸੰਧਾਰਾ ਮੰਨਦੀ
ਵਿਹੜੇ ਚਾਨਣੀ ਹੋ ਜਾਵੇ ਪੁੰਨਿਆਂ ਦੇ ਚੰਨ ਦੀ
ਚਿੱਠੀ ਵੀਰ ਦੀ ਜੇ ਆਵੇ ਭੈਣ ਫੁੱਲੀ ਨਾ ਸਮਾਵੇ
ਦਿਨ ਸਹੁਰਿਆਂ ਦੇ ਹੱਸ ਕੇ ਕਟਾਉਣ ਚਿੱਠੀਆਂ
ਨਾਲੇ ਵੱਸਦੇ ਘਰਾਂ ਦੇ ਵਿੱਚ ਆਉਣ ਚਿੱਠੀਆਂ

ਚਿੱਠੀ ਰਾਹੀਂ ਜਿਹੜੀ ਗੱਲ ਹੈ ਮਾਸ਼ੂਕ ਦੱਸਦੀ
ਉਹੋ ਮੁੱਖ ਵਿੱਚੋਂ ਕਦੇ ਵੀ ਨਾ ਦੱਸ ਸਕਦੀ
ਚਿੱਠੀ ਗੁੱਸਾ ਵੀ ਦਿਖਾਵੇ ਚਿੱਠੀ ਪਿਆਰ ਵੀ ਜਤਾਵੇ
ਚੋਰੀ ਦੁਨੀਆਂ ਤੋਂ ਦਿਲਾਂ ਨੂੰ ਮਿਲਾਉਣ ਚਿੱਠੀਆਂ
ਨਾਲੇ ਵੱਸਦੇ ਘਰਾਂ ਦੇ ਵਿੱਚ ਆਉਣ ਚਿੱਠੀਆਂ

ਬੈਂਕ ਵਾਲਿਆਂ ਦੀ ਚਿੱਠੀ ਪਾਉਂਦੀ ਦੌੜ ਭੱਜ ਏ
ਚਿੱਠੀ ਸ਼ਾਹੂਕਾਰ ਵਾਲੀ ਲੈਂਦੀ ਜਾਨ ਕੱਢ ਏ
ਮਾੜੀ ਚਿੱਠੀ ਜਦ ਆਉਂਦੀ ਖਿੱਚ ਕਾਲਜੇ ਨੂੰ ਪਾਉਂਦੀ
ਮੱਥੇ ਤਿਊੜੀ ਪੈਂਦੀ ਇਹੋ ਜਿਹੀਆਂ ਆਉਣ ਚਿੱਠੀਆਂ
ਨਾਲੇ ਵੱਸਦੇ ਘਰਾਂ ਦੇ ਵਿੱਚ ਆਉਣ ਚਿੱਠੀਆਂ

ਦੇਬੀ ਸ਼ਗਨਾਂ ਦੀ ਚਿੱਠੀ ਹੁੰਦੀ ਸਭ ਨੂੰ ਪਿਆਰੀ
ਕਦੋਂ ਵੱਜਣੇ ਨੇ ਵਾਜੇ ਗੱਲ ਲ਼ਿਖੀ ਹੁੰਦੀ ਸਾਰੀ
ਗੂੰਗੇ ਅੱਖਰਾਂ 'ਚ ਬੋਲੇ ਤੈਹਾਂ ਦਿਲ ਦੀਆਂ ਫ਼ੋਲੇ
ਮਖਸੂਸਪੁਰੀ ਮਾਹੀ ਨੂੰ ਮਿਲਾਉਣ ਚਿੱਠੀਆਂ
ਨਾਲੇ ਵੱਸਦੇ ਘਰਾਂ ਦੇ ਵਿੱਚ ਆਉਣ ਚਿੱਠੀਆਂ

ਜੇਹਨੂੰ ਜਾਨ ਤੋਂ ਪਿਆਰਾ ਰੱਖਿਆ ਹੁੰਦਾ ਏ
ਜਾਂਦਾ ਹੋਇਆ ਜਾਨ ਹੀ ਕੱਢ ਕੇ ਲੈ ਜਾਂਦਾ
ਸਦਮਾ ਭਾਵੇਂ ਵੱਡਾ ਹੋਵੇ ਕਿੰਨਾ ਵੀ
ਦਿਲ ਦੀ ਖੂਬੀ ਸਹਿੰਦਾ ਸਹਿੰਦਾ ਸਹਿ ਜਾਂਦਾ
ਜੇਹਦੇ ਮਨ ਵਿੱਚ ਖੋਟ ਤੇ ਮਾੜੀ ਨੀਤ ਹੋਵੇ
ਸਭ ਦੇ ਮਨ ਤੋਂ ਲਹਿੰਦਾ ਲਹਿੰਦਾ ਲਹਿ ਜਾਂਦਾ
ਸੱਜਣ ਦਿਲ ਦੀ ਦੌਲਤ ਨਾਲ ਹੀ ਲੈ ਜਾਂਦੇ
ਦੇਬੀ ਮਗਰੋਂ ਜ਼ਿੰਦਗੀ ਵਿੱਚ ਕੀ ਰਹਿ ਜਾਂਦਾ

ਆਪਣੇ ਮੈਂ ਯਾਰਾਂ ਨੂੰ ਦੁਆਂਵਾਂ ਵਿੱਚ ਯਾਦ ਰੱਖਾਂ
ਧੁੱਪਾਂ ਚ ਜੋ ਨਾਲ ਸੜੇ ਛਾਵਾਂ ਵਿੱਚ ਰਾਦ ਰੱਖਾਂ
ਅੱਜ ਕਿਸੇ ਹੋਰ ਦੇ ਜੋ ਵਿਹੜੇ ਦਾ ਸ਼ਿੰਗਾਰ ਬਣੇ
ਹੁੰਦੇ ਸੀ ਉਹ ਕਦੇ ਮੇਰੇ ਸਾਹਵਾਂ ਵਿੱਚ ਯਾਦ ਰੱਖਾਂ
ਇੱਕ ਗੱਲ ਪੱਕੀ ਏ ਮੈਂ ਇੱਕ ਦਿਨ ਮਰ ਜਾਣਾ
ਇਹੋ ਗੱਲ ਖੁਸ਼ੀਆਂ ਤੇ ਚਾਅਵਾਂ ਵਿੱਚ ਯਾਦ ਰੱਖਾਂ
ਵਿੱਛੜ ਵੀ ਸਕਦੇ ਆਂ ਅੱਢ ਵੀ ਹੋ ਸਕਦੇ ਆਂ
ਇਹ ਨਾ ਮੈਂ ਓਸਦੀਆਂ ਬਾਹਵਾਂ ਵਿੱਚ ਯਾਦ ਰੱਖਾਂ
ਮੰਜਲ ਮਿਲੀ ਤਾਂ ਦੇਬੀ ਸਾਰੇ ਦੁੱਖ ਭੁੱਲ ਜਾਣੇ
ਉੱਚੇ ਨੀਵੇਂ ਟੇਢੇ ਮੇਢੇ ਰਾਹਵਾਂ ਵਿੱਚ ਯਾਦ ਰੱਖਾਂ

ਪਿਆਸੀ ਮੌਤ ਤੋਂ ਜ਼ਿੰਦਗੀ ਦਾ ਘੁੱਟ ਪੀ ਹੋ ਜਾਂਦਾ
ਆਖਿਰ ਬੰਦਾ ਇੱਕ ਦਿਨ ਹੈ ਤੋਂ ਸੀ ਹੋ ਜਾਂਦਾ

ਕਹਿੰਦੇ ਹਰ ਇੱਕ ਨੂੰ ਗਿਣਤੀ ਦੇ ਸਾਹ ਮਿਲਦੇ ਨੇ
ਓਦੋਂ ਜ਼ਿਆਦਾ ਕਦੇ ਕਿਸੇ ਨਾ ਭਾਅ ਮਿਲਦੇ ਨੇ
ਚੰਗੇ ਭਲੇ ਸ਼ਰੀਰ ਨੂੰ ਖਬਰੇ ਕੀ ਹੋ ਜਾਂਦਾ
ਆਖਿਰ ਬੰਦਾ ਇੱਕ ਦਿਨ ਹੈ ਤੋਂ ਸੀ ਹੋ ਜਾਂਦਾ

ਸਦਾ ਫਰਿਸ਼ਤਾ ਮੌਤ ਦਾ ਦੱਬੇ ਪੈਰੀ ਆਵੇ
ਨਾ ਕੁੱਝ ਪੁੱਛੇ ਨਾ ਕੁੱਝ ਦੱਸੇ ਚੁੱਕ ਲੈ ਜਾਵੇ
ਵਾਰੀ ਵਾਰੀ ਸਭ ਨਾਲ ਐਦਾ ਹੀ ਹੋ ਜਾਂਦਾ
ਆਖਿਰ ਬੰਦਾ ਇੱਕ ਦਿਨ ਹੈ ਤੋਂ ਸੀ ਹੋ ਜਾਂਦਾ

ਦੇਬੀ ਰੋਜ਼ ਕਿਸੇ ਦੀ ਹੋਣੀ ਆਈ ਰਹਿੰਦੀ
ਚੇਤੇ ਆਖਿਰ ਨੇਕੀ ਕੋਈ ਕਮਾਈ ਰਹਿੰਦੀ
ਜਨਮ ਤੋਂ ਮਰਨ ਤਾਂਈਂ ਰਾਹ ਦੇ ਵਿੱਚ ਕੀ ਕੀ ਹੋ ਜਾਂਦਾ
ਆਖਿਰ ਬੰਦਾ ਇੱਕ ਦਿਨ ਹੈ ਤੋਂ ਸੀ ਹੋ ਜਾਂਦਾ

ਬਣ ਜਾਂਦਾ ਥੱਲ ਕਿੰਨਾ ਜਲ ਹੋਕੇ ਆਵੇ
ਉਸ ਦਰ ਤੋਂ ਹਰ ਕੋਈ ਕਤਲ ਹੋ ਕੇ ਆਵੇ
ਬੰਦਿਆਂ ਦੇ ਵਾਂਗ ਆਵੇ ਇੱਕ ਵਾਰੀ ਭਾਵੇਂ
ਜੀਵਨ ਦਾ ਆਖਰੀ ਪਲ ਹੋ ਕੇ ਆਵੇ
ਸੀਨੇ ਚ ਰਹੇ ਕੁੱਝ ਥਲ ਵਾਂਗੂ ਭੁੱਜਦਾ
ਅੱਖੀਆਂ ਚ ਆਵੇ ਤਾਂ ਜਲ ਹੋਕੇ ਆਵੇ
ਜੋ ਮਿਲਿਆ ਬਣਕੇ ਬੁਝਾਰਤ ਹੀ ਮਿਲਿਆ
ਹੁਣ ਜੀਹਨੇ ਆਉਣਾ ਉਹ ਹੱਲ ਹੋਕੇ ਆਵੇ
ਸੁਲਾਹ ਕਿੰਝ ਹੋਵੇ ਸ਼ਰਤ ਬੜੀ ਔਖੀ
ਪੱਗ ਲਾਕੇ ਗੋਢਿਆ ਵੱਲ ਹੋਕੇ ਆਵੇ
ਸਾਡੀ ਤੇ ਦੁਨੀਆਂ ਦੀ ਨਿੱਭ ਵੀ ਏ ਸਕਦੀ
ਇੱਕ ਦੀ ਜੇ ਆਦਤ ਬਦਲ ਹੋਕੇ ਆਵੇ
ਕਦੀ ਯਾਦ ਆਉਂਦਾ ਸੀ ਬਣ ਬਣ ਕੇ ਹੌਂਕੇ
ਅੱਜਕਲ੍ਹ ਉਹ ਦੇਬੀ ਗਜ਼ਲ ਹੋ ਕੇ ਆਵੇ

ਦਿਨ ਉਹ ਪਿਆਰਾਂ ਵਾਲੇ
ਖਿੜੀਆਂ ਬਹਾਰਾਂ ਵਾਲੇ
ਯਾਦ ਜਦ ਆਉਂਦੇ ਨੇ
ਬੜਾ ਤੜਪਾਉਂਦੇ ਨੇ

ਮਹਿਕ ਜੇਦੇ ਬਦਨ ਦੀ ਸੀ ਚੰਦਨ ਰੁੱਖੜੇ ਵਰਗੀ
ਸ਼ਕਲ ਚੰਗੇ ਸ਼ਾਇਰ ਦੇ ਗੀਤ ਦੇ ਮੁੱਖੜੇ ਵਰਗੀ
ਨੈਣਾਂ ਨਾਲ ਤੱਕਣਾ ਬੋਲਣਾ
ਮੂੰਹ ਤਾਂ ਨਖਰੇ ਨਾ' ਖੋਲਣਾ
ਯਾਦ ਜਦ ਆਉਂਦੇ ਨੇ
ਬੜਾ ਤੜਪਾਉਂਦੇ ਨੇ
ਦਿਨ ਉਹ ਪਿਆਰਾਂ ਵਾਲੇ
ਖਿੜੀਆਂ ਬਹਾਰਾਂ ਵਾਲੇ

ਜੇਹਨਾਂ ਦੀ ਪੈੜ ਦਾ ਰੇਤਾ ਉਮਰ ਸਾਰੀ ਸੀ ਛਾਣਨਾ
ਅੱਸੂ ਦੇ ਚਾਨਣ ਵਾਂਗੂ ਸੀ ਪਿਆਰ ਜੀਹਨਾਂ ਦਾ ਮਾਨਣਾ
ਬਣ ਗਏ ਪੋਹ ਦੇ ਪਾਲੇ
ਸੋਹਣੇ ਜੋ ਦਿਲ ਦੇ ਕਾਲੇ
ਯਾਦ ਜਦ ਆਉਂਦੇ ਨੇ
ਬੜਾ ਤੜਪਾਉਂਦੇ ਨੇ
ਦਿਨ ਉਹ ਪਿਆਰਾਂ ਵਾਲੇ
ਖਿੜੀਆਂ ਬਹਾਰਾਂ ਵਾਲੇ

ਤੁਸੀਂ ਉਸਨੂੰ ਨਹੀਂ ਮਿਲਣਾ ਤੁਸੀਂ ਉਹਦੇ ਨਹੀਂ ਜਾਣਾ
ਤੁਸੀਂ ਓੱਥੇ ਨਹੀਂ ਖੜਣਾ ਤੁਸੀਂ ਆਹ ਕੁੱਝ ਨਹੀਂ ਖਾਣਾ
ਦੇਬੀ ਨੂੰ ਕਸਮ ਖੁਆਈ
ਆਪ ਨਾ ਜਿੰਨ੍ਹਾਂ ਨਿਭਾਈ
ਯਾਦ ਜਦ ਆਉਂਦੇ ਨੇ
ਬੜਾ ਤੜਪਾਉਂਦੇ ਨੇ
ਦਿਨ ਉਹ ਪਿਆਰਾਂ ਵਾਲੇ
ਖਿੜੀਆਂ ਬਹਾਰਾਂ ਵਾਲੇ